28 Dec 2022, 12:20
މިއަހަރުގެ ޓޫރިޒަމް ސީޒަނުގައި އެންމެގިނަ ފަތުރުވެރިން ޒިޔާރަތްކޮށްފައިވަނީ މިދިޔަ ހޯމަ ދުވަހު ކަމަށް ޓޫރިޒަމް މިިނިސްޓްރީގެ ތަފާސްހިސާބުތަކުން ދައްކައިފިއެވެ.
ޓޫރިޒަމް މިނިސްޓްރީން އާއްމުކޮށްފައިވާ ޑެއިލީ ޓޫރިސްޓް އެރައިވަލް ތަފާސްހިސާބުތަކަށް ބަލާއިރު، މިމަހުގެ 26 ވީ ހޯމަދުވަހު ރާއްޖެއަށް ވަނީ 7،621 ފަތުރުވެރިން ޒިޔާރަތްކޮށްފައެވެ. އެއީ، މި ފަހަރުގެ ޓޫރިޒަމް ސީޒަނުގައި މިހާތަނަށް އެއް ދުވަހެއްގައި އެންމެ ގިނަ ފަތުރުވެރިން ޒިޔާރަތް ކުރި ދުވަހެވެ.
އެ ދުވަހު ރާއްޖެއަށް ޒިޔާރަތްކުރި ފަތުރުވެރިން ރެކޯޑު އަދަދަކަށް އިތުރުވުމުގެ މައިގަނޑު ސަބަބަކީ ކްރިސްމަސް ބަންދާ ދިމާކޮށް ރާއްޖެއަށް ޗުއްޓީ ހޭދަކުރުމަށް އައި ފަތުރުވެރިންގެ އަދަދު އިތުރުވުމެވެ.
ހޯމަދުވަހުގެ އިތުރުން ދެން އެންމެގިނައިން ފަތުރުވެރިން ޒިޔާރަތްކޮށްފައިވަނީ، މިމަހުގެ 23 ވީ ހުކުރުދުވަހެވެ. ހުކުރުދުވަހު 7،085 ފަތުރުވެރިން ރާއްޖެއަށް ޒިޔާރަތްކުރިއިރު، ޖެހިގެންއައި ހޮނިހިރުދުވަހު 6،809 ފަތުރުވެރިން ވަނީ ޒިޔާރަތްކޮށްފައެވެ.
ކޮންމެ އަހަރެއްގެ ވެސް ފަތުރުވެރިކަމުގެ ސީޒަނާއި ދިމާކޮށް ރާއްޖެ އަންނަ ބައިނަލްއަޤްވާމީ އެއާލައިންތަކާއި އަމިއްލަ ޖެޓުތަކުގެ އަދަދު ވަރަށްބޮޑުތަން އިތުރުވެ، އަންނަ ފަތުރުވެރިންގެ އަދަދު ވެސް ވަރަށްބޮޑަށް އިތުރުވެގެން ދެއެވެ.
މިފަހަރުގެ ޓޫރިޒަމް ސީޒަނާ ދިމާކޮށް ވީއައިއޭއަށް އައި ޕްރައިވެޓް ޖެޓުތަކެއް-- ފޮޓޯ/އެމްއޭސީއެލް
ވެލާނާ އިންޓަރނޭޝަނަލް އެއާޕޯޓް ހިންގާ ކުންފުނި އެމްއޭސީއެލުން އިއްޔެ ބުނެފައިވަނީ، މިދިޔަ ބްރާސްފަތި ދުވަހަކީ އާ ރަންވޭ ހުޅުވިފަހުން މިހާތަނަށް އެއާޕޯޓުގެ ފްލައިޓް އޮޕަރޭޝަންތައް އެންމެ ބޮޑަށް އިތުރުވި ދުވަސްކަމަށެވެ.
ބްރާސްފަތި ދުވަހު ރަންވޭ ބޭނުންކުރި މަތިންދާބޯޓުތަކުގެ އަދަދު އުޅެނީ 228 ގައެވެ. މީގެ ތެރޭގައި ހިމެނެނީ 104 އިންޓަރނޭޝަނަލް ފްލައިޓާއި، 104 ޑޮމަސްޓިކް ފްލައިޓުގެ އިތުރުން 20 ޕްރައިވެޓް ޖެޓެވެ.