06 Jan 2023, 13:49
އެމްޑީޕީގެ މެމްބަރުންނާއި ސަޕޯޓަރުންގެ ބުރަ މަސައްކަތުން 2018ވަނަ އަހަރު ނުކުމެ ބަދަލު ކުރަން ވޯޓުލީ އެތައް ކަމެއް އަލުން އަނބުރާ އިޔާދަކުރަމުންދާކަމުގެ ކަންބޮޑުވުން އެޕާޓީގެ ވަރަށް ގިނަ މެމްބަރުން ފާޅުކުރާކަމަށް އެމްޑީޕީގެ ރައީސް މުހައްމަދު ނަޝީދުގެ ކެމްޕެއިން ޓީމުން މިއަދު ނެރުނު ބަޔާނެއްގައި ބުނެފިއެވެ.
މުވައްޒަފުންނަށް ބިރުދެއްކުމާއި، ދަތިކުރުން ހުއްޓައިލުމަށް ގޮވައިލާ ނަޝީދުގެ ކެމްޕެއިން ޓީމުން ނެރުނު ބަޔާނެއްގައި ބުނީ، ދައުލަތުގެ އެކިއެކި ވަޒީފާތަކުގައި ތިބި ރައީސް ނަޝީދަށް ތާޢީދުކުރާ މުވައްޒަފުން ވަޒީފާ އަދާކުރަމުންދާ ރަށް ނޫން އެހެން ރަށްރަށުގެ ވަޒީފާތަކަށް ބަދަލުކުރަމުން ގެންދާ ކަމުގެ ޝަކުވާ ލިބެމުން ދާކަމަށެވެ.
އެކަން އެހެން ކުރަނީ، ވޯޓުލާ ދުވަހު އެ މީހުން ވޯޓުލުމުން މުހްރޫމްކުރުމާއި، އެމީހުންގެ ރަށްރަށުގައި ރައީސް ނަޝީދަށް ކެމްޕެއިން ކުރުންމުން ދުރުކުރުމަށް ކަމަށް އެ ބަޔާނުގައި ވެއެވެ.
މީގެ އިތުރުން، ވާދަވެރި ކެނޑިޑޭޓް ރައީސް އިބްރާހީމް މުޙައްމަދު ޞާލިޙަށް ތާއީދު ނުކުރާ މުވައްޒަފުންނަށް ސަރުކާރުން އެކި ގޮތްގޮތުން ބިރުދައްކަމުންދާ ކަމުގެ ޝަކުވާތައްވެސް ލިބޭކަމަށް އެ ބަޔާނުގައި ވެއެވެ.
"އެގޮތުން، ވާދަވެރި ކެނޑިޑޭޓަށް ތާއީދުނުކުރާ މުވައްޒަފުންނަށް ވަޒީފާތަކުގައި ނުތިބެވޭނޭކަމަށް ބުނެ ބައެއް މިނިސްޓަރުން މިނިސްޓްރީތަކުގެ މުވައްޒަފުންނަށް ބިރުދައްކައި އިންޒާރުދެމުންދާ ކަމުގެ ޝަކުވާތައްވެސް ލިބެމުންދެއެވެ،" އެ ބަޔާނުގައި ވެއެވެ.
ރައީސް ނަޝީދުގެ ކެމްޕެއިން ޓީމުން ނެރުނު ބަޔާނުގައި ވަނީ، ރައީސް ޞާލިޙްގެ ކެމްޕޭން ހަރަކާތްތަކަށް ދިޔުމަށް ސަރުކާރު ހިއްސާވާ ކުންފުނިތަކުގެ މުވައްޒަފުންނަށް އެކުންފުނިތަކުގެ އިސްވެރީން އަންގަމުން ގެންދާ ކަމަށް ބުނެފައެވެ. އަދި އެ ހަރަކާތްތަކުގައި ބައިވެރިނުވާނަމަ އެ މުވައްޒަފުންނާމެދު ފިޔަވަޅު އަޅާނޭކަމުގެ އިންޒާރު ދޭކަމުގެ ޝަކުވާވެސް ކެމްޕްއިން ޓީމަށް ލިބޭކަމަށް ބުންޏެވެ.
ހަމަ އެއާއެކު، ވާދަވެރި ކެނޑިޑޭޓުގެ ކެމްޕޭން ހަރަކާތްތައް ހިންގުމަށް ސަރުކާރުގެ އޮފީސްތައް ބޭނުން ކުރާ ކަމަށާއި، ސަރުކާރުގެ އިދާރާތަކުގެ އިސް ބައެއް ވެރީން މަޤާމުގެ ނާޖާއިޒް ބޭނުން ހިފަމުންދާ ކަމަށް ވެސް އެ ބަޔާނުގައި ވެއެވެ.
"ނާތަހްޒީބު ބިރުދެއްކުމުގެ ޢަމަލުތަކާއި، ސަރުކާރުން ނާޖާއިޒް ނުފޫޒު ބޭނުންކުރުމުގެ ޢަމަލުތަކަކީ، 2008 ވަނަ އަހަރުގެ ރިޔާސީ އިންތިޚާބުގެ ކުރީން އެއިރު އޮތް ރައީސް މައުމޫނު ޢަބްދުލްޤައްޔޫމުގެ ޑީއާރްޕީގެ ސަރުކާރުން ފެށިގެން އައިސްފައިވާ ކަންކަން ކަމާއި، އެކަންކަން ވަނީ 2008 ވަނަ އަހަރު އިންތިޚާބުވި އެމްޑީޕީ ގެ ސަރުކާރު އައުމާއެކު ނައްތާލާފައިކަމާއި، އެހެންނަމަވެސް އަނެއްކާވެސް ރައީސް ޢަބްދުﷲ ޔާމީން ޢަބްދުލްޤައްޔޫމުގެ ސަރުކާރުން އެ ނާތަހްޒީބު ޢަމަލުތައް ވުޖޫދުކުރުވާފައިވާ ކަމީ މިޕާޓީގެ މެންބަރުން ދެބަސްވާނޭ ކަމެއް ނޫނެވެ،" އެ ބަޔާނުގައި ވެއެވެ.
މިފަދަ ނާތަހުޒީބީ އަމަލެއް އަލުން އިޔާދަ ކުރުމުން އެކަމާ ކަންބޮޑުވާކަމަށް ރައީސް ނަޝީދުގެ ކެމްޕެއިން ޓީމުން ބުނެފައި ވެއެވެ. އަދި އެމްޑީޕީ އަކީ ޑިމޮކްރެޓިކް ހަމަތަކާއި އުޞޫލުތައް ނަގަހައްޓައި، އިންސާނީ ޤަދަރާއި ކަރާމާތް ޙިމާޔަތްކުރާން މަސައްކަތް ކުރާ ޕާޓީއެއް ކަމަށް ކެމްޕެއިން ޓީމުން ބުނެފައިވެއެވެ. އެހެންކަމުން، މުވައްޒަފުންނަށް ބިރުދެއްކުމުގެ ޢަމަލުތަކުން ދުރުވެ ތިބުމަށް ސަރުކާރާއި ސަރުކާރު ހިއްސާވާ ކުންފުނިތަކަށް ރައީސް ނަޝީދުގެ ކެމްޕެއިން ޓީމުން ވަނީ ގޮވާލާފައެވެ.