23 Feb 2023, 23:20
ކުނި މެނޭޖްކުރުމުގެ މަސައްކަތްތައް ބައްޓަން ކުރުމަށް ބޭނުންވާ އެންމެހާ މައުލޫމާތު އެއްކުރުމަށް ބެނުންކުރާނެ އޮންލައިން ޕޯޓަލް "ވެށިފާރަ" ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން އިފްތިތާހްކޮށްފިއެވެ.
ވެމްކޯގެ ހަތް ވަނަ އަހަރީ ދުވަސް ފާހަގަކުރަން އިއްޔެ ބޭއްވި ރަސްމިއްޔާތުގައި މި ޕޯޓަލް އިފްތިތާޙްކޮށްދެއްވީ ރައީސުލްޖުމްހޫރިއްޔާގެ ނައިބު ފައިސަލް ނަސީމް އެވެ.
ވެމްކޯއިން ބުނީ މި ޕޯޓަލްއަކީ އެ ކުންފުނީގެ ވޭސްޓް މެނޭޖްމަންޓް ސެންޓަރުތަކަށް ގެންނަ ކުނި ބަލައިގަތުމުގެ ކުރިން، އެކުނި ފޮނުވާ ފަރާތާއި ގެންދާ ފަރާތާއި ކުނީގެ މިންވަރު ދެނެގަތުމަށްޓަކައި ތައްޔާރުކޮށްފައިވާ ޕޯޓަލްއެއް ކަމަށެވެ.
އެގޮތުން ކުނީގެ ބާވަތްތައް ދެނެގަނެ، ދެމެހެއްޓެނިވި ގޮތަކަށް ކުނި މެނޭޖްކުރުމުގެ މަސައްކަތްތައް ބައްޓަން ކުރަން ބޭނުންވާ އެންމެހާ މައުލޫމާތު މި ޕޯޓަލް މެދުވެރިކޮށް އެއްކުރާނެ އެވެ. ވެމްކޯއިން ބުނާ ގޮތުގައި މި ޕޯޓަލްގެ ސަބަބުން ވޭސްޓް މެނޭޖްމަންޓް ސެންޓަރުތަކަށް ކުނި ގެންދާ ފަރާތްތަކުގެ މަސައްކަތްތައް ފަސޭހަވެ، އިތުރު ލުޔެއް ލިބިގެންދާނެއެވެ.
ވެމްކޯއިން އަންނަނީ މާލެ ސަރަޙައްދުގެ އިތުރަށް އަތޮޅުތެރޭގައިވެސް ކުނި ނެގުމުގެ ޚިދުމަތް ފޯރުކޮށްދެމުންނެވެ.