07 Feb 2023, 14:11
ސިނާއީ ސަރަހައްދުތަކުން ބޭރު މީހުންނަށް ދިގު މުއްދަތަށް ބިން ވިއްކުމަކީ ރާއްޖޭގެ ކުދި އަދި މެދު ފަންތީގެ ވިޔަފާރިވެރިން ދިރިތިއްބާ މަރާލުން ކަމަށް ރައްޔިތުންގެ މަޖިލީހުގެ ކުޑަހުވަދޫ ދާއިރާގެ މެންބަރު އަދި އެމްޑީއޭގެ ނައިބު ރައީސް އަހުމަދު އާމިރު ވިދާޅުވެއްޖެއެވެ.
ބީލަން އުސޫލުން، 99 އަހަރަށް ބިދޭސީންނަށް ތިލަފުށިން ބިން ވިއްކަން ސަރުކާރުން ވަނީ ހުޅުވާލައިފައެވެ.
އެކަމާ ގުޅިގެން ކަންބޮޑުވުން ފާޅުކުރައްވާ "ސަން"އާ ވާހަކަދައްކަވަމުން އާމިރު ވިދާޅުވީ އުފެންދުންތެރިކަމުގެ މަސައްކަތްތައް ކުރާ ތަންތަން ހުންނަނީ ސިނާއީ ސަރަހައްދުގައި ކަމަށެވެ. އެހެންވެ، އެ ސަރަހައްދުން ކުޑަ ކުއްޔެއްގައި ދިވެހީންނަށް ބިން ލިބޭނެ ގޮތް ހަމަޖައްސަން ޖެހޭ ކަމަށް އޭނާ ގަބޫލުކުރައްވައެވެ.
އެކަމަކު، އޭގެ ބަދަލުގައި އެތަންތަނުން ބިދޭސީންނަށް ބިން ވިއްކުމުގެ ސަބަބުން ކުދި އަދި މެދު ފަންތީގެ ވިޔަފާރިވެރިންނަށް ބޮޑެތި ގޮންޖެހުންތަކެއް ކުރިމަތިވާނެ ކަމަށް އޭނާ ވިދާޅުވިއެވެ.
"ބޭރުގެ ބޮޑެތި މަހުޖަނުން އައިސް، ރާއްޖޭގެ އިންވެސްޓަރުން ކުރާ ޒާތުގެ ކަންކަން ކޮށްލީމައި، އެ މީހުންގެ ދުވަސް ދިޔައީ ނޫންތޯ؟ މުސްތަގުބަލުގައި އެ މީހުން ވާނީ މަރެއް ނޫންތޯ؟ އެހެންވީމާ އެއީ، ދިވެހިރާއްޖޭގެ މުސްތަގުބަލަށް ވިސްނާފައި ކުރަން ހެޔޮވާވަރުގެ ކަމެއް ނޫން،" އާމިރު ވިދާޅުވިއެވެ.
އޭނާ ގަބޫލުކުރައްވާ ގޮތުގައި ބޭރުގެ އިންވެސްޓަރުންނަށް ފުރުސަތު ހުޅުވާލަން ވާނީ ދިވެހި ވިޔަފާރިވެރިންނަށް ހިންގޭ ވަރަށް ވުރެ ބޮޑެތި މަޝްރޫއުތައް ކުރިއަށް ގެންދާށެވެ. ކުދި އަދި މެދު ފަންތީގެ ވިޔަފާރީގެ ތެރެއަށް ބޭރު މީހުން ވަދެއްޖެ ނަމަ، ދިވެހި ވިޔަފާރިތައް ބަނގުރޫޓުވާނެ ކަމަށް އޭނާ ވިދާޅުވިއެވެ.
"އަޅުގަނޑުމެން ޝަކުވާއެއް ނުކުރަންދޯ، ޓޫރިޒަމަށް ހުޅުވާލީމާ ބޭރުގެ އިންވެސްޓަރުން އައިސް، ޓޫރިޒަމަށް ކުރިމަތިލައިގެން އެ ސިނާއަތުގައި މަސައްކަތް ކުރާތީ އެކަމަށް." އޭނާ ވިދާޅުވިއެވެ.
ތިލަފުށީގައި ވިޔަފާރި ކުރާ ދިވެހިންގެ ތެރޭގައި ގިނައީ ކުދިކުދި ތަންކޮކޮޅު ހަދައިގެން އެތަން ފުޅާ ކޮށްގެން ކުރިއަރާފައި ތިބި މީހުންކަން ފާހަގަކުރައްވާ އާމިރު ވިދާޅުވީ އެ ތަނަށް ބިދޭސީ އިންވެސްޓަރުން އަތުވެއްޖެ ނަމަ، އެތައް ޒަމާނެއް ވަންދެން ދިވެހި ވިޔަފާރިވެރިން ކުރި މަސައްކަތް ބަނގުރޫޓުވާނެ ކަމަށާއި އެއީ ދިރިތިއްބާ މަރާލުން ފަދަ ކަމެއް ކަމަށެވެ.
އޭނާ ވިދާޅުވީ ސިނާއީ ސަރަހައްދުތަކުގެ ކުލި ވެސް ދުވަހެއް ދުވަހަކަށް ބޮޑު ކުރާއިރު، އެ ދަތިތަކުގެ ސަބަބުން ދިވެހި ވިޔަފާރިވެރިންނަށް ބިރު ހީވެފައިވާ ކަމަށެވެ. އެހެންވެ، އުފެއްދުންތެރިކަން އިތުރު ކުރުމަށް އެފަދަ ވިޔަފާރިތަކަށް މިހާރަށްވުރެ ބޮޑު އެހީއެއް ދައުލަތުން ދޭން ޖެހޭ ކަމަށް އޭނާ ވިދާޅުވިއެވެ.
ސިނާއީ މަސައްކަތަށް ތިލަފުށިން ބިން ވިއްކާގޮތުގެ އުސޫލު އެޗްޑީސީން އާންމުކުރީ މިދިޔަ ހަފުތާގައެވެ. އެ އުސޫލުގައި ވާގޮތުން ބިދޭސީންނަށް ބިން ކުއްޔަށް ދޫކުރަނީ 99 އަހަރަށެވެ. އަދި ބީލަން ކާމިޔާބު ކުރަނީ ދިވެހި ކުންފުންޏެއް ނަމަ ބިން މިލްކު ކުރެވޭނެއެވެ. ބީލަން ހުށަހެޅޭ އެންމެ ދަށް އަގަކީ އަކަފޫޓަކަށް 1،700 ރުފިޔާއެވެ.