29 Dec 2022, 17:25
މި މަހު ޕެންޝަނުގެ ގޮތުގައި 136 މިލިއަނަށް ވުރެ ގިނަ ރުފިޔާ ދޫކޮށްފައިވާ ކަމަށް ޕެންޝަން އޮފީހުން ބުނެފިއެވެ.
ޕެންޝަން އޮފީހުން ބުނީ 136 މިލިއަނަށް ވުރެ ގިނަ ރުފިޔާ ދޫކޮށްފައިވަނީ ނަވާވީސް ހާހަށް ވުރެ ގިނަ ޕެންޝަންގެ ހައްގުވެރިންނަށް ކަމަށެވެ. އޭގެ ތެރޭގައި ހިމެނެނީ އަސާސީ ޕެންޝަނުގެ ހައްގުވެރިންނާއި، ރިޓަޔަމެންޓް ޕެންޝަނުގެ ހައްގުވެރިންނާއި، ދައުލަތުގެ ވަޒީފާތަކުން ރިޓަޔާކުރާ ފަރާތްތަކަށް ދައުލަތުން ދޭ ޢިނާޔަތްތަކާ އަދި ދައުލަތުގެ އެހެނިހެން ރިޓަޔާމެންޓް ޢިނާޔަތްތަކެވެ.
އަސާސީ ޕެންޝަނަކީ އުމުރުން 65 އަހަރު ފުރިފައިވާ ދިވެހި ރައްޔިތުންނަށް ރާއްޖޭގެ ޕެންޝަނާ ބެހޭ ޤާނޫނުގެ ދަށުން ފޯރުކޮށްދެވޭ ޕެންޝަނެކެވެ. މި ޕެންޝަނުގެ ގޮތުގައި 97 މިލިއަނަށް ވުރެ ގިނަ ރުފިޔާ ދޫކޮށްފައިވެއެވެ. އެއީ ވިހިހާހަށް ވުރެ ގިނަ މީހުންނަށެވެ.
ރިޓަޔާމެންޓް ޕެންޝަން ސްކީމްގެ ގޮތުގައި އަށް މިިލިއަނަށް ވުރެ ގިނަ ރުފިޔާ ދޫކޮށްފައިވާއިރު، އެއީ 1646 މީހުންނަށެވެ.
ދައުލަތުގެ ވަޒީފާތަކުން ރިޓަޔާކުރާ ފަރާތްތަކަށް ދައުލަތުން ދޭ ޢިނާޔަތްތަކުގެ ގޮތުގައި 24 މިލިއަނަށް ވުރެ ގިނަ ރުފިޔާ ވަނީ ދޫކޮށްފައެވެ. އެއީ 4495 ޕެންޝަނަރުންނަށެވެ.
މީގެ އިތުރުން ދައުލަތުގެ އެހެނިހެން ރިޓަޔާމެންޓް އިނާޔަތްތަކުގެ ގޮތުގައި ފަސް މިލިއަނަސް ވުރެ ގިނަ ރުފިޔާ ވަނީ ދޫކޮށްފައެވެ. އެއީ 2807 ޕެންޝަނަރުންގެ ފައިސާއެވެ.
ޕެންޝަން އޮފީސް ވުޖޫދަށް އައިސްފައިވަނީ 13 މެއި 2009 ގައި ޕެންޝަނާބެހޭ ޤާނޫނު ތަޞްދީޤު ކުރެވުމާ ގުޅިގެން އުފެދުނު މިނިވަން މުއައްސަސާއެއްގެ ގޮތުގައެވެ.
އެގޮތުން އެ އޮފީހުގެ މަސްއޫލިއްޔަތުތަކުގެ ތެރޭގައި ޕެންޝަނާބެހޭ ގާނޫނުގެ ދަށުން އެކުލަވާލެވޭ އެކި ޕެންޝަން ސްކީމްތައް ހިންގާ ބަލަހައްޓައި އެފަދަ ޕެންޝަން ސްކީމްތައް ހިންގުމަށް ބޭނުންވާ އުސޫލުތަކާއި، އެކަށައެޅަންޖެހޭ މިންގަޑުތަކާއި ގައިޑްލައިންތައް ހެދުން ހިމެނެއެވެ، އަދި ޕެންޝަނާބެހޭ ގާނޫނުގެ ދަށުން އެކުލަވާލެވޭ ސްކީމްތަކާ ބެހޭގޮތުން އާންމުން ހޭލުންތެރިކުރުން ވެސް ހިމެނެއެވެ.