08 Feb 2023, 17:26
ސައިކަލް މަޑިދަށުން ޑުރަގް ފެނުނެ މައްސަލައިގައި ކްރިމިނަލް ކޯޓުން ކުށް ސާބިތުނުވެ މިނިވަންވި މީހާ ކުށްވެރިވާކަމަށް ހައި ކޯޓުން ކަނޑައަޅައި އޭނާ އުމުރަށް ޖަލަށް ލުމަށް މިއަދު ހުކުމް ކޮށްފިއެވެ.
އެ މައްސަލައާ ގުޅިގެން ކެނެބިސް ޓްރެފިކްކުރި ކަމުގެ ދައުވާ އުފުލާފައިވަނީ މއ. ރުތު, އައިހަމް މުހައްމަދުގެ މައްޗަށެވެ.
އެ ހާދިސާ ހިނގާފައިވަނީ 2018 ވަނަ އަހަރުގެ ޖެނުއަރީ 19 ވަނަ ދުވަހުއެވެ. އިތުރު މީހަކާ އެކު އައިހަމް ހުޅުމާލެ ފެރީއަށް ސައިކަލް އަރުވައިގެން މާލެ އައުމުން ފުލުހުން ވަނީ އޭނާ ހުއްޓުވައި ޗެކްކޮށްފައެވެ.
އެގޮތުން އައިހަމް ދުއްވަން އިން ސައިކަލުގެ މަޑި ދަށުން 248 ގްރާމް މަސްތުވާތަކެތި ފެނިފައިވާ ކަމަށް ފުލުހުން ވަނީ ބުނެފައެވެ.
ނަމަވެސް ދައުލަތުން އެކަށީގެންވާ ހެކި ހުށަހަޅާފައި ނެތް ކަމަށް ބުނެ ކްރިމިނަލް ކޯޓުން ވަނީ އައިހަމަށް ކުށް ސާބިތުނުވާ ކަމަށް ހުކުމް ކޮށްފައެވެ.
އެ މައްސަލަ ދައުލަތުން ހައި ކޯޓުގައި އިސްތިއުނާފު ކުރުމުން މިއަދު ހުކުމް ކޮށްފައިވަނީ އައިހަމްއަށް ކުށް ސާބިތުވާ ކަމަށެވެ. އެގޮތުން އުމުރަށް ޖަލަށް ލުމުގެ އިތުރުން އެއްލައްކަ ރުފިޔާއިން އޭނާ ޖޫރިމަނާ ކުރުމަށް ވެސް ވަނީ ނިންމާފައެވެ.
ހައި ކޯޓުގެ ހުކުމުގައި ބުނެފައިވަނީ މަޑި ދަށުން ފެނުނު މަސްތުވާތަކެއްޗަކީ އޭނާގެ އެއްޗެއް ނޫން ކަމަށް އައިހަމް ބުނި ނަމަވެސް އެ ސައިކަލް ހުޅުމާލެ ފެރީއަށް އަރުވައި އެ ފެރީން ބާލާފައިވަނީ ވެސް އޭނޭ ކަމަށެވެ. އަދި ފެރީގައި ހޭދަވި 20 ނުވަތަ 30 މިނެޓް ތެރޭގައި މަޑިދަށަށް އެހެން މީހަކަށް އެތަކެތި ލުމަކީ ނާދިރު ކަމެއް ކަމަށް ވެސް ހުކުމުގައި ވަނީ ބުނެފައެވެ. ސަބަބެއް ކަމަށް ބުނެފައިވަނީ ފެނުނު މަސްތުވާތަކެތި ހުރީ މަޑި ދަށުގައި އޮތް ހެލްމެޓެއް ދަށުގައި ކަމަށް ވުމެވެ.
"މަސްތުވާތަކެތި ފެނިފައިވަނީ އައިހަމް މުހައްމަދުގެ ހިޔާޒަތުންކަން އެނގޭކަމަށާއި މި ހާލަތުގައި އެ ފެނުނު މަސްތުވާތަކެތީގެ މުތުލަގު މަސްއޫލިއްޔަތު އައިހަމް މުހައްމަދު އުފުލަންޖެހޭ ކަމަށް ސުޕްރީމް ކޯޓުގެ ނިންމުންތަކުގެ އަލީގައި ދެކެން," ހައި ކޯޓުގެ ހުކުމުގައި ބުނެފައިވެއެވެ.
އެ މައްސަލަ ބެއްލެވި ފަނޑިޔާރުންގެ ބެންޗުގައި ތިއްބެވީ ފަނޑިޔާރު ހުސައިން މާޒިދު އާއި ފަނޑިޔާރު ހުޒައިފާ މުހައްމަދުގެ އިތުރުން ފަނޑިޔާރު ދީބާނާޒް ފަހުމީއެވެ. ރިޔާސަތުގައި އިންނެވި ފަނޑިޔާރު ހުސައިން މާޒިދުގެ ރައުޔަށް ދެން ތިއްބެވި ދެ ފަނޑިޔާރުން ވެސް ވަނީ ތާއިދުކުރައްވާފައެވެ.