22 Jan 2023, 11:34
ބޭންކް އޮފް މޯލްޑިވްސް (ބީއެމްއެލް)ގެ އެންމެ ފުރަތަމަ ސްޕޯޓްސް ސްކޮލަޝިޕް މިއަދު ހަތް އެތުލީޓަކަށް އެވޯޑުކޮށްފިއެވެ.
މިއީ އެ ބޭންކަށް 40 އަހަރު ފުރުމާ ގުޅިގެން ތައާރަފްކުރި ކަމެކެވެ.
ސްކޮލާޝިޕަށް ހޮވުނު އެތުލީޓުންނަށް އެ ކަމުގެ ލިޔުން ހަވާލުކުރީ މިއަދު ހެނދުނު މާލެ ޓޭބަލް ޓެނިސް ހޯލުގައި އޮތް ހަފުލާއެއްގައި އޮލިމްޕިކް ކޮމިޓީގެ ރައީސް، މުހައްމަދު އަބްދުއްސައްތާރާއި، ބީއެމްއެލްގެ ސީއީއޯ އަދި މެނޭޖިން ޑިރެކްޓަރު، ކާލް ސްޓުމްކެވެ.
މި ހަފްލާގައި މޯލްޑިވްސް އޮލިމްޕިކް ކޮމިޓީގެ އޮފިޝަލުންނާއި ގައުމީ ކުޅިވަރު އެސޯސިއޭޝަންގެ ފަރާތު ވެސް ބައިވެރިވިއެވެ.
ސްކޮލަޝިޕް ލިބުނު ހަތް އެތުލީޓުންނަކީ:
މަރިޔަމް ރޫޔާ އަލީ - އެތުލެޓިކްސް
- މަރިޔަމް މިންހާލް ޝާމިން - އެތުލެޓިކްސް
- މުހައްމަދު ސާލިމް އަބްދުލް ސަމަދު - ބެޑްމިންޓަން
- ޝުބާ މުހައްމަދު ޝަރީފް - ބެޑްމިންޓަން
- ފާތިމަތު ޖުމާނާ ނިމާލް - ޓޭބަލް ޓެނިސް
- މޫސާ މުންސިފް އަހްމަދު - ޓޭބަލް ޓެނިސް
- ލަޔާން މުހައްމަދު ޝާމިން - ޓެނިސް
ބީއެމްއެލްއިން ބުނީ، މިސްކޮލާޝިޕް ދިނުމުގެ އެންމެ ބޮޑު ބޭނުމަކީ އެތުލީޓުންގެ ހުނަރު ކުރިއަރުވައި، ކުޅިވަރުގައި ފުރިހަމަ ކާމިޔާބީއެއް ހޯދުމުގައި އެހީތެރިވުންކަމަށެވެ.
މި ސްކޮލަޝިޕުން ރާއްޖޭގެ މޮޅު އެތުލީޓުންނަށް ހުރިހާ ޚަރަދަކާއެކު ރާއްޖޭން ބޭރުގެ ފެންވަރު ރަނގަޅު ސެންޓަރުތަކުގައި ތަމްރީން ހޯދުމުގެ ފުރުސަތު ލިބޭނެއެވެ.
ސްކޮލަޝިޕްގެ ދަށުން އެކި ކުޅިވަރު ކުޅުންތެރިން ދާނީ އެކި ގައުމުތަކަށެވެ. އެ ގައުމުތަކުގެ ތެރޭގައި ހިމެނެނީ، ޖެމައިކާ، ޔޫއޭއީ، ކްރޮއޭޝިއާ އަދި ސްޕެއިނެވެ.
މި ސްކޮލަޝިޕް ލިބުނު ބައެއް އެތުލީޓުން "ސަން"އާ ވަހަކަދައްކަމުންވަނީ މިއީ އެ މީހުންނަށް ލިބުނު ވަރަށް މުހިންމު ފުރުސަތެއްކަމަށް ފާހަގަކޮށްފައެެވެ.
އެގޮތުން 2003ވަނަ އަހަރުން ފެށިގެން ޓޭބަލް ޓެނިސް (ޓީޓީ) ކުޅިވަރެއްގެ ގޮތުގައި ކުޅެމުން އަންނަ ފާތިމަތު ޖުމާނާ ބުނީ އެ ސްކޮލަޝިޕް ލިބުމަކީ އުފާވާ ކަމެއްކަމަށް އޭނާ ބުންޏެވެ.
ޓީޓީ ކުޅުންތެރިޔާ ފާތިމަތު ޖުމާނާ ނިމާލް -- ފޮޓޯ/ ބީއެމްއެލް
އަދި 19 އަހަރު ޓީޓީ ކުޅުންތެރިއެއްގެ ގޮތުގައި އޭނާ އުޅުނު އިރު މިއީ އެ ދާއިރާއިން އިތުރު ތަމްރީނަކަށް ލިބުނު ފުރަތަމަ ފުރުސަތެއް ކަމަށް އޭނާ ބުންޏެވެ.
"އަސްލު ވަރަށް އުފާވޭ މި ސްކޮލަޝިޕް ލިބުނީމަ. ދެން މި އަހަރު ޓީޓީއިން ވަރަށް ރަނގަޅު ޓާގެޓަކަށް ރީޗުވާން އަމާޒު ހިފައިފައި އޮތީ. އެ ކަމަށް ތައްޔާރުވާން ވެސް ލިބޭ އޮޕޮޗުނިޓީއެއް މިއީ،" ޖުމާނާ ބުންޏެވެ.
ޒުވާން އެތުލީޓް މަރިޔަމް ރޫޔާ އަލީ -- ސަން ފޮޓޯ
ހަމައެއާއެކު އެތުލެޓިކްސްގައި ކުރިއަރަމުން އަންނަ ޒުވާން އެތުލީޓް ރޫޔާ ބުނި ގޮތުގައި ވެސް މިއީ އޭނާއަށް ކުރަން ލިބޭނެ ތަފާތު ތަޖުރިބާއެކެވެ.
އަދި ކުރިއަށް އޮތް އިންޑިއަން އޯޝަން އައިލެންޑް ގޭމްސް (އައިއޯއައިޖީ)އަށް ތައްޔާރުވާން ލިބޭ ވަރަށް ރަނގަޅު ފުރުސަތެއްކަމަށް ވެސް ބުންޏެވެ.
"ބައިވަރު ކަންކަން ދަސްވާނެ. އަނެއްކާ އެއް އަހަރު މި ދަނީ އުޅެން. ހަމަ މުޅިން އާ ކަލްޗާއަކަށް އެޑެޕްޓްވާން ދަސްވާނެ،" ރޫޔާ ބުންޏެވެ.