10 Apr 2023, 00:36
ވިސާ ނުލިބިގެން ސަފާ ގްރޫޕުގެ ހަވާލުގައި ފުރޭ ގޮތް ނުވި އެންމެންނަށް ވިސާ މިހާރު ލިބިފައިވާ ކަމަށް އެ ގްރޫޕުން ބުނެފިއެވެ.
ސަފާ ގްރޫޕުން ބުނީ އެ ގްރޫޕުން ޗާޓާ ކުރި ސަލާމް އެއާގެ ފްލައިޓް ރާއްޖެއާއި، މަސްކަޓު، ސައުދީ އަރަބިޔާގައި ޖެއްސުމުގެ ހުއްދަ ސަލާމް އެއާއަށް މިހާރު ލިބިފައިވާ ކަމަށެވެ.
އެގޮތުން މިމަހުގެ 11 ވާ އަންގާރަ ދުވަހުގެ ހެނދުނު 11:00 ގައި އުމްރާވެރިން ފުރާގޮތަށް ހަމަޖެހިފައިވާ ކަމަށް އެ ގްރޫޕުން ވަނީ ބުނެފައެވެ.
ސަފާ ގްރޫޕުން ބުނީ ޕްރީ ޗެކިން ކުރުމަށް ފޮށި ގެންދަންޖެހޭ ގަޑި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އެންގިހާ އަވަހަށް އަންގާނެ ކަމަށެވެ.
ސަފާ ގުރޫޕަށް ފައިސާ ދައްކާފައިވާ ޢުމްރާވެރިންގެ ތެރެއިން ގިނަ އަދަދެއްގެ ބަޔަކު އުމްރާއަށް ފުރަން ހަމަޖައްސާފައި އޮތީ މިދިޔަ ބުރާސްފަތި ދުވަހުގެ ހެނދުނެވެ. އެކަމަކު، ބުރާސްފަތި ދުވަހުގެ ފަތިހު އުމްރާވެރިންނަށް ޚާއްސަކޮށްފައިވާ ވައިބާ ގުރޫޕަށް ފޮނުވި މެސެޖެއްގައި ވަނީ ދަތުރު ކެންސަލްވީ ކަމަށް ބުނެފައެވެ.
މި މައްސަލަ އިސްލާމިކް މިނިސްޓްރީން ބެލުމަށްފަހު ނެރުނު ނޫސްބަޔާނުގައި ބުނެފައިވަނީ ވިސާ ނުލިބިގެން ސަފާ ގްރޫޕް މީހުނަށް އުމްރާއަށް ފުރޭގޮތް ނުވީ އެ ގްރޫޕުން ދުރާލާ ވިސާނެގުމުގެ ކަންކަން ހަމަޖައްސާފައި ނުވުމުން ކަމަށެވެ. މިގޮތުން ތިން މަސް ދުވަހަށް އުމްރާ ވިސާ ލިބޭކަން އިސްލާމިކް މިނިސްޓްރީން ފާހަގަކުރިއެވެ.
އެ މިނިސްޓްރީން ވަނީ ސަފާ ގްރޫޕަށް ވިސާ ހަމަނުޖެހުނީ އެ ގްރޫޕުގެ އިހުމާލަކުން ކަމަށް ސިފަކޮށްފައެވެ. ނަމަވެސް ސަފާ ގްރޫޕުގެ އޮފިޝަލަކު "ސަން"އަށް މީގެ ކުރިން ވިދާޅުވީ އެއްވެސް ބަޔަކަށް އޮޅުވައިލުމަކީ އެއްވެސް ހާލެއްގައި އެ ގްރޫޕުގެ ވިސްނުމެއް ނޫން ކަމަށެވެ.