02 Mar 2023, 09:17
މައިކްރޮސޮފްޓްއިން ބިންގްގެ އާޓިފިޝަލް އިންޓެލިޖެންސް (އޭއައި) ޗެޓްބޮޓް ކޮންޓްރޯލް ކުރަން ފިޔަވަޅުތަކެއް އަޅައިފިއެވެ.
ސީއެންއެންއިން ރިޕޯޓްކޮށްފައިވާ ގޮތުގައި މައިކްރޮސޮފްޓުން އެ ކުންފުނީގެ ބިންގް އޭއައި ޗެޓްބޮޓް ކޮންޓްރޯލް ކުރެވޭނެ ގޮތްތަކެއް ހޯދީ އޭގެއިން ބައެއް ސުވާލުތަކަށް ގިނަ ބަޔަކު ކަންބޮޑުވާ ފަދަ ޖަވާބުތަކެއް ލިބުމާ ގުޅިގެންނެވެ.
ބިންގެ ޗެޓްބޮޓާ ބެހޭގޮތުން ސޯޝަލް މީޑިއާގައި ވައިރަލް ވަމުންދާ ބައެއް ވާހަކަތަކުން އެއް އެއްވާހަކައަކީ، ނިއު ޔޯކް ޓައިމްސްގެ ރިޕޯޓަރަކާ ޗެޓްބޮޓްއިން ދެއްކި ވާހަކައެވެ. އެގޮތުން އެ ރިޕޯޓަރު އޭނާގެ އަނބިމީހާ ދެކެ ލޯބިނުވާ ކަމަށް ވިސްނައިދޭން ޗެޓްބޮޓް މަސައްކަތް ކުރި ކަމަށް އެ ރިޕޯޓަރު ބުނެފައިވެއެވެ.
މީގެ އިތުރުން، ރެޑިޓްގައި ހިއްސާކޮށްފައިވާ އެހެން ވާހަކައަކުން ދައްކާ ގޮތުން ޗެޓްބޮޓް ވަނީ، 12 ފެބްރުއަރީ 2023 އަކީ 16 ޑިސެމްބަރު 2022އަށް ވުރެ ކުރިން އައި ތާރީޚެއް ކަމަށް ބުނެ މީހަކަށް އޮޅުވާލަން މަސައްކަތްކޮށްފައެވެ. އަދި މިހާރު ބިންގް ބޭނުން ކުރާ އޭއައި ޓެކްނޮލޮޖީ އުފެއްދި ކުންފުނި އޯޕަންއޭއައިގެ ސީއީއޯއާ އެ ޗެޓްބޮޓް ލޯބީގެ ގޮތުން ގުޅިގެން އުޅުމުގެ ވާހަކައެއް ވެސް އެ ބޮޓް ކިޔައިދީފައިވާ ކަމަށް ސޯޝަލް މީޑިއާގައި ދައުރުވާ ވާހަކަތަކުގައިވެއެވެ.
އެފަދަ ޕޯސްޓުތަކާ ގުޅިގެން މައިކްރޮސޮފްޓުން ބުނީ މިބާވަތުގެ ޖަވާބުތައް ގިނަ ކަސްޓަމަރުންނަށް ނުލިބޭނެ ކަމަށެވެ. އަދި އާންމުކޮށް އެފަދަ ޖަވާބު ލިބެނީ ގިނަ އިރުވަންދެން ސުވާލުކުރަމުން ދިޔުމުން ކަމަށެވެ.
އެހެންކަމުން މައިކްރޯސޮފްޓުން ގެނެސްފައިވާ ބަދަލަކީ، އެ ޗެޓްބޮޓްއާ ސުވާލު ކުރެވޭނެ މިންވަރު ލިމިޓް ކުރުމެވެ. އެގޮތުން ދުވާލަކަށް އެ ޗެޓްބޮޓްއާ ކުރެވޭނީ 50 ސުވާލު ކަމަށާއި، އެ ޗެޓްބޮޓްއާ ވާހަކަދައްކާ ކޮންމެ ސެޝަންއެއްގައި ކުރެވޭނީ ފަސް ސުވާލު ކަމަށް މައިކްރޯސޮފްޓްއިން ވަނީ ނިންމާފައެވެ.
މައިކްރޯސޮފްޓުގެ ބްލޮގްޕޯސްޓެއްގައިވާ ގޮތުން، މި ޗެޓްބޮޓްއަކީ މިހާތަނަށް ތައާރަފުކޮށްފައިވާ އޭއައި ޗެޓްބޮޓްތަކާ އަޅާބަލާއިރު ޔޫޒާ އެކްސްޕީރިއަންސް ވަރަށް ތަފާތު އުފެއްދުމެކެވެ. އަދި މިކަހަލަ އުފެއްދުމެއް ރަނގަޅު ކުރެވޭނެ މި ޗެޓްބޮޓް ބޭނުންކުރާ މިންވަރު އިތުރުކޮށްގެން ކަމަށް އެ ކުންފުނިން ބުންޏެވެ.
މައިކްރޮސޮފްޓާއި ގޫގުލް އާއި އެހެނިހެން ޓެކް ކުންފުނިތަކުން ވެސް މިހާރު ދަނީ އެ މީހުންގެ ސާޗް އިންޖީނާއި އެހެނިހެން ޕްރޮޑަކްޓްތަކުގައި، އޭއައިއިން ހިންގާ ޗެޓްބޮޓްތައް ހިމެނުމުގެ މަސައްކަތް ކުރަމުންނެވެ. ނަމަވެސް އެފަދަ ޗެޓްބޮޓްތަކުގެ ޖަވާބުތަކާއި ވާހަކަ ދައްކާ ގޮތާ މެދު ބައެއް މީހުން އަދިވެސް ކަންބޮޑުވުން ފާޅުކުރެއެވެ.