08 Feb 2023, 08:34
އޯޕަންއޭއައި ކުންފުނީގެ ޗެޓްޖީޕީޓީ މީގެ ދެ މަހެއްހާ ދުވަސް ކުރިން ތައާރަފުކުރި ފަހުން އާޓިފިޝަލް އިންޓެލިޖެންސް (އޭއައި) އާއި ޓެކްނޮލޮޖީގެ ދުނިޔޭގައި ޗެޓްޖީޕީޓީގެ ވާހަކަތައް މިވަނީ ވަރަށް ބޮޑަށް ވައިގައި ހިފާފައެވެ. ޒަމާނީ ޓެކްނޮލޮޖީގެ ކުރިއަރާފައިވާ ގާބިލުކަމާ އެކު، ގިނަ ބަޔަކު މި ސިސްޓަމަށް ޝައުގުވެރިކުރުވައި، މިހާރު ދުނިޔޭގެ އެކި ކަންކޮޅުތަކުން 100 މިލިއަނަށްވުރެ ގިނަ ޔޫޒަރުން ވަނީ ޗެޓްޖީޕީޓީއާ ގުޅިފައެވެ.
ޗެޓްޖީޕީޓީ އަކީ މީހުން ލިޔާ ލިޔުންތަކާ އެއްގޮތް ލިޔުންތައް އުފެއްދުމަށް ގިނަ އަދަދެއްގެ މައުލޫމާތު ބޭނުންކޮށްގެން ތަމްރީނުކޮށްފައިވާ، އޭއައި ލެންގުއޭޖް މޮޑެލްއެކެވެ. އެހެންކަމުން އެއީ ތަފާތު ލިޔުންތައް އުފެއްދުމަށް އަގުހުރި ވަސީލަތެކެވެ. އުނދަގޫ ސުވާލުތަކާއި މައުޟޫއުތައް ދެނެގަނެ، ޖަވާބު ދިނުމުގެ ގާބިލުކަން ލިބިފައިވާ ޗެޓްޖީޕީޓީއަކީ ކަސްޓަމަރުންގެ ބައިވެރިވުމާއި އެހީތެރިކަން އިތުރުކުރުމަށް މަސައްކަތްކުރާ ވިޔަފާރިތަކަށް ވެސް އެހީތެރިވެދޭ ވަސީލަތެކެވެ.
އޯޕަންއޭއައި އިން އަންނަނީ ޗެޓްޖީޕީޓީގެ ގާބިލްކަން އިތުރުކޮށް ވިޔަފާރިތަކަށާއި އަމިއްލަ ފަރުދުންނަށް ފަސޭހައިން ޚިދުމަތް ލިބޭނެ ގޮތް ހެދުމަށް ކެނޑިނޭޅި މަސައްކަތް ކުރަމުންނެވެ. އަދި އެއީ ބާޒާރުގައި އެންމެ ކުރިއަރާފައިވާ އޭއައި ލެންގުއޭޖް މޮޑެލްގެ ގޮތުގައި ދެމިއޮންނާނެ މޮޑެލްކަން ޔަގީން ކުރުމަށް ޓަކައި އެ ކުންފުނިން ވަނީ ރިސާޗް އެންޑް ޑިވެލޮޕްމަންޓަށް ބޮޑެތި އިންވެސްޓްމަންޓްތަކެއްވެސް ކޮށްފައެވެ.
ޗެޓްޖީޕީޓީ ތައާރަފްކުރިތާ އެންމެ ދެ މަސް ދުވަހުގެ ތެރޭގައި އޭގެ ކަސްޓަމަރުންގެ އަދަދު 100 މިލިއަން ފަހަނައަޅައި ގޮސްފައިވާއިރު، މިއީ މި ޒަމާނީ ޓެކްނޮލޮޖީއަށް ޑިމާންޑް އޮތް މިންވަރުގެ ބޮޑުކަމާއި އޭގެ ސަބަބުން ކަސްޓަމަރުންނަށް ލިބޭފައިދާތައް ދައްކުވައިދޭ ވަރުގަދަ ހެއްކެކެވެ. އަދި އެއީ، އޭއައިގެ ދާއިރާއިން އެންމެ ކުރިއަރާފައިވާ އުފެއްދުންތެރިންގެ ލަގަބު އޯޕަންއޭއައިއަށް ލިބިދޭ ކާމިޔާބީއެކެވެ.
އޭއައި އާއި ޓެކްނޮލޮޖީގެ ދާއިރާގައި ހަރަކާތްތެރިވާ ގިނަ ތަޖުރިބާކާރުން ވަނީ ޗެޓްޖީޕީޓީ އަކީ މި ސިނާއަތުގައި އައި ބޮޑު އިންގިލާބީއެއްގެ ގޮތުގައި ބަލައިގަނެ އެ ޚިދުމަތަށް ތައުރީފުކޮށްފައެވެ.
ޗެޓްޖީޕީޓީގެ މަގުބޫލުކަން އިތުރުވަމުންދާއިރު، އޭއައި އާއި ޓެކްނޮލޮޖީގެ ސިނާއަތަށް އޭގެ ބޮޑު އަސަރެއް ކުރާނެ ކަމަށް ބެލެވެއެވެ.