28 Jan 2023, 19:15
މިހާތަނަށް ލިބިފައިވާ ނަތީޖާތައް ދައްކާގޮތުން އެމްޑީޕީގެ ރިޔާސީ ޕްރައިމަރީ ރައީސް އިބްރާހިމް މުހައްމަދު ޞާލިހް ބޮޑު ތަފާތަކުން ކާމިޔާބުކުރައްވައިފިއެވެ.
މިއަދު ބޭއްވި އެޕާޓީގެ ރިޔާސީ ޕްރައިމަރީގެ ދެބައިކުޅަ އެއްބައި ވޯޓު ގުނާފައިވާއިރު މިހާތަނަށް 64 އިންސައްތަ ވޯޓު ރައީސް ޞާލިހް ކާމިޔާބު ކުރެއްވިއިރު، އެޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ލިބިވަޑައިގެންފައި ވަނީ 36 އިންސައްތައެވެ.
މިއަދު ކުރިއަށްދިޔަ ވާދަވެރި ޕްރައިމަރީގައި ވޯޓުލުމުގެ ހައްގު 57،255 ލިބިފައިވާއިރު އޭގެ ތެރެއިން ވޯޓު ލާފައިވަނީ 30،000 އެއްހާ މެންބަރުންނެވެ.
މިއަދު ހެނދުނު 9:00ގައި ވޯޓު ލާން ފެށިއިރު ގިނަ ވޯޓު ފޮށިތަކުގެ ވޯޓުލުން ވަނީ 5:00އަށް ނިންމާލައިފައެވެ. އެކަމަކު، ވޯޓުލުން ކުރިއަށް ދިޔައިރު ވަނީ ގިނަ ހަމަނުޖެހުންތަކެއް ހިނގާ، ބޮޑެތި ތުހުމަތުތަކެއް އަމާޒުކޮށްފައެވެ.
ހަމަނުޖެހުން ބޮޑުވެ، ބައެއް ވޯޓުފޮށިތަކުގެ ވޯޓުލުން ވަނީ މެދުކަނޑާ ވެސް ލައިފައެވެ. އެގޮތުން ހަމަނުޖެހުންތަކުގެ ތެރެއިން ތިން ރަށަކުން ފަސް މީހަކު ވަނީ ހައްޔަރުކޮށްފައެވެ.
މި އިންތިޚާބާއެކު އެމްޑީޕީގައި ނަޝީދު ކުރަމުން އައި ރަސްކަން ވެސް ނިމިގެންދާނެއެވެ. އެ ޕާޓީ 2003 ވަނަ އަހަރު އުފެއްދީންސުރެއް އެޕާޓީގެ ކޮންޓްރޯލް ނަންގަވައިގެން އުޅުއްވާފައި ވަނީ ނަޝީދެވެ. އެމަނިކުފާނު ދެކޮޅަށް ނުކުންނަވާ، އެޕާޓީގެ އެހެން މެންބަރަކު އިންތިޚާބެއް ކާމިޔާބު ކުރެއްވި މިއީ ފުރަތަމަ ފަހަރެވެ.
އޭގެ ކުރިން އެމަނިކުފާނާ ދެކޮޅުވެރިވި އެންމެންނަށް ވެސް ޖެހުނީ އެއް ހާލެކެވެ. އެމަނިކުފާނާ ދެކޮޅަށް ވާދަކުރެއްވި ހުރިހާ މެންބަރުން ވެސް އާޚިރުގައި ޕާޓީން ވަކިކުރީއެވެ.
އެގޮތުން، އެޕާޓީގެ ފުރަތަމަ ރައީސް އިބްރާހިމް އިސްމާއިލާއި، އެޕާޓީގެ ކުރީގެ ރައީސް ޑރ. އިބްރާހިމް ޑީޑީއާއި، އެޕާޓީގެ ކުރީގެ ރައީސް ޑރ. މުހައްމަދު މުނައްވަރާއި، ރީކޯ މޫސާ މަނިކު ވެސް ނަޝީދާ ދެކޮޅުވުމުން ވަނީ ޕާޓީން ބޭރުކޮށްލައިފައެވެ.
އެކަމަކު، ފެށުނީއްސުރެ 20 އަހަރު ވަންދެން އެ ޕާޓީގައި ނަޝީދު ކުރަމުން އައި ރަސްކަން މިއަދު ވަނީ ނިމުމަކަށް އައިސްފައެވެ.
ފުރަތަމަ ފަހަރަށް ނަޝީދާ ހިޔާލު ތަފާތު ބޭފުޅަކު މިވަނީ އިންތިޚާބެއް ކާމިޔާބު ކުރައްވައިފައެވެ. މި ނަތީޖާއާއެކު ޕާޓީގެ މުޅި ކޮންޓްރޯލް ރައީސް ޞާލިހް ނަންގަވާނެއެވެ. އެހެންވެ، މިއީ އެ ޕާޓީގައި ބަދަލުނުވެ އޮތް އެތައް ތާރީޚެއް ބަދަލުކުރި ތާރީޚީ އިންތިޚާބެކެވެ.