20 Feb 2023, 11:32
އެމްޑީޕީގެ ރައީސުލްޖުމްހޫރިއްޔާގެ ސަރުކާރުގެ ސިޔާސަތު، އެ ޕާޓީގެ ފިކުރާއި އަސާސްތަކާ އެއްގޮތަށް އަނބުރާލުމަށް ގޮވާލައި، ރައްޔިތުންގެ މަޖިލީހަށް ގަރާރެއް ހުށަހަޅައިފިއެވެ.
މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި އެ ގަރާރު ހުށަހެޅުއްވީ އުނގޫފާރު ދާއިރާގެ އެމްޑީޕީ މެމްބަރު މުޙައްމަދު ވަޙީދެވެ. އެ ގަރާރުގެ ފުރަތަމަ ކިޔުން މިއަދު ވަނީ އިއްވާފައެވެ. އެމްޑީޕީގެ ތެރޭގައި ދެ ފެކްޝަނެއް ވަނީ އުފެދިފައެވެ. އެގޮތުން ރައީސް ޞާލިހަށް ތާއީދު ކުރާ ފެކްޝަނަކާ މަޖިލީހުގެ ރައީސް އަދި އެމްޑީޕީގެ ރައީސް މުޙައްމަދު ނަޝީދަށް ތާއީދު ކުރާ ފެކްޝަނެއް ވަނީ އުފެދިފައެވެ.
އެމްޑީޕީގެތެރޭގައި ބައިބައިވުން އުފެދިފައިވާއިރު އެމްޑީޕީގެ އަމާޒަށް ސަރުކާރުގެ ސިޔާސަތު ބައްޓަން ކުރުމަށް ގޮވާލާ ގަރާރު ހުށަހެޅުއްވި މެމްބަރު ވަޙީދަކީ ރައީސް ނަޝީދު ފެކްޝަނަށް ތާއީދު ކުރައްވާ ބޭފުޅެކެވެ. އެއް ފެކްޝަން އަނެއް ފެކްޝަނަށް ބަހުގެ ހަމަލާތައް އަމާޒު ކުރަމުންދާއިރު މިއަދު ހުށަހެޅި އެ ގަރާރުގައި ވެސް ވަނީ މި ސަރުކާރަށް ފާޑުކިޔުންތައް އަމާޒު ކޮށްފައެވެ.
މެމްބަރު ހުށަހެޅުއްވި ގަރާރުގައި ބުނީ އެމްޑީޕީގެ އަސާސީ ގަވާއިދުގައި ކަނޑައަޅާފައިވަ އެމްޑީޕީގެ އަމާޒުތަކާ މަގްޞަދުތަކާ އުސޫލުތަކުގެ ތެރޭގައި، ރައްޔިތުންގެ ކަންކަން ނިންމުމާއި ހިންގުމުގެ ބާރު ރައްޔިތުންނަށް އޮންނަން ޖެހޭނެ ކަމަށް ކަނޑައަޅާފައި ވާނެ ކަމަށެވެ.
ވުމާއެކު ރައްޔިތުންގެ ކިބައިގައި އެ ބާރުވެރިކަން އޮތުމަށްޓަކައި ރައްޔިތުންގެ ޚިޔާލާއި، މަޝްވަރާއިން އެކުލަވާލާ، ވައުދުތަކެއްގެ ގޮތުގައި އިންތިޚާބުތަކަށް ނެރުނު ވޯޓު ހޯދާ ސިޔާސަތުތައް ރައީސުލްޖުމްހޫރިއްޔާގެ އިތުރުން އެހެން އިންތިޚާބީ އަދި ސިޔާސީ އޮފިޝަލުން ހިންގުމަކީ ވަރަށް އަސާސީ ކަމެއް ކަމަށް އެ ގަރާރުގައި ވެއެވެ.
އެ ގަރާރުގައި ބުނެފައި ވަނީ މި ސަރުކާރުގައި އެންމެ ބޮޑު ހިއްސާއެއް އޮތްބަޔަކީ އެމްޑީޕީ ނަމަވެސް ސަރުކާރުގެ ކަންކަން ބައްޓަން ވެފައިވަނީ އެ ޕާޓީގެ މެނިފެސްޓޯއާ ދިމާ އިދިކޮޅަށް ކަމަށެވެ.
"މި ޕާޓީގެ މެނިފެސްޓޯގައިވާ މައިގަނޑު ގިނަ ސިޔާސަތުތަކާއި މި ޕާޓީގެ ވިސްނުންތަކާ ސީދާ ކަނޑައެޅިގެން ގަސްދުގައި ދިމާއިދިކޮޅަށް އަދުގެ ސަރުކާރުގެ ސިޔާސަތުތައް ގެންގުޅޭ ކަމީ އެމްޑީޕީގެ މެމްބަރުންނާއި، ރާއްޖޭގެ ވަރަށް ގިނަ ރައްޔިތުން ނުހަނު ކަންބޮޑުވުމާއި ނުރުހުން އޮތް ކަމެއް،" ގަރާރުގައި ވެއެވެ.
އެގޮތުން އެ ޕާޓީގެ ވައުދުތަކުގެ ތެރޭގައި ހިމެނޭ ބޯހިޔާވަހިކަމުގެ ވައުދާއި، ފުދުންތެރިކަމާއި އާމްދަނީ މަތިކުރުމަށް އެ ޕާޓީން ވީ ވައުދުތަކުގެ ތެރެގައި ހިމެނޭ މަސްވެރިކަމާ ބެހޭ ވައުދުތަކާއި، ފަތުރުވެރިކަމާއި ގެސްޓްހައުސް ވިޔަފާރި ފުޅާ ކުރުމުގެ ވައުދުތައް ގަރާރުގައި ފާހަގަކޮށްފައިވެއެވެ. އަދި ރައްޔިތުންގެ އުފެއްދުންތެރިކަމާއި އާމްދަނީ މަތިކުރުމުގެ ވައުދުތަކާއި، ސަރުކާރުގެ ވިޔަފާރި ކުޑަކޮށް، އަމިއްލަ ވިޔަފާރިތައް ފުޅާކުރުމަށް އެ ޕާޓީން އެކަށައަޅާފައިވާ ސިޔާސަތުތަކާ އެއްގޮތަށް، ސަރުކާރުގެ ސިޔާސަތު އަނބުރާލައި، އެމްޑީޕީގެ އަމާޒަށް ސަރުކާރުގެ ސިޔާސަތު ބައްޓަން ކުރުމަށް ވެސް ގަރާރުގައި ގޮވާލާފައިވެއެވެ.