28 Jan 2023, 09:14
ބޮލީވުޑްގެ ބަތަލާ ޕަރިނީތީ ޗޯޕްރާއަށް ބްރިޓިޝް ކައުންސިލްގެ ފަރާތުން ދޭ އައުޓް ސްޓޭންޑިން އެޗީވްމަންޓް އެވޯޑް ލިބިއްޖެއެވެ.
ޕަރިނީތީއަށް މި އެވޯޑް ލިބިފައި ވަނީ، އާޓްސް އާއި މުނިފޫހިފިލުވުމުގެ ދާއިރާއިންނެވެ. ބްރިޓިޝް ކައުންސިލްގެ ފަރާތުން ދޭ މިއެވޯޑަކީ، އިންޑިއާ، ޔޫކޭ އެޗީވާސްގެ ނަމުގައި ދެމުން އަންނަ އެވޯޑެކެވެ.
އިންޑިއާ، ޔޫކޭ އެޗީވާސް އެވޯޑަކީ، އިނގިރޭސިވިލާތުގައި ތަޢުލީމު ޙާސިލްކުރުމަށްފަހު ތަފާތު އެކި ޕްރޮފެޝަންތަކުގައި އިންޑިއާ ރަމްޒުކޮށްދީ ޤައުމަށް ރީތި ނަން ހޯދައިދޭ ފަރާތްތަކުގެ ޚިދުމަތުގެ އަގުވަޒަންކުރުމުގެ ގޮތުން ދޭ އެވޯޑެކެވެ. ޕަރިނީތީއަކީ އިނގިރޭސިވިލާތުގެ މެންޗެސްޓާ ބިޒްނަސް ސްކޫލުން ބިޒްނަސް، ފައިނޭންސް އަދި އިކޮނޮމިކްސްއިން ޑިގްރީ ޙާސިލްކޮށްފައިވާ ފަންނާނެކެވެ.
އައުޓް ސްޓޭންޑިންގް އެވޯޑް ލިބުމާ ގުޅިގެން ޕަރިނީތީވަނީ ސޯޝަލް މީޑިއާ މެދުވެރިކޮށް ބްރިޓިޝް ކައުންސިލްއަށް ޝުކުރު އަދާކޮށްފައެވެ. އަދި މިއީ ޕަރިނީތީގެ ފިލްމީ ކެރިއަރުގައި މިހާތަނަށް ކުރެވުނު މަސައްކަތްތަކުގެ އިތުރުން ކުރިމަގު ތަރައްޤީކުރުމަށް ލިބުނު ހިތްވަރެއްކަމަށް އޭނާ ވަނީ ބުނެފައެވެ. އެ އެވޯޑާ ޙަވާލުވުމަށް އިނގިރޭސިވިލާތުގެ މަޖިލިސް ގޭގައި ހޭދަކުރި ވަގުތަކީ ޙަޔާތުގެ ވަރަށް ޚާއްޞަ އެހާމެ މުހިއްމު ވަގުތުކޮޅެއްކަމަށް ބުނަމުން، ޕަރިނީތީ ބުނީ ޢާއިލާއާއި ހެޔޮއެދޭ ރަޙްމަތްތެރިންނާއެކު، ލިބުނު ކާމިޔާބީގެ އުފާފާޅުކުރަން ކެތްމަދުވެފައިވާކަމަށެވެ.
ޕަރިނީތީގެ ދެ ފިލްމެއް މިދިޔަ އަހަރުވަނީ ރިލީޒްކޮށްފައެވެ. އެއީ ޓީ-ސީރީސްއާއި ރިލަޔަންސް ގުޅިގެން އުފެއްދި ފިލްމު "ކޯޑް ނޭމް:ތިރަންގާ" އަދި ޑައިރެކްޓަރު ސޫރަޖް ބަރްޖަތްޔާގެ ފިލްމު "އޫންޗާއީ"އެވެ. މި ދެ ފިލްމުވެސް މިހާރުވަނީ ނެޓްފްލިކްސްގައި ޕްރިމިއާކޮށްފައެވެ. އޭނާ މިއަހަރު މަސައްކަތްކުރަމުން އަންނަ ފިލްމުތަކުގެތެރޭގައި، އަކްޝޭ ކުމާރްއާއެކު ފެނިގެންދާ ފިލްމު "ކެޕްސުލް ގިލް" އަދި އިމްތިއާޒް ޢަލީގެ ފިލްމު "ޗަމްކީލާ" ހިމެނެއެވެ.