24 Mar 2023, 20:18
ދުނިޔޭގެ އެންމެ ބޮޑު އެއް ޓެކްނޮލޮޖީ ކުންފުނި ގޫގުލްއިން ބާޑްގެ ނަމުގައި އުފެއްދި އާ އޭއައި ޗެޓްބޮޓް ބައެއް ގައުމުތަކަށް ދޫކުރަން ފަށައިފިއެވެ.
ގޫގުލްއިން ބުނަނީ ބާޑް އަދިވެސް އޮތީ ޓެސްޓިން މަރުހަލާގައި ކަމަށާއި، އެހެންކަމުން އެ ޚިދުމަތް ބޭނުންކުރާ ފަރާތްތަކުގެ ޚިޔާލު ހޯދައި، އިތުރަށް ތަރައްގީ ކުރުމުގެ މަސައްކަތް ކުރިއަށްގެންދާ ކަމަށެވެ.
މިވަގުތު ބާޑް ބޭނުންކުރެވެނީ އެމެރިކާ އާއި އިނގިރޭސިވިލާތުގައި ދިރިއުޅޭ 18 އަހަރުން މަތީގެ މީހުންނަށެވެ. އެ ޚިދުމަތް ބޭނުންކުރުމަށް ޓަކައި އަމިއްލަ ގޫގުލް އެކައުންޓެއް މެދުވެރިކޮށް 'ވެއިޓްލިސްޓް'އެއްގައި ނަން ހިމަނައި، ފުރުސަތު ލިބެންދެން މަޑުކުރަން ޖެހެއެވެ.
ގޫގުލްއިން ވަނީ ކުރިއަށް އޮތް ދުވަސްތަކުގައި އެ ޚިދުމަތް އެހެން ގައުމުތަކަށް ވެސް ފުޅާކުރާނެ ކަމަށް ބުނެފައެވެ.
ގޫގުލްގެ މި މަސައްކަތަކީ، މިހާރު އޭއައި ޗެޓްބޮޓްގެ ޚިދުމަތް ދޭ މައިކްރޮސޮފްޓް އާއި ޗެޓްޖީޕީޓީ ފަދަ ވާދަވެރިންނާ އެއްވަރަށް ނުވަތަ އެއަށްވުރެ ކުރިއަރައިގެން ދިޔުމަށް ގޫގުލްއިން ކުރަމުންދާ މަސައްކަތުގެ ތެރެއިން ބައެކެވެ.
ބާޑްއަކީ މީހުން އެކަކު އަނެކަކާ ވާހަކަދައްކާ އުސޫލުން ތަފާތު މައުޟޫއުތަކަށް ވާހަކަ ދައްކަން ފަރުމާކޮށްފައިވާ އޭއައި ޗެޓްބޮޓަކަށްވާއިރު، މި ޗެޓްބޮޓަކީ ގޫގުލްގެ ޒަމާނީ ލޭންގުއޭޖް ޕްރޮސެސިން ޓެކްނޮލޮޖީގެ މައްޗަށް ބިނާކޮށް އުފައްދާފައިވާ ޗެޓްބޮޓެކެވެ. މި ޓެކްނޮލޮޖީގެ ސަބަބުން އެ ބޮޓް އާންމު ބަސްތައް ދަސްކޮށް، އެ މީހަކު ދައްކާ ވާހަކައަކާ ގުޅޭ ޖަވާބުތައް ދޭން ފަރިތަވާނެއެވެ.
ގޫގުލްއިން ބުނާ ގޮތުގައި ބާޑް ފަރުމާކޮށްފައި ވަނީ ކޮންމެ މީހަކަށް ވެސް އެމީހަކަށް ޚާއްސަ ނުވަތަ 'ޕާސަނަލައިޒްޑް' ތަޖުރިބާއެއް ފޯރުކޮށްދޭ ގޮތަށެވެ. އަދި ޗެޓްބޮޓްގެ މުއާމަލާތްތަކާ ބެހޭ ގޮތުން މީހުންގެ ޚިޔާލު އެއްކޮށް، މި ޓެކްނޮލޮޖީ އިތުރަށް ރަނގަޅު ކުރުމަށް އުންމީދުކުރާ ކަމަށް ވެސް އެކުންފުނިން ވަނީ ބުނެފައެވެ.
"އަހަރެމެން މިތިބީ ބާޑް އާންމުންނަށް ރިލީޒްކޮށް، ޗެޓްބޮޓާ މީހުން މުއާމަލާތްކުރާ ގޮތް ބަލަން. އަޅުގަނޑުމެން ގަބޫލުކުރާ ގޮތުގައި އޮންލައިންކޮށް މާނަހުރި ވާހަކަތަކެއް ދައްކަން ބޭނުންވާ ކޮންމެ މީހަކަށް ވެސް ބާޑް އަކީ އަގުހުރި ވަސީލަތަކަށް ވުމުގެ ގާބިލްކަން އެބައޮތް،" ގޫގުލްގެ ތަރުޖަމާނަކު ވިދާޅުވިއެވެ.
ބާޑް ރިލީޒްކޮށްފައިވަނީ މީހުންނާއި ވިޔަފާރިތަކުން ވެސް އޭއައި ޗެޓްބޮޓް ބޭނުންކުރާ މިންވަރު އިތުރުވަމުންދާ ދަނޑިވަޅެއްގައެވެ. އަދި ކަސްޓަމާ ސާވިސް އާއި ސޭލްސްއިން ފެށިގެން މުނިފޫހިފިލުވުމާއި ތައުލީމީ ދާއިރާއާ ގުޅުން ހުރި ގިނަ އެޕްލިކޭޝަންތަކެއްގައި ޗެޓްބޮޓް ބޭނުން ކުރުން އިތުރުވަމުން ދަނިކޮށެވެ.
ގޫގުލް އަކީ އޭއައިގެ ދުނިޔެއަށް އައު ކުންފުންޏަކަށް ނުވާއިރު، ގޫގުލްއިން އެ ޓެކްނޮލޮޖީއަށް އިންވެސްޓް ކުރަމުން އަންނަތާ އެތައް އަހަރެއް ވަނީ ވެފައެވެ. ނެޗުރަލް ލެންގުއެޖް ޕްރޮސެސިން އާއި މެޝިން ލާނިންގެ ދާއިރާއިން އެކުންފުނީގެ ތަޖުރިބާގެ ސަބަބުން މަތީ ފެންވަރުގެ ޗެޓްބޮޓްއެއް ފަރުމާކުރުމުގެ ގާބިލްކަން ގޫގުލްއަށް ލިބިފައިވާ ކަމަށް މިދާއިރާގެ ތަޖުރިބާކާރުން ގަބޫލުކުރެއެވެ.