06 Apr 2023, 13:54
ވިސާ ހަމަނުޖެހޭ ކަމަށް ބުނެ، ސަފާ ހައްޖު އެންޑް ޢުމްރާ ގުރޫޕުގެ ހަވާލުގައި މިއަދު ހެނދުނު ޢުމްރާއަށް ފުރަން ހަމަޖެހިފައި އޮތް މީހުންގެ ޢުމްރާ ދަތުރު އެންމެ ފަހު ވަގުތު ކެންސަލް ކުރި މައްސަލަ އިސްލާމިކް މިނިސްޓްރީން ބަލަން ފަށައިފިއެވެ.
ސަފާ ގުރޫޕަށް ފައިސާ ދައްކާފައިވާ ޢުމްރާވެރިންގެ ތެރެއިން ގިނަ އަދަދެއްގެ ބަޔަކު ފުރަން ހަމަޖައްސާފައި އޮތީ މިއަދު ހެނދުނެވެ. އެކަމަކު، މިއަދު ފަތިހު ޢުމްރާވެރިންނަށް ހާއްސަކޮށްފައިވާ ވައިބާ ގުރޫޕަށް ފޮނުވި މެސެޖެއްގައި ވަނީ ދަތުރު ކެންސަލް ވީ ކަމަށް ބުނެފައެވެ.
އެ ކަމާ ގުޅިގެން އިސްލާމިކް މިނިސްޓްރީން ބުނީ އެ ގްރޫޕުން ފުރަން ހަމަޖެހިފައިވާ މީހުންނަށް ނުފުރުނު މައްސަލަ އެ މިނިސްޓްރީއަށް ޝަކުވާއެއްގެ ގޮތުގައި ހުށަހަޅައިފައިވާކަމަށެވެ.
އެހެންވެ އެކަން ހިނގި ގޮތް ބަލަމުން އަންނަކަމަށް އެ މިނިސްޓްރީން ވަނީ ބުނެފައެވެ.
"މިނިސްޓްރީން މިދަނީ އެ ކަން ހިނގައިފައިވާ ގޮތް ވަރަށް ގާތުން ބަލަމުން،" އިސްލާމިކް މިނިސްޓްރީން ބުންޏެވެ.
ފަހު ވަގުތު ޢުމްރާ ދަތުރު ކެންސަލް ކުރުމުން، ސަފާ ގުރޫޕުން ޢުމްރާއަށް ދާން ފައިސާ ދައްކާފައިވާ އެތައް ބަޔަކު އަންނަނީ ވަރަށް ބޮޑަށް ނުރުހުން ފާޅުކުރަމުންނެވެ. މި ކަމާ ގުޅިގެން ސަފާ ގުރޫޕުގެ ބަހެއް ލިބިފައިނުވާތީ މި ކަމާ ގުޅޭ އިތުރު ތަފުސީލެއް ލިބިފައެއް ނުވެއެވެ.