07 Mar 2023, 13:15
ދުނިޔޭގެ ބޮޑެތި ކުންފުނިތަކާއި މުއައްސަސާތަކަށް ބިރު ދައްކައިގެން އެތައް މިލިއަން ޔޫރޯއެއް އަތުލަމުން ދިޔަ ބައިނަލްއަގުވާމީ ސައިބާ ކްރައިމް ގޭންގެއް ހޯދާފައިވާ ކަމަށް ޖަރުމަނުގެ ފުލުހުން ބުނެފިއެވެ.
އެ ގޭންގުން ކުށް ކުރަނީ، ޑޮޕެލް ޕޭމާ ކިޔާ ރޭންސަމްވެއާއެއް ބޭނުންކޮށްގެންނެވެ. އެގޮތުން ކުންފުނިތަކާއި މުއައްސަސާތަކުގެ ނެޓްވޯކްތަކަށް ވަދެ، ސިއްރު މައުލޫމާތު ވަގަށް ނެގުމަށް ފަހު އެ މައުލޫމާތުގެ ވެރިފަރާތްތަކަށް ނެޓްވޯކް ބޭނުންނުކުރެވޭ ގޮތް ހަދައެވެ. ދެން އެ ނެޓްވޯކް އަލުން ބޭނުންކުރެވޭނެ ގޮތް ހެދުމަށާއި ސިއްރު މައުލޫމާތު ލީކު ނުކުރާނެ ކަމުގެ ޔަގީންކަމުގެ ބަދަލެއްގެ ގޮތުން ގިނަ އަދަދެއްގެ ފައިސާ ދޭން އެ ގޭންގުތަކުން އަންގައެވެ.
އެސޯސިއޭޓެޑް ޕްރެސް (އޭޕީ)ގައި ރިޕޯޓްކޮށްފައިވާ ގޮތުން، އެ ގޭންގުން ތަފާތު ގައުމުތަކުގެ 601 ތަނަކަށް ބިރު ދައްކާފައިވެއެވެ. އޭގެ ތެރޭގައި ޖަރުމަނުގެ 37 ތަނެއް ހިމެނެއެވެ.
އީޔޫގެ ގާނޫނުތައް ތަންފީޒުކުރާ އިދާރާ ކަމަށްވާ ޔޫރޮޕޯލްއިން ބުނި ގޮތުގައި، 2019 ވަނަ އަހަރުގެ މެއި މަހާއި 2021 ވަނަ އަހަރުގެ މާޗު މަހާ ދޭތެރޭގައި އެ ގޭންގުން ވަނީ އެމެރިކާގެ ކުންފުނިތަކަށާއި މުއައްސަސާތަކަށް ބިރު ދައްކައިގެން 40 މިލިއަން ޔޫރޯ (42.5 މިލިއަން ޑޮލަރު) އަތުލާފައެވެ.
މި ގޭންގް ސިފަކޮށްފައި ވަނީ "ބިގް ގޭމް ހަންޓިން"އަށް ޚާއްޞަވެފައިވާ ގްރޫޕެއްގެ ގޮތުގައެވެ. އެއީ ގިނައިން ފައިސާ ހޯދުމުގެ މަގުސަދުގައި ބޮޑެތި ކޯޕަރޭޝަންތަކާއި، ޖަމިއްޔާތަކަށް ނުވަތަ މުއައްސަސާތަކަށް ހަމަލާތައް އަމާޒުކުރާ ގޭންގުތަކެވެ.
އޭޕީގައިވާ ގޮތުން، އެ ގޭންގަށް މީހުން އިތުރު ކުރުމަށް ޚާއްސަ އޮޕަރޭޝަނެއް ވެސް ހިންގައެވެ. އެގޮތުން އަލަށް ގުޅެން ބޭނުންވާ މީހުން ކުރިން ކޮށްފައިވާ ސައިބާ ކުށްތަކުގެ މައުލޫމާތު ދޭން އެދޭ ކަމަށާއި އެމީހުންނަށް މުސާރަ ހިނގާ ގޮތަށް ޗުއްޓީ ދޭނެ ކަމުގެ ޔަގީންކަން ދޭ ކަމަށް އެ އޭޖެންސީން ރިޕޯޓުކުރިއެވެ.
އެ ގޭންގުގެ ސައިބާ ހަމަލާއެއްގެ އަމާޒަކަށްވި އެންމެ މުހިންމު ތަންތަނުގެ ތެރޭގައި އިނގިރޭސިވިލާތުގެ ނެޝަނަލް ހެލްތު ސާވިސް (އެންއެޗްއެސް)އާއި ޖަރުމަނުގެ ސިޓީއެއް ކަމަށްވާ ޑުސެލްޑޯފްގެ ޔުނިވާސިޓީ ހޮސްޕިޓަލެވެ. އެ ދެ ތަނަށް ވެސް ޑޮޕެލް ޕޭމާ ރެންސަމްވެއާ ބޭނުންކޮށްގެން ހަމަލާ ދީފައި ވަނީ 2020 ވަނަ އަހަރުގައެވެ.
ޖަރުމަނުގެ ފުލުހުން އެ ގޭންގުގެ މެމްބަރުން ހޯދީ ޔޫރޮޕޮލް އާއި އެމެރިކާގެ އެފްބީއައިއާ ގުޅިގެންނެވެ. އެގޮތުން އެ ގޭންގާ ގުޅުން ހުރި 11 މީހެއްގެ މައުލޫމާތު ހޯދިފައިވާ ކަމަށް ފުލުހުން ބުންޏެވެ.
އެ މައްސަލައާ ގުޅިގެން މިދިޔަ މަހުގެ 28 ވަނަ ދުވަހު ފުލުހުން ވަނީ ޖަރުމަނާއި ޔޫކްރެއިންގައި އެއްފަހަރާ ޚާއްޞަ އޮޕަރޭޝަނެއް ހިންގައި، ގޭންގުގެ ކުށްތަކާ ގުޅުން ހުރި ހެކި ހޯދައި ތުހުމަތު ކުރެވޭ ބައެއް މީހުން ހައްޔަރުކޮށްފައެވެ.
ޖަރުމަނުގެ ސްޓޭޓެއްކަމުގައިވާ ނޯތު ރައިން-ވެސްޓްފެލިއާގެ ފުލުހުންގެ ސައިބާ ކްރައިމް ޑިޕާޓްމަންޓުގެ އިސްވެރިޔާ ޑާކް ކުންޒޭ ވިދާޅުވީ ރަޝިއާގެ ދެ ރައްޔިތަކު ހިމެނޭ ގޮތަށް އިތުރު ތިން މީހަކު ފާހަގަކުރެވިފައިވާ ކަމަށާއި، އެހެންނަމަވެސް އެއީ ޔޫރަޕްގެ ގާނޫނު ތަންފީޒުކުރާ ފަރާތްތަކުގެ އިހުތިސާސުން ބޭރުގައި ތިބި ބައެއް ކަމުން އެ މީހުން ހައްޔަރު ކުރެވެން ނެތް ކަމަށް އޭނާ ވިދާޅުވެފައިވެއެވެ.