06 Apr 2023, 20:54
މިއަހަރު ބާއްވާ ރިޔާސީ އިންތިޚާބަށް ކޯލިޝަން ހެދުމަށް ޖުމްހޫރީ ޕާޓީން ދީފައިވާ ދައުވަތު ގަބޫލުކޮށް އެޕާޓީއާއެކު މަޝްވަރާ ކުރުމަށް ރައީސް މައުމޫން އަބްދުލްގައްޔޫމްގެ މޯލްޑިވްސް ރިފޯމް މޫވްމަންޓް (އެމްއާރުއެމް)އިން ނިންމައިފިއެވެ.
ޖޭޕީގެ ލީޑަރު އަދި އެ ޕާޓީގެ ރިޔާސީ ކެންޑިޑޭޓް ގާސިމް އިބްރާހީމް ވަނީ ރިޔާސީ އިންތިޚާބުގައި ޖޭޕީއާއެކު ކޯލިޝަން ހެދުމަށް މިދިޔަ ހޯމަ ދުވަހު އެމްއާރުއެމް ހިމެނޭހެން ފަސް ފަރާތަކަށް ދައުވަތު ދެއްވާފައެވެ. އެއީ އެމްޑީޕީގެ ކުރީގެ ރައީސް، އަދި ކުރީގެ ބަންޑާރަ ނައިބު ޑރ. މުހައްމަދު މުނައްވަރާއި ކުރީގެ ހޯމް މިނިސްޓަރު އުމަރު ނަސީރާއި ޕީޕީއެމްގެ އިތުރުން އެމްއެންޕީއަށެވެ.
އެކަމަކު އަދި މިހާތަނަށް އެމްއާރްއެމް ފިޔަވައި އެހެން ޕާޓީއަކުން ގާސިމް ފޮނުއްވި ދައުވަތު ގަބޫލުކޮށްފައެއް ނުވެއެވެ.
ޖުމްހޫރީ ޕާޓީއާއެކު އިތުރަށް މަޝްރަވަރާކުރުމާބެހޭ ގޮތުން އެމްއާރުއެމުން މިރޭ ބުނީ ގާސިމްގެ ދައުވަތު ގަބޫލުކޮށް އެ ދެޕާޓީން އިތުރަށް މަޝްވަރާ ކުރުމަށް މިއަދު ނިންމާފައިވާ ކަމަށެވެ. ނަމަވެސް އަދި އެ މަޝްވަރާތައް ފަށާނެ ވަކި ތާރީޚެއް ހަމަޖެހިފައިވާނުވާ ކަމަށް އެ ޕާޓިން ބުންޏެވެ.
އެމްއާރުއެމުން މިހާތަނަށް ވަނީ ރިޔާސީ އިންތިޚާބާ ގުޅޭ ގޮތުން އެމްޑީޕީއާއި ޖޭޕީ އަދި އަދާލަތު ޕާޓީއާ އެކު މަޝްވަރާ ކޮށްފައެވެ. އެ ޕާޓީން އޭރު ބުނެފައިވަނީ އެކި ސިޔާސީ ޕާޓީތަކާއި ސިޔާސީ ބޭފުޅުންނާ އެކު ފަހުން ތަފުސީލީ ގޮތެއްގައި އިތުރު މަޝްވަރާތައް ބާއްވާނެ ކަމަށެވެ.
އެމްއާރުއެމަކީ ކުރިއަށް އޮތް ރިޔާސީ އިންތިޚާބަށް ނުކުތުމާ މެދުގައި ވަކި ގޮތެއް ނުނިންމާ އޮތް ހަމައެކަނި ސިޔާސީ ޕާޓީއެވެ.