14 Feb 2023, 21:23
ފާއިތުވި ޖެނުއަރީ މަހު، ޗައިނާގެ ބޯޑަރު ހުޅުވާލުމާއެކު 14 ދުވަހުގެ ތެރޭގައި ޗައިނާއިން 4،439 ފަތުރުވެރިން އައިސްފައިވާ ކަމަށް އިމިގްރޭޝަނުން ބުނެފިއެެވެ.
އިމިގްރޭޝަނުން އާންމުކޮށްފައިވާ ތަފާސްހިސާބުތައް ދައްކާގޮތުން ޖެނުއަރީ މަހުގެ 18 ވަނަ ދުވަހުން 31 ވަނަ ދުވަހަށް ޗައިނާއިން 4،439 ފަތުރުވެރިން ވަނީ އައިސްފައެވެ.
ޗައިނާއިން އެ އަދަދަށް ފަތުވެރިން އައިސްފައިވާއިރު ފާއިތުވި މަހު އެންމެ ގިނައިން ރާއްޖެ އައިސްފައިވަނީ ރަޝިޔާއިންނެވެ. އިިމިގްރޭޝަނުން އާންމުކުރި ތަފާސްހިސާބުތައް ދައްކާގޮތުން ފާއިތުވި މަހު އައިސްފައިވަނީ 172،499 ފަތުރުވެރިންނެވެ.
އެއީ ފާއިތުވި އަހަރުގެ ޖެނުއަރީ މަހާ އަޅާބަލާއިރު 30.9 އިންސައްތަ އިތުރު އަދަދެކެވެ. މިދިޔަ މަހު އައި 172،499 ފަތުރުވެރިންގެ ތެރެއިން 23،180 ފަތުރުވެރިން އައިސްފައިވަނީ ރަޝިޔާއިންނެވެ.
ދެވަނައަށް އެންމެ ގިނަ ފަތުރުވެރިން އައިސްފައިވަނީ އިންޑިއާއިންނެވެ. އެ ގައުމުން 18،612 ފަތުރުވެރިން މިދިޔަ މަހު އައިސްފައިވެއެވެ. އިޓަލީއިން 16،931 އައިސްފައިވާއިރު އިނގިރޭސިވިލާތުން 14،666 ފަތުރުވެރިން އައިސްފައިވެއެވެ.
އިމިގްރޭޝަންގެ ތަފާސްހިސާބުތައް ދައްކާގޮތުން މިދިޔަ މަހު ދުވާލެއްގެ މައްޗަށް އެވްރެޖްކޮށް އައިސްފައިވަނީ 5،564 ފަތުރުވެރިންނެވެ.
މިއަހަރުގެ މިހާތަނަށް ރާއްޖެ އައި ފަތުރުވެރިންގެ އަދަދު ވަނީ ދެ ލައްކައަށް އަރާފައެވެ. އެގޮތުން މިދިޔަ ބުދަ ދުވަހާ ހަމައަށް ރާއްޖެއަށް 220,574 ފަތުރުވެރިން ވަނީ ޒިޔާރަތްކޮށްފައެވެ.
ކޮވިޑްގެ ކުރިން، 2019 ވަނަ އަހަރު ރާއްޖެއަށް ޖުމްލަ 1.70 މިލިއަން ފަތުރުވެރިން ޒިޔާރަތްކުރިއިރު މިދިޔަ އަހަރު ސަރުކާރުން އަމާޒު ހިފީ 1.6 މިލިއަން ފަތުރުވެރިން ގެނައުމަށެވެ. އެ އަމާޒަށް ވާސިލުވެ، މިދިޔަ އަހަރު ރާއްޖެ އައި ފަތުރުވެރިންގެ އަދަދު 1.68 މިލިއަނަށް އެރިއެވެ.
މި މަހުގެ ހަވަނަ ދުވަހު ރިޔާސީ ބަޔާން އިއްވަވަމުން ރައީސް އިބްރާހީމް މުޙައްމަދު ޞާލިޙު ވިދާޅުވީ، މިއަހަރަށް ސަރުކާރުގެ އަމާޒަކީ 1.8 މިލިއަން ފަތުރުވެރިން ރާއްޖެ ގެނައުން ކަމަށެވެ.