25 Mar 2023, 10:54
ޗެޓްޖީޕީޓީ ބަގެއްގެ ސަބަބުން ބައެއް މީހުން ދެއްކި ވާހަކަތައް ލީކުވުމުން، އެ ޗެޓްބޮޓް އުފެއްދި ކުންފުނި ކަމަށްވާ އޯޕަންއޭއައި އިން މާފަށް އެދިއްޖެއެވެ.
އެ މައްސަލަ ފާހަގަކުރެވުމުން އޯޕަންއޭއައިގެ ސީއީއޯ ސޭމް އޮލްޓްމަން ނެރުނު ބަޔާނެއްގައި ވަނީ ހިތާމަ ފާޅުކޮށް، އެ މައްސަލައިގައި ޝާމިލުވި މީހުންގެ ކިބައިން މާފަށް އެދިފައެވެ.
އޮލްޓްމަން ބުނީ އެފަދަ ކަމެއް ތަކުރާރު ނުވާނެ ގޮތަށް ކުރެވެން އޮތް ހުރިހާ މަސައްކަތެއް އެ ކުންފުނިން ކުރާނެ ކަމަށެވެ.
"ޔޫޒަރުންގެ ޑޭޓާ ރައްކާތެރިކުރުމުގެ ޒިންމާ އަޅުގަނޑުމެން ވަރަށް ސީރިއަސްކޮށް ނަގަން، އަދި މި ހާދިސާގެ ސަބަބުން ލިބުނު ގެއްލުންތަކާ މެދު ވަރަށް ބޮޑަށް ހިތާމަކުރަން. ކުރިއަށް އޮތްތަނުގައި އެކަން ނުވާނެ ގޮތަކަށް އަޅަންޖެހޭ ހުރިހާ ފިޔަވަޅެއް އެޅުމަށް އަޅުގަނޑުމެން ވައުދުވަން،" އޭނާ ބުންޏެވެ.
ރިޕޯޓްތަކުގައިވާ ގޮތުން، ޗެޓްޖީޕީޓީއިން ބައެއް މީހުންގެ ޗެޓް ހިސްޓްރީ ލީކުވީ، މީހުން ދައްކާ ވާހަކަ ރައްކާކުރުން އެކަށީގެންނުވާ ސާވަރެއްގައި އެފަދަ މައުލޫމާތު ސޭވް ކުރަން ފެށުމުންނެވެ.
އެ މައްސަލަ އޯޕަންއޭއައިގެ އިންޖިނިއަރުންނަށް އެނގުމުން ވަގުތުން އެ ސިސްޓަމް ބަންދުކޮށް ތަހުގީގެއް ފެށިއެވެ. ނަމަވެސް އޭރު އެ ބަގް ވަނީ ފާއިތުވި ހަ މަސް ދުވަހުގެ ތެރޭގައި ބައެއް މީހުން ދައްކާފައިވާ ވާހަކަތައް ލީކުކޮށްފައެވެ.
ލީކުވި މައުލޫމާތުތަކުގެ ތެރޭގައި މީހުންގެ ޔޫޒާނޭމްތަކާއި، ވާހަކަ ދައްކާ މައުޟޫއުތަކާއި، ޗެޓްޖީޕީޓީއާ ހިއްސާކުރި މެސެޖުތައް ހިމެނެއެވެ. ނަމަވެސް އެއްވެސް މީހެއްގެ ޒާތީ ނުވަތަ ފައިސާއާ ބެހޭ މައުލޫމާތެއް ހާމަނުކުރާކަން އޯޕަންއޭއައި އިން ފާހަގަކުރިއެވެ.
އޮލްޓްމަން ވަނީ އެ މައްސަލައިގެ ސަބަބުން އޯޕަން އޭއައިއަށް ކުރާ އިތުބާރަށް އަސަރުކޮށްފައިވާކަން ގަބޫލުކުރާ ކަމަށާއި އެކަން ހިނގި ގޮތް ބަލައި، އެފަދަ ކަމެއް ތަކުރާރު ނުވާނެކަން ޔަގީންކުރުމަށް ފިޔަވަޅު އަޅާނެ ކަމަށް ބުނެފައެވެ.
"ކަން ހިނގި ގޮތާއި އެކަން ރަނގަޅު ކުރުމަށް އަޅުގަނޑުމެން ކުރަމުންދާ މަސައްކަތްތައް ހާމަކޮށް، ތެދުވެރިވާނަން،" އޭނާ ވިދާޅުވިއެވެ.
އޯޕަންއޭއައި އިން މިހާރު ދަނީ އެ ކުންފުނީގެ ސިސްޓަމްތަކާއި ޕްރޮސެސްތައް މުރާޖައާކޮށް، ދިމާވެދާނެ މައްސަލަތައް ދެނެގަތުމުގެ މަސައްކަތް ކުރަމުންނެވެ. އަދި އެ ކުންފުނިން ވަނީ އެކަމުގެ އަސަރު ކުރި ޔޫޒަރުންނާ ގުޅައިގެން އެ މައްސަލައިގެ މައުލޫމާތު ފޯރުކޮށްދީ، އެކައުންޓްތައް ރައްކާތެރިކުރުމުގައި އެހީތެރިކަން ފޯރުކޮށްދީފައެވެ.
އޮލްޓްމަން ބުނީ، އޯޕަންއޭއައިއިން އިންސާނިއްޔަތަށް ފައިދާހުރި ގޮތަކަށް އޭއައި ތަރައްގީ ކުރުމަށް ވައުދުވެފައިވާ ކަމަށާއި މި ހާދިސާއިން ލިބުނު ފިލާވަޅުތައް ބޭނުންކޮށްގެން ކުންފުނީގެ ނިޒާމުތަކާއި ޕްރޮސެސްތައް ހަރުދަނާ ކުރާނެ ކަމަށެވެ.