26 Dec 2022, 08:41
އެންޑްރޮއިޑް 14ގައި ގޫގުލް ޕްލޭ ސްޓޯ މެދުވެރިކޮށް އެންޑްރޮއިޑްގެ ރޫޓް ސްޓޯ އަޕްޑޭޓް ކުރެވޭނެ ގޮތް ހަދަން ގޫގުލް ކުންފުނިން މަަސައްކަތް ކުރަމުންދާ ކަމަށް ރިޕޯޓުތައް ބުނެފިއެވެ.
ގޫގުލްއިން މިހާރު ރޫޓް ސެޓްފިކެޓްތައް އަޕްޑޭޓް ކުރަނީ ހަމައެކަނި ފުލް ސިސްޓަމް އަޕްޑޭޓްތަކުގެ ތެރެއިންނެވެ. އެހެންކަމުން އެންޑްރޮއިޑްގެ ކުރީގެ ވާޝަންތައް ބޭނުން ކުރާ ޑިވައިސްތަކުގައި މުއްދަތު ހަމަވެފައިވާ ރޫޓް ސެޓްފިކެޓް ބަލައިނުގަތުމުން އެ ޑިވައިސްތަކުން އިންޓަނެޓާ ކަނެކްޓު ނުވުމަކީ އެކަށީގެންވާ ކަމެކެވެ.
އެންޑްރޮއިޑްގެ ޚަބަރުތައް ކަވަރު ކުރުމުގައި މަޝްހޫރު ޓެކްނިކަލް އެޑިޓަރެއްކަމުގައިވާ މިޝާލް ރަހުމާން ކުރި ޓްވީޓަކާ ހަވާލާދީ އެންޑްރޮއިޑްޕޮލިސް އިން ރިޕޯޓުކުރި ގޮތުން ގޫގުލް ޕްލޭ ސާވިސަސްގެ އަޕްޑޭޓްތައް މެދުވެރިކޮށް ތައާރަފުކުރާ ރޫޓް ސެޓްފިކެޓް މޮޑިއުލްތަކުގެ މަސައްކަތް ގޫގުލްއިން މިހާރު ދަނީ ކުރަމުންނެވެ.
ރޫޓް ސެޓްފިކެޓްތައް ބޭނުންކުރަނީ ރައްކާތެރި ކަނެކްޝަންތައް ގާއިމް ކުރުމަށްޓަކައި އެންޑްރޮއިޑް ސިސްޓަމް ޑިވައިސްތައް ގުޅާލައިފައިވާ ނެޓްވޯކް ތަހުލީލުކުރުމަށެވެ.
ގޫގުލް ޕްލޭ ސާވިސަސް މެދުވެރިކޮށް ރޫޓް ސެޓްފިކެޓް މޮޑިއުލްތައް ތައާރަފު ކުރުމުން ގޫގުލްއަށް މި އަޕްޑޭޓްތައް ބޭނުންވާ ކޮންމެ ވަގުތެއްގައި ޕުޝް ކުރެވޭއިރު، ދުވަސްވީ މޮޑެލްތައްވެސް މިނިޒާމްގެ ތެރެއިން އަޕްޑޭޓް ކުރެވޭނެއެވެ.
މި އަޕްޑޭޓް ގެންނަން ގޫގުލް މަސައްކަތް ފެށީ ވަކި ރޫޓް ސެޓްފިކެޓް އޮތޯރިޓީއެއް ކަމަށްވާ ޓްރަސްޓްކޯއާ، ޖާސޫސީ މައުލޫމާތު ފޯރުކޮށްދޭ ކުންފުންޏަކާ ގުޅުން އޮތް ކަމުގެ ޚަބަރު ފެތުރުމުން ކަމަށް އެކަށީގެންވެއެވެ. އޭގެ ފަހުން ގޫގުލް އިން ވަނީ އެ ކުންފުނީގެ ޑިވައިސްތަކުގައި ޓްރަސްޓްކޯގެ ސެޓްފިކެޓްތަކަށް ސަޕޯޓް ދިނުން ހުއްޓާލަން ފަށާފައެވެ.
ޑެސްކްޓޮޕްތަކުގައި ގޫގުލް ކްރޯމް ވާޝަން 111 އަށް އަޕްޑޭޓް ކުރުމުން، ޓްރަސްޓްކޯ އިން ދޫކުރާ ރޫޓް ސެޓްފިކެޓްތަކަށް އިތުބާރު ކުރެވޭނެ ކަމަށް ބުނާ ފާހަގައެއް ދެން ނުފެންނާނެއެވެ. ނަމަވެސް އެންޑްރޮއިޑަށް އެ ބަދަލު އައުމަށް އިތުރު ވަގުތު ނަގާފާނެ ކަމަށާއި އެއީ އޭގެ ރޫޓް ސެޓްފިކެޓްތައް ވަކިން އަޕްޑޭޓް ނުކުރެވޭތީ ކަމަށް މިޝާލް ރަހުމާންގެ ބްލޮގް ޕޯސްޓުގައި ބުނެފައިވެއެވެ.
ގޫގުލްއިން މަސައްކަތް ކުރަނީ އެންމެ ފަހުގެ އަޕްޑޭޓާއެކު އެކަން ބަދަލު ކުރުމަށެވެ.