08 Feb 2023, 13:47
މ. ދިއްގަރުގެ ފަޅުތެރޭގައި އޮތް ލޯންޗެއް ގޮވައި އިއްޔެ ހިނގި ހާދިސާގައި އަނިޔާވި ދެމީހުންގެ ތެރެއިން އެކަކަށް އަދިވެސް ފަރުވާ ދެނީ އޭޑީކޭގެ އައިސީޔޫގައި ކަމަށް އޭނާގެ އާއިލާއިން ބުނެފިއެވެ.
ފިހިގެން ފަރުވާ ދެމުން އަންނަ މީހެއްގެ އާއިލާ މީހަކު މިއަދު "ސަން" އަށް ބުނީ، އައިސީޔޫގައި ފަރުވާދެނީ ލޯންޗު ސްޓާޓް ކުރަން އުޅުނު މީހާއަށް ކަމަށެވެ. އޭނާގެ ހާލު ކުރިއަށް ވުރެން ރަނގަޅު ވަމުން އަންނަ ކަމަށް ވެސް އާއިލާ މީހާ ބުންޏެވެ. މި ހާދިސާގައި ފިހިފައި ވަނީ އަނިޔާވި ދެމީހުންގެ ވެސް ފައެވެ.
ހާދިސާގައި އަނިޔާވި ދެވަނަ މީހާއަށް ފަރުވާދެނީ އޭޑީކޭގެ ވޯޑުގައެވެ. އޭނާގެ ހާލު ވެސް މިހާރު ރަނގަޅުކަމަށް އޭނާ އާ ހަވާލުވެ ހުރި މީހާ މައުލޫމާތު ދިނެވެ.
"ދެމީހުންގެ ހާލު ވެސް މިހާރު ޑަބަލް ރަނގަޅު ގެނައި އިރަށް ވުރެ،" އޭނާ ބުންޏެވެ.
ދިއްގަރު "އަސުރުމާ" ނަމަކަށް ކިޔާ ލޯންޗެއްގައި ރޯވެފައި ވަނީ އިއްޔެ ހެނދުނު 09:50ހާއިރެވެ.
ދިއްގަރު ކައުންސިލުގެ ރައީސް އަޙްމަދު ނިޝާން އިއްޔެ "ސަން" އަށް ވިދާޅުވީ އެ ހާދިސާ ހިނގި ވަގުތު ލޯންޗުގައި ތިބީ ދެ މީހުން ކަމަށެވެ. އެއީ ލޯންޗުގެ ވެރިމީހާ އާއި ފަޅުވެރިއެއް ކަމަށް އޭނާ ވިދާޅުވިއެވެ.
އެ ދެމީހުން ވެސް ފިހި، އެކި ވަރުގެ އަނިޔާ ލިބުމުގެ ސަބަބުން އެންމެ ފުރަތަމަ ފަރުވާ ދިނީ، ދިއްގަރު ސިއްހީ މަރުކަޒުގައެވެ. އެއަށްފަހު އިތުރު ފަރުވާއަށް އިއްޔެ މެންދުރު ފަހުދު 11:40 ގައި ވަނީ މާލެ ގެނެސްފައެވެ.
"އެންމެ ބޮޑަށް އަނިޔާވެފައިވަނީ ކެޕްޓަންއަށް. އޭނާގެ ފައި ވެސް ވަނީ ވަރަށް ބޮޑަށް ފިހިފަ،" އޭނާ ވިދާޅުވިއެވެ.
ނިޝާން ވިދާޅުވީ، ލޯންޗު ގޮވީ ސްޓާޓް ކުރަން އުޅުމުގެ ތެރޭގައި ކަމަށެވެ.
"އެއްފަހަރު ސްޓާޓް ނުވެގެން ދެވަނަ ފަހަރު ސްޓާޓް ކުރިތަނާ ގޮވާފަ ވަނީ. ގޮވުމުގެ އަޑު ރަށު ތެރެއަށް ވެސް ވަރަށް ގަދައަށް އިވުނު ކަމަށްވޭ،" އޭނާ ވިދާޅުވިއެވެ.
ނީޝާން ވިދާޅުވި ގޮތުގައި އެ ހާދިސާގައި ލޯންޗު ވަނީ ބޭނުން ނުކުރެވޭ ވަރަށް އަނދާފައެވެ. އެ ރަށު ކައުންސިލާއި ފުލުހުންނާއި ރައްޔިތުން ގުޅިގެން ކުރި މަސައްކަތުން އަލިފާން ނިއްވާލި ނަމަވެސް އަލިފާން ނިއްވާލީ ލޯންޗު މޫދުގެ އަޑިއަށް ފައްތާލައިގެން ކަމަށް އޭނާ ވިދާޅުވިއެވެ. އަދި މިހާރު އެ ލޯންޗު އެއްގަމަށް އަރުވާފައިވާ ކަމަށް އޭނާ ވިދާޅުވިއެވެ.
އެ ލޯންޗަކީ އަށް މީހުންގެ ޖާގައިގެ 23 ފޫޓުގެ ލޯންޗެކެވެ. އަދި އާއްމުކޮށް ބޭނުން ކުރަނީ އަތޮޅުތެރޭގެ ދަތުރުތަކަށް ނަމަވެސް ދޭތެރެއަކުން އެ ލޯންޗުގައި މަސް ދަތުރުތަކަށް ދާ ކަމަށް ވެސް މައުލޫމާތު ލިބެއެވެ.