13 Feb 2023, 08:52
މީގެ ކުރިން ހިނގި އެކްސިޑެންޓެކެވެ. އެ މުވައްޒަފު ދިޔައީ ހުޅުމާލެއިން ހުޅުލެއަށް ޑިއުޓީއަށެވެ. އަވަހަށް ޑިއުޓީއަށް ދިއުމަށް އޭނާ ބޭނުންވީ މަގު ކުރުކޮށްލާށެވެ. ޕެޓްރޯލް ހަރަދާއި ވަގުތު ސަލާމަތް ކުރުމުގެ ގޮތުންނެވެ. އެހެންކަމުން ގަވައިދާ ހިލާފަށް ހައިވޭގެ އެއް ފަޅިން އަނެއް ފަޅިއަށް ދިއުމަށް ސައިކަލުގައި އޭނާ މިސްރާބު ޖެހިއެވެ. އެއާއެކު ދެން ކުރިމަތިވީ މާ ނުރައްކާތެރި ކަމެކެވެ. ހުޅުމާލެއިން މާލެއާ ވީކޮޅަށް ބާރު ސުޕީޑްގައި ދުއްވާފައި ދިޔަ ކާރެއްގެ ދަށުވީއެވެ. ސައިކަލް ދުއްވަންއިން މީހާގެ އެތައްތަނެއް ބިނދި، ދެ ވެހިކަލަށް ވެސް ބޮޑެތި ގެއްލުންތަކެއްވީއެވެ.
އެ ނުރައްކާތެރި އެކްސިޑެންޓްގައި ހުޅުލޭގައި މަސައްކަތް ކުރާ އެ މުވައްޒަފުގެ ބޮލަށާއި އަތާއި ފައިގެ އިތުރުން މައިބަދައަށް ވެސް ބޮޑެތި ގެއްލުންތަކެއް ލިބުނެވެ. އޭނާގެ ހާލު އަދިވެސް ރަނގަޅެއް ނުވެއެވެ.
ގަވާއިދު އޮންނަ ގޮތުން ހައިވޭގެ މެދެއްހާ ހިސާބުގައި ހުޅުލޭގެ މުވައްޒަފުންނަށް ހާއްސަކޮށްގެން ހަދާފައިވާ ޕާކިން ޒޯންގައި ޕާކް ކުރުމަށް ހުޅުމާލެއިން ދާ މީހުން ދާން ޖެހެނީ ހައިވޭގެ ކޮޅަށް ގޮސް، ބްރިޖާ ގުޅޭ ޓްރެފިކް ލައިޓް ކައިރިން ހުޅުލެއަށް ވަދެ ޕޮލިސް ޕޯސްޓް ކައިރިން ވަށާލައިގެން އަނެއްކާވެސް ހައިވޭއިން ދުއްވާފައި ގޮހެވެ. އެއީ ދިގު ދަތުރެކެވެ. އަދި އެ ޕާކިން ޒޯނުން ނައްޓާލައިގެން މާލެ އަންނަން ގަވާއިދު އޮންނަ ގޮތުން ދާން ޖެހެނީ ފުރަތަމަ ހުޅުމާލެއަށެވެ. އެއަށް ފަހު ހުޅުމާލޭ ކޮޅުން ހައިވޭއަށް އަރައިގެން މާލެ ދާގޮތަށެވެ. އެއީ ވެސް ދިގު ދަތުރެކެވެ. އެހެންކަމުން އެ ދަތުރު ކުރުކުރުމަށް ހުޅުލޭގައި މަސައްކަތް ކުރާ މުވައްޒަފުން މި ކުރިމަތިލަނީ ނުރައްކަލަކާއެވެ.
ރަތް ކުލައިން ފާހަގަ ކޮށްފައި އެވަނީ ގަވާއިދާ ހިލާފަށް ހައިވޭ ހުރަސް ކުރާ ސަރަހައްދު--
ހައިވޭ ކަފި ވެފައިވާ ހިސާބުގެ މެދުގައި އޮންނަ ހުސް ޖާގައިގައި މިހާރު ދަނީ ސޯލާ ޕެނަލް ހަރުކުރުމުގެ މަސައްކަތް ކުރަމުންނެވެ. އެ ހުސް ޖާގަ ދެ ކޮޅުން ވެސް ނިމޭ ހިސާބުގައި ހައިވޭގެ އެއް ފަޅިން އަނެއް ފަޅިއަށް ސައިކަލްގައި ދެވޭ ވަރުގެ ޖާގައެއް އޮވެއެވެ. އެހެންކަމުން އެއީ ގަވައިދާ ހިލާފަށް ހައިވޭގެ އެއް ފަޅިން އަނެއް ފަޅިއަށް ދިއުމަށް މީހުން ބޭނުންކުރާ ސަރަހައްދެވެ.
"އެމްއޭސީއެލްގެ އިލެކްޓްރިކް، އޭސީ، މެކޭނިކަލް، އަދި އެއާ ޓެކްސީ ފަޅީގެ މުވައްޒަފުން ހައިވޭގެ އެއް ފަރާތުގައި ހުންނަ ޕާކިން ޒޯނަށް ވަންނަން ޝޯޓްކަޓް ނެގުމަށް އެތަނުން ވަންނަނީ. ބައެއް ފަހަރު ސޯލާ ޕެނަލް އެ ހަރުކުރާ ހިސާބުގެ ވިނަގަނޑު މަތިން ވެސް ވަދޭ. އެއީ އާއްމު ކަމެއް. ކުރިން ވެސް އެތަނުގައި ހުރި ބަންދު ކުރަން އެއްޗެހިތަކެއް ބަހައްޓާފައި. އެކަމަކު އެއީ އަތުން ދުރަށް ޖެއްސޭހާ ލުއި އެއްޗެއް. އެހެންވެ މީހުން އެތަނުން ވަދެ ހައިވޭ ހުރަސް ކުރޭ،" އެމްއޭސީއެލްގެ މުވައްޒަފަކު ނަން ނުޖަހަން ޝަރުތުކޮށް ކިޔައިދިނެވެ.
ހުޅުލޭގައި މަސައްކަތް ކުރާ ބައެއް މުވައްޒަފުން ބުނިގޮތުގައި އެގޮތަށް ޝޯޓްކަޓް ނެގުމުގެ ތެރެއިން މީގެ ކުރިން ވެސް އެކްސިޑެންޓްތައް ހިނގާފައި އެބަހުއްޓެވެ. އަދި މިފަހުން މިވަނީ އެފަދަ ވަރަށް ނުރައްކާތެރި އެކްސިޑެންޓެއް ހިނގައިފައެވެ. އޭގެ ފަހުން މަގު ކުރުކުރަން އެ ސަރަހައްދަށް ނުވަދެވޭ ގޮތަށް ދަގަނޑު ޖަހައި ވަނީ ބަންދުކޮށްފައެވެ. ނަމަވެސް އަދިވެސް ވިނަގަނޑު މަތިން ދެވެން އެބައޮތެވެ. އެއީ ވެސް މީހުން ކުރާ ކަމެކެވެ.
ފުރަގަމުން އެ ފެންނަ ހުސް ސަރަހައްދުން ގަވާއިދާ ހިލާފަށް ހައިވޭ ހުރަސް ކުރަން އުޅުމުގެ ތެރެއިން ނުރައްކާތެރި އެކްސިޑެންޓް ހިނގާ-- ފޮޓޯ: މާއިލް އާތިފް
"އަސްލު މީހުން އެކަން ކުރަނީ ނުރައްކަލަށް ބަލާ ނުލާ. ވިސްނާ ސައިކަލް ލޭނުން ގޮސް ކާރު ލޭނަށް އަރައި ހައިވޭގެ އަނެއް ފަޅިއަށް ދިއުމަކީ ކިހާ ނުރައްކާތެރި ކަމެއްކަން. ކާރު ލޭނުން ވެސް ނުލާހިކު ބާރަށް އެއްޗެހި ދުއްވާފައި އެ އަންނަނީ. އެކަމަކު މި ކިތަންމެ ނުރައްކަލަސް ވަރަށް އާއްމު ކަމެއް،" އެމްއޭސީއެލްގެ އެހެން މުވައްޒަފަކު ބުންޏެވެ.
އެމްއޭސީއެލްގެ ސަމާލު ކަމަށް އައިސްފައިވާ ކަމެއް!
ރާއްޖޭގައި އަބަދުވެސް ކަންވާ ގޮތަކީ ގަވާއިދާ ހިލާފަށް ކަމެއް ހިނގިޔަސް އެކަން ހުއްޓުވުމަށް ކުރިއާލާ ފިޔަވަޅުތަކެއް ނޭޅެއެވެ. އަބަދުވެސް ގަވާއިދު ތަންފީޒު ކުރަން ތެޅިގަނެވެނީ މީހެއްގެ ފުރާނައަށް ނުރައްކާ ވުމުން ނުވަތަ ފުރާނަ ގެއްލުމުންނެވެ. މިކަމުގައި ވެސް ކަންވަނީ އެގޮތަށެވެ. އެ ހިސާބުން މަގު ހުރަސް ނުކުރެވޭ ގޮތަށް މި ބަންދު ކުރީ ވަރަށް ނުރައްކާތެރި ހާދިސާއެއް ހިނގުމުންނެވެ.
އެމްއޭސީއެލްގެ ކޮމިއުނިކޭޝަންސް މެނޭޖާ ޝަމްއާން ޝާކިރު ވިދާޅުވީ މަގު ކުރުކުރުމަށް އެމްއޭސީއެލްގެ މުވައްޒަފުންނާއި ހުޅުލޭގައި މަސައްކަތް ކުރާ އެހެން މުވައްޒަފުން ވެސް ހައިވޭގެ މެދުން ގަވައިދާ ހިލާފަށް މަގު ހުރަސް ކުރާކަން އެ ކުންފުންޏަށް ވެސް ވަނީ ފާހަގަކުރެވިފައެވެ. އެހެންކަމުން އެކަން ނުކުރުމަށް އެކުންފުނިން މުވައްޒަފުންނަށް މީގެ ކުރިން ވެސް އަންގާފައިވާނެ ކަމަށް އޭނާ ވިދާޅުވިއެވެ.
"އެކަން ކުރާތަން އަޅުގަނޑުމެންނަށް ވެސް ފެނޭ ހަމަ. އެހެންވެ [ކުންފުނީގެ] ސޭފްޓީ ސައިޑުން ވެސް އެކަން ނުކުރަން އަންގާފައިވަނީ. އެހެން އަންގާފައި ވަނިކޮށް މުވައްޒަފުން އެކަން އެކުރަނީ ގާނޫނާ ހިލާފަށް،" ޝަމްއާން ވިދާޅުވިއެވެ.
އެމްއޭސީއެލްއިން އެކަން ނުކުރުމަށް އަންގާފައި އޮތް ނަމަވެސް މުވައްޒަފުން ދިޔައީ ކުރަމުންނެވެ. ނަމަވެސް އެންމެ އެކަށީގެންވާ ފިޔަވަޅު ތަންފީޒީ އިދާރާތަކުން ވެސް އޮތީ ނޭޅިއެވެ.
ހުޅުމާލެ ހައިވޭގައި ހިނގި ނުރައްކާތެރި އެކްސިޑެންޓްގައި ކާރަށް ގެއްލުންވެފައި --- ސަން ފޮޓޯ/ މާއިލް އާތިފްމި މައްސަލައާ ގުޅޭގޮތުން ފުލުހުންގެ ރަސްމީ ބަހެއް އަދި ވަނީ ލިބޭގޮތް ނުވެފައެވެ.
މުވައްޒަފުންގެ ދިގު ދަތުރަށް ހައްލެއް ބޭނުންވޭ
ހުޅުމާލެއިން ހުޅުލެއަށް ދިއުމަށް ކުރިން ދިޔައީ ވަގުތީ މަގެއް ބޭނުން ކުރަމުންނެވެ. އެ މަގު އޮންނަނީ ހުޅުމާލޭ ކޮޅުން ހައިވޭ ފެށޭ ހިސާބުގައެވެ. ނަމަވެސް ސީ ޕްލޭން ޖެއްސުމަށް އެ ސަރަހައްދު ބޮޑު ކުރަން އެ މަގު ހިމެނޭ ސަރަހައްދު ކޮނެ، ވަނީ މޫދުގެ ބަޔަކަށް ހަދައިފައެވެ.
ހުޅުމާލެއިން ހުޅުލޭގެ ސީޕްލޭނާއި ސަޕޯޓް ސްޓާފުން ބޭނުން ކުރާ ފަޅިއަށް ދިއުމަށް ހަގީގަތުގައި ވެސް ކުރަން ޖެހެނީ ވަރަށް ދިގު ދަތުރެކެވެ. އަދި އެ ޕާކިން ޒޯނުން މާލެ އައުމަށް ވެސް ކުރަން ޖެހޭ ދަތުރު ވަރަށް ދިގެވެ. ވަގުތާއި ޕެޓްރޯލްގެ ހަރަދު ސަލާމަތް ކުރުމަށް ވެސް އެކަމަށް ހައްލު ބޭނުންވާ ކަމަށް ގިނަ މުވައްޒަފުން ބުނެއެވެ.
އެމްއޭސީއެލްގެ އިސް މުވައްޒަފަކު ވިދާޅުވިގޮތުގައި އެ މައްސަލަ ހައްލު ކުރުމަށް އެ ސަރަހައްދުން ހައިވޭ ހުރަސް ކުރެވޭ ގޮތަށް ޓްރެފިކް ލައިޓް ބެހެއްޓުން ނުވަތަ މަތިން ބްރިޖެއް އެޅުން ފަދަ ކަމެއް ކުރުމަށް މީގެ ކުރިން ވާހަކަ ދެކެވުނެވެ. ނަމަވެސް އެކަން ނުވެ އޮތީ ބޮޑު ހަރަދެއް ހިނގާތީ ކަމަށް އަޑުއިވިފައިވާ ކަމަށް އޭނާ ވިދާޅުވިއެވެ.
"އަސްލު ފުރަތަމަ މަގު ހަދާއިރު ޕްލޭނިން މަރުހަލާގައި އެކަން އޮންނަން ޖެހޭނީ. ފަހުން އެ ބަދަލު ގެންނަންޏާ ބޮޑު ހޭދައެއް އެ ދަނީ. އެހެންވެ ކަމަށް އަޑުއެހީ ނުވެ އޮތީ،" އެ މުވައްޒަފު ވިދާޅުވިއެވެ.
އެއާޕޯޓްގައި މަސައްކަތް ކުރާ މުވައްޒަފުންގެ ކަންބޮޑުވުމާ ގުޅޭގޮތުން ޕްލޭނިން މިނިސްޓްރީއާއި ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގެ ބަހެއް ވަނީ ލިބޭގޮތް ނުވެފައެވެ.
މަރަކަށް ފަހު މަރެކެވެ. ބްރިޖާ ގުޅިފައިވާ އެކްސިޑެންޓްތައް ވަރަށް ނުރައްކާތެރިއެވެ. ބްރިޖުގައި މި ފަހުން ވެސް ހިނގި އެކްސިޑެންޓެއްގައި މަރުވި މީހާ ސައިކަލް ދުއްވާފައި ދިޔައީ ޓްރެފިކް ލައިޓް ރަތްވެފައި ވަނިކޮށެވެ. އަދި އަޅައިގެން އިން ހެލްމެޓް އޮތީ ދަތްދޮޅިން ހަރުނުކޮށެވެ. ހަމައެއަށް ފަހު މިވަނީ ގަވާއިދާ ހިލާފަށް ހައިވޭގެ އެއް ފަޅިން އަނެއް ފަޅިއަށް އަރަން އުޅުމުގެ ތެރެއިން ނުރައްކާތެރި އެކްސިޑެންޓެއް ހިނގައިފައެވެ. މި އެކްސިޑެންޓްތަކަށް ބަލާއިރު ފަރުވާ ކުޑަކުރުމާއި ގަވާއިދާ ހިލާފުވާކަން ފާހަގަ ކުރެވެއެވެ. އެހެންކަމުން ފުރާނަތައް ސަލާމަތް ކުރުމަށް ވެސް އަވަސް ފިޔަވަޅުތަކެއް އަޅަން ޖެހެއެވެ.