27 Feb 2023, 22:53
ރައީސް އިބްރާހީމް މުޙައްމަދު ޞާލިޙް، ނޭޝަނަލް ޖޮބް ސެންޓަރުގެ ނަމުގައި ސަރުކާރުގެ އިދާރާއެއް އުފައްދަވައިފިއެވެ.
ރައީސް އޮފީހުން ނެރުނު ބަޔާނެއްގައިވާ ގޮތުން، ރައީސް އެ އިދާރާ އުފެއްދެވީ ރާއްޖޭގެ ޖުމްހޫރިއްޔާގެ ގާނޫނުއަސާސީގެ 116 ވަނަ މާއްދާގެ (ހ) އިން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުންނެވެ.
އެ އިދާރާ ހިންގާނީ އިކޮނޮމިކް މިނިސްޓްރީގެ ދަށުން ކަމަށް ވެސް ބަޔާނުގައިވެއެވެ.
ރައީސް އޮފީހުން ބުނީ، ނޭޝަނަލް ޖޮބް ސެންޓަރު ގާއިމުކުރީ ރާއްޖޭގައި ވަޒީފާ ހޯދަން ބޭނުންވާ މީހުންނާއި ވަޒީފާދޭ ފަރާތްތައް ގުޅުވައިދިނުމަށާއި، މަސައްކަތްކުރާ އުމުރުފުރައިގެ މީހުންނަށް ކުރެވެންހުރި މަސައްކަތްތަކާއި، އަދާކުރެވިދާނެ ވަޒީފާތައް ޚިޔާރުކުރުމަށް ލަފަޔާއި އިރުޝާދު ދިނުމަށް ކަމަށެވެ.
ހަމައެއާއެކު، ވަޒީފާގެ ބާޒާރާ ގުޅުންހުރި ދިރާސާތައްކޮށް އެ ދިރާސާތަކުން ހޯދޭ މައުލޫމާތު ކަމާބެހޭ ފަރާތްތަކަށް ފޯރުކޮށްދިނުމަށާއި، ވަޒީފާއާ ގުޅުންހުރި ސިޔާސަތުތައް ދެމެހެއްޓެނިވި ގޮތެއްގައި ތަންފީޒު ކުރުމަކީ ވެސް އެ އިދާރާގެ މަގުސަދެއް ކަމަށް އެ އޮފީހުން ބުންޏެވެ.
މީގެ އިތުރުން، ޚާއްޞަ އެހީއަށް ބޭނުންވާ ފަރާތްތަކާއި އިޖުތިމާއީ ރައްކާތެރިކަން ބޭނުންވާ ފަރާތްތަކަށް އަދާކުރެވިދާނެ ވަޒީފާގެ ފުރުސަތުތަކުގެ މައުލޫމާތު ފޯރުކޮށްދީ، ވަޒީފާގެ ފުރުސަތުތައް ހޯދައިދިނުމުގައި އެހީތެރިކަން ފޯރުކޮށްދިނުމަކީ ވެސް ޖޮބް ސެންޓަރުގެ މަސައްކަތެއް ކަމަށް ރައީސް އޮފީހުގެ ބަޔާނުގައިވެއެވެ.
ޖޮބް ސެންޓަރު މިހާތަނަށް ހިންގަމުން އައީ އޮންލައިން ޕްލެޓްފޯމެއްގެ ގޮތުގައެވެ.