08 Feb 2023, 17:14
އެމެރިކާއަށް ބިރު ދެއްކުމުގެ ފުރުސަތު ޗައިނާއަށް ނުދޭނެކަމަށް ވިދާޅުވެ އެމެރިކާގެ ރައީސް ޖޯ ބައިޑެން، އެމެރިކާގެ ސްޓޭޓް އޮފް ދި ޔުނިޔަން ތަގްރީރުގައި ޗައިނާއަށް ވަރަށް ބޮޑަށް ގޮން ޖައްސަވައި ވާހަކަ ދައްކަވައިފިއެވެ.
އެމެރިކާގެ ކޮންގްރެސްގެ ދެގޭގެ މެންބަރުންގެ ގުޅިފައިވާ ޖަލްސާއެއްގައި ވާހަކަދައްކަވަމުން ބައިޑެން ވިދާޅުވީ އެމެރިކާއަކީ އަދިވެސް ދުނިޔޭގެ ސުޕަޕަވަރު ކަމަށާއި އެމެރިކާއަށް ބިރުދެއްކޭނެ ކަމަށް ޗައިނާ ހީކުރާނަމަ އެއީ ކުށްހީއެއްކަމުގައެވެ.
ބައިޑެން ދެއްވި ސްޓޭޓް އޮފް ދި ޔުނިޔަން ތަގްރީރު ބިނާކުރައްވާފައިވަނީ އެމެރިކާއަކީ ދުނިޔޭގެ ހަމައެކަނި ބޮޑުބާރުކަން ހާމަކުރުމާއި ދުނިޔޭގެ ޖިއޮޕޮލިޓިކަލް މަސްރަހުގައި ދުނިޔޭގެ މުސްތަގްބަލާބެހޭކަންކަން އެހެން ގައުމަކާ ހިއްސާކުރަން އެެމެރިކާއަށް ނުޖެހޭކަމުގެ މައްޗަށެވެ. އަދި ދުނިޔޭގެ އެހެން ގައުމުތަކަށް އޮތީ އެމެރިކާ ބުނާއެއްޗެއް އަޑުއަހައި އެއާ އެއްގޮތަށް އަމަލުކުރުންކަން ދޭހަވާގޮތުގެ މައްޗަށެވެ.
ބައިޑެން ވިދާޅުވިގޮތުގައި އެމެރިކާގެ ބާރާއި އާރު އެއްވެސް ގައުމަކުން ގޯސްގޮތަކަށް ވަޒަންކޮށްގެން ނުވާނެއެވެ. އަދި އެއްވެސް ގައުމަކުން އެމެރިކާގެ ބާރާއި އާރު އަންޑާ އެސްޓިމޭޓްކޮށްގެންނުވާނެއެވެ.
"އަހަރެމެންގެ ބާރު އެއްވެސް ފަރާތަކުން އަންޑާ އެސްޓިމޭޓްކޮށްގެން ނުވާނެ، އެމެރިކާގެ އާރާއި ބާރު ހުރިމިންވަރު މިދިޔަ ހަފުތާގައިވެސް ދުނިޔެއަށްވާނީ ފެނިގެން ގޮސްފައި، އެމެރިކާއަށް ބިރުދައްކަން ޗައިނާ އުޅެފިނަމަ އެމެރިކާގެ ދިފާއުގައި އެމެރިކާ ތެދުވިގޮތް މިދިޔަ ހަފުތާގައި ދުނިޔެއަށްވާނީ ވަރަށް ރަނގަނޅަށް ފެނިގެން ގޮސްފައި،" ބައިޑެން ވިދާޅުވިއެވެ.
މިއީ އެމެރިކާގެ މަތިން އުދުހުނު "މޫސޫމާބެހޭ ދިރާސާތައްކުރާ" ޗައިނާގެ ފުއްޕާހަމެއް ވައްޓާލުމަށް އެމެރިކާ ހިންގި އަސްކަރީ ވަރުގަދަ އޮޕަރޭޝަނަށް އިޝާރާތް ކުރައްވައި ވިދާޅުވި ވާހަކައެއްކަމަށްވަނީ ބެލެވިފައެވެ.
ބައިޑެން ދެއްވި ސްޓޭޓް އޮފް ދި ޔުނިޔަން ތަގްރީރުގެ ބޮޑުބައި އަމާޒުކުރެއްވީ ޗައިނާއަށެވެ. މިގޮތުން އެމެރިކާ މިއަދު އޮތީ އެމެރިކާގެ އާރާއި ބާރާ އަދި ނުފޫޒަށް ގޮންޖަހާ ކޮންމެ ގައުމަކާކުރިމަތިލުމުގައި ކުރިން އޮތް ހާލަތަށްވުރެ މާގަދަފަދަ ގޮތެއްގައިކަމަށް ބައިޑެން ވިދާޅުވިއެވެ.
މިމޭރުމުން ވާހަކަދައްކަވަމުން އެމެރިކާގެ ސިޔާސީ އެންމެބޮޑު ދެޕާޓީ ކަމަށްވާ މިހާރު ވެރިކަމުގައި އޮތް ޑިމޮކްރެޓިކް ޕާޓީއާއި އިދިކޮޅުގައި އޮތް ރިޕަބްލިކަން ޕާޓީގެ މެދުގައި ގައުމަށް ގެއްލުންވާފަދަ އަރާރުންތަކާ ދެބަސްވުންތައް ނެތްކަމަށާއި އޮތީ ސިޔާސީ ވާދަވެރިކަން އެކަނިކަމަށް ބައިޑެން ވިދާޅުވިއެވެ. ޑިމޮކްރެޓިކް ޕާޓީއާއި ރިޕަބްލިކަން ޕާޓީގެ މެދުގައި އޮންނަ އަރާރުންތަކުގެ ސަބަބުން ޗައިނާއާ ކުރިމަތިލުމުގެ ގާބިލްކަން އެމެރިކާގެ ކިބާގައި ކުޑަވެފައިވާ ކަމަށް ކުރެވޭ ތުހުމަތުތަކަކީ ހަގީގަތެއް ނޫންކަމަށްވެސް ބައިޑެން ވިދާޅުވިއެވެ.
ނަމަވެސް ބައިޑެންގެ ތަގްރީރުގައި އެމެރިކާގެ އެންމެ ބޮޑު ވާދަވެރިއަކީ ޗައިނާކަމަށް އެއްބަސްވެ ވަޑައިގެންނެވިއެވެ. އަދި ޗައިނާއާ އެއްވެސް ބާވަތެއްގެ ކުރިމަތިލުމަކަށް ދާން އެމެރިކާ ބޭނުންނުވާކަމަށް ވިދާޅުވިއެވެ.
ބައިޑެން ދެއްވި ސްޓޭޓް އޮފް ދި ޔުނިޔަން ތަގްރީރުގައި ހުޅަނގުގެ ސިޔާސީ ފަލްސަފާގެ މައްޗަށް ބިނާކޮށްފައިވާ ހުޅަނގުގެ ޑިމޮކްރަސީ ވަރުގަދަކަމާއި އެއާ އެއްވަރުގެ އެހެން ފިކުރެއްނެތްކަން ބަޔާންކުރެއްވިއެވެ. އަދި އެމެރިކާގެ ޑިމިކްރަސީއަކީ ބަލިކޮށްލެވޭނެ އެއްޗެއް ނޫންކަމަށް ފާޅުގައި ވިދާޅުވިއެވެ.
ބައިޑެން، އެމެރިކާގެ އާރާއި ބާރާއި ނުފޫޒުގެ މައްޗަށް ބިނާކުރައްވައި އެމެރިކާގެ ސްޓޭޓް އޮފް ދި ޔުނިޔަން ތަގްރީރު ދެއްވި ނަމަވެސް މީގެ 30 ވަރަކަށް އަހަރު ކުރިއާ އަޅާބަލާއިރު އެމެރިކާގެ އާރާއި ބާރާއި ނުފޫޒު ބައިނަލްއަގްވާމީ މަސްރަހުގައި މިހާރުވަނީ ވަރަށް ބޮޑަށް ކުޑަވެފައެވެ.
ކުރިން ޗައިނާއާ ތައިވާން އާ ދެމެދު އޮންނަ ކަނޑުއޮޅީގައި ހިތުހުރި ގޮތަކަށް އެމެރިކާގެ މަނަވަރުތައް ދުއްވައި ޗައިނާއަށް ޖެއްސުންކޮށް ހެދިނަމަވެސް މިހާރު އެކަންކުރަން އެމެރިކާއަކަށް ނުކެރެއެވެ. އަދި އަފްޣާނިސްތާނުން އެމެރިކާ ވަނީ ހިތްދަތިގޮތަކަށް ފައިބަންޖެހިފައެވެ. ޔުކްރެއިން ހަނގުރާމައާ ގުޅިގެން ރަޝިއާ އިގްތިސާދީ ގޮތުން އިނދަޖައްސާލުމަށް އެމެރިކާ ކުރި ހުރިހާ މަސައްކަތެއްވެސް ވަނީ ނާކާމިޔާބުވެފައެވެ.
އދ. ގެ ސަލާމަތީ މަޖިލީހަށް ބަލާއިރު އެމަޖިލީހުގައި މީގެ 30 އަހަރުކުރިން ފެށިގެން އޮތް އެމެރިކާގެ ކޮންޓްރޯލް މިހާރުވަނީ ގެއްލިފައެވެ. އެމެރިކާ ފާސްކުރަން ބޭނުންވާ ގަރާރުތަކަށް ޗައިނާއާއި ރަޝިއާ ގެންދަނީ ހިތުހުރި ގޮތަކަށް ހުރަސްއަޅައި ވީޓޯ ކުރަމުންނެވެ. ގޮންޖަހަމުންނެވެ.
އަނެއްކޮޅުން ޔުކްރެއިން ހަނގުރާމައާ ގުޅިގެން ރަޝިއާއާ ދެކޮޅަށް އެމެރިކާއާއި ޔޫރަޕުން އެޅި ފިޔަވަޅުތަކުގައި ބައިވެރިވުމަށް އެމެރިކާ ކުރި އިލްތިމާސްތަކަށް ޔޫރަޕްގެ ގައުމުތައް ފިޔަވައި އެހެން ގައުމަކުން އިޖާބަ ދީފައިނުވުމަކީވެސް އެމެރިކާގެ ބަލިކަށިކަން ހާމަވެގެންދިޔަ ކަމެކެވެ.
ސައެންޓިފިކް ކުރިއެރުންތަކާއި ސައެންޓިފިކް ރީސާޗްތަކުގައި ޗައިނާ ގެންދަނީ އެމެރިކާގެ މައްޗަށް ކުރި ހޯދާއިރު ހައިޓެކް އުފެއްދުންތަކާއި އޭވިއޭޝަން ޓެންނޮލޮޖީއާއި މުވާސަލާތީ ޓެކްނޮލޮޖީގައި ޒަމާނުއްސުރެ އޮތް އެމެރިކާގެ މޮނޮޕޮލީ މިހާރު ވަނީ ގެއްލިފައެވެ. އެމެރިކާގެ އިގްތިސާދަށްވުރެ ދެގުނަ ބާރު ދުވެލީގައި ޗައިނާގެ އިގްތިސާދު ކުރިއަރަމުންދާއިރު 2027 ވަނަ އަހަރާ ހަމައަށްދާއިރު ދުނިޔޭގެ އެއްވަނަ އިގްތިސާދުގެ މަގާމު ގެއްލޭނެކަމުގެ ބިރު އެމެރިކާއަށްވަނީ އިހުސާސުކުރަންޖެހިފައެވެ.
އަނެއްކޮޅުން އެމެރިކާގެ ޑޮލަރުގެ ބަދަލުގައި އެހެން ފައިސާތަކުން ދުނިޔޭގެ އެތައް ގައުމެއް މިހާރުވަނީ ވިޔަފާރީގެ މުއާމަލާތްތައް ކުރަންފަށާފައެވެ. މިއާއެކު ދުނިޔޭގެ ރިޒާވް ފައިސާގެ ގޮތުގައި ދެން މާދިގުމުއްދަތަކަށް އެމެރިކާ ޑޮލަރު ދެމި ނޯންނާނެކަމުގެ ކަންބޮޑުވުމާވެސް އެމެރިކާވަނީ ކުރިމަތިލާން ޖެހިފައެވެ. އިންޑިއާ، ރަޝިއާ ޗައިނާ ފަދަ ގައުމުތައް މިހާރުވަނީ އެމެރިކާގެ މާލީ ނިޒާމުތައްކަމަށްވާ ސްވިފްޓް ނިޒާމެކޭ އެއްގޮތަށް މަސައްކަތްކުރާ މާލީ ނިޒާމުތައް އުފައްދައި އެނިޒާމުތަކުގެ ބޭނުންކޮށް ވިޔަފާރީގެ ޕޭމަންޓްތަކުގައި ޑޮލަރު ބޭނުކުރާ މިންވަރު ކުޑަކުރަން ފަށާފައެވެ.
އަނެއްކޮޅުން ދަތިކުރުމުގެ ފިޔަވަޅުތައް އަޅައިގެން އީރާން އިނދަޖައްސާލަން އެމެރިކާ ކުރިމަސައްކަތްވެސްވަނީ ނާކާމިޔާބުވެފައެވެ. އީރާނުގެ ނިއުކްލިޔާ ޕްރޮގްރާމް ހުއްޓުވުމުގައިވެސް އެމެރިކާވަނީ ނާކާމިޔާބުވެފައެވެ.
މީގެއިތުރުން އެމެރިކާއާއި ޔޫރަޕްގެ ކުރީގެ އިސްތިއުމާރީ ބާރުތައް އެފްރިކާއިން ބޭރުވާންޖެހިފައިވާއިރު އޭގެބަދަލުގައި ރަޝިއާ އާއި ޗައިނާ ވަނީ އިގްތިސާދީ ގޮތުންނާއި އަސްކަރީ ގޮތުން އެފްރިކާއަށް ވަރަށް ބޮޑަށް ވަންނަމުންނެވެ. އަދި ބެލްޓް އެންޑް ރޯޑު އިނިޝިއޭޓިވްގެ ދަށުން ޗައިނާ އިގްތިސާދީގޮތުން މުޅި ދުނިޔޭގެ ބާރުވެރިކަން ހޯދަމުން ގެންދާއިރު އެމެރިކާގެ ފަރާތުން ފެންނަނީ އެފަދަ އިނިޝިއޭޓިވް އެއް ނެތި ސިނާއީ އުފެއްދުންތަކާއި ވިޔަފާރީގެ މުއާމަލާތްތަކުގައި ކުރިޔަށްވުރެ ބަލިކަށިވެ ހީނަރުކަމާއެކު ފަހަތަށްޖެހެން މަޖުބޫރުވާ މަންޒަރެވެ.