15 Jan 2023, 09:57
ބޮލީވުޑްގައި ކުރިހޯދަމުން އަންނަ ހުނަރުވެރި ބަތަލާ ރަކުލް ޕްރީތް ސިންގް ތްރިލާ ފިލްމަކަށް ސޮއިކޮށްފައިވާކަމަށް މީޑިއާ ރިޕޯޓުތައް ބުނެފިއެވެ.
ސައުތް ސިނަމާ ފަތަޙަކުރުމަށްފަހު ހިންދީ ސިނަމާގައި ފައިތިލަ ސާބިތުކޮށްފައިވާ ބަތަލާ ސޮއިކޮށްފައިވަނީ ޑައިރެކްޓަރު ނިކިލް މަހާޖަންގެ ފިލްމަކަށެވެ. ނިކިލްއަކީ ކާމިޔާބު ތަމަޅަ ފިލްމުތަކެއް ބެލުންތެރިންނާ ހަމައަށް ގެނެސްދީފައިވާ ޑައިރެކްޓަރެކެވެ.
އިތުބާރުހުރި ފަރާތަކުން ފިލްމީ ޚަބަރުތައް ގެނެސްދޭ ބޮލީވުޑް ހަންގާމައަށް މަޢުލޫމާތު ދެމުން ބުނެފައިވަނީ ރަކުލް މިފިލްމަށް ސޮއިކޮށްފައިވާ ކަމަށެވެ.
ރަކުލްގެ އަތުގައި މިވަގުތު ވެސް ފިލްމީ ޕްރޮޖެކްޓްތަކެއް ހުރުމާއެކު މިއަހަރަކީ ބަތަލާގެ ޝެޑިއުލް ފުދޭވަރަކަށް ބާރުބޮޑު އަހަރެއްކަމަށް ރިޕޯޓުތައް ބުނެއެވެ. އެގޮތުން ފަސް ފިލްމެއްގައި މިއަހަރު އެކަނިވެސް ރަކުލް މަސައްކަތް ކުރާނެއެވެ. ރަކުލް އަލަށް ސޮއިކުރިކަމަށް ބުނެވޭ ތްރިލާ ފިލްމަކީ ލީޑްރޯލްއިން ހަމައެކަނި ރަކުލް ފެންނާނެ ފިލްމެއްކަމަށް ބޮލީވުޑް ހަންގާމާއިން މަޢުލޫމާތުދެއެވެ.
މި ފިލްމުގެ ވާހަކަ މައިގަނޑުގޮތެއްގައި ބިނާކޮށްފައިވާނީ، އެހެން ބަހުރުވައަކުން ގެނެސްދީފައިވާ ފިލްމެއްގެ ރިމޭކެއެއްކަމަށްވެސް މަޢުލޫމާތު ލިބެއެވެ. ފިލްމާއިގުޅޭ އިތުރު މަޢުލޫމާތާއެކު ރަސްމީގޮތުން ވަރަށް އަވަހަށް ފިލްމު އިޢުލާނުކުރާނެކަމަށް ފިލްމު ކުންފުންޏާ ޙަވާލާދީ ބޮލީވުޑް ހަންގާމާއިން ވަނީ ބުނެފައެވެ.
ވޭތުވެދިޔަ އަހަރަކީ، ބަތަލާ ރަކުލްއަށް ވަރަށް ވެސް ކާމިޔާބު އަހަރެކެވެ. ފަސް ފިލްމަކުން ރަކުލް ފެނިގެންދިޔައިރު އެންމެ ފަހުން ބަތަލާ ފެނިގެންދިޔައީ އެކްޓަރު އަޔުޝް ކުރާނާއާއެކު ކުޅުނު ފިލްމު "ޑޮކްޓަރު ޖީ"އިންނެވެ.
މީގެއިތުރުން އަޖޭ ދޭވްގަންއާއެކު ފެނިގެންދިޔަ ފިލްމު "ރަންވޭ 34"އަކީވެސް ބެލުންތެރިންނަށް ވަރަށް ކަމުދިޔަ ފިލްމެކެވެ. މިދިޔަ އަހަރުގެ އޮކްޓޯބަރު މަހު ރިލީޒްވި ފިލްމު "ތޭންކް ގޯޑް"އަކީވެސް ބެލުންތެރިންގެ މެދުގައި ބޮޑު މަޤުބޫލުކަމެއް ހޯދި ފިލްމެކެވެ.