20 Dec 2022, 21:09
ފ. ނިލަންދޫ ގޮނޑުދޮށް ހިމާޔަތް ކުރުމާއި ރ. އިނގުރައިދޫ ބަނދަރުގެ ނެރުފައިކަށި ހެދުމުގެ މަސައްކަތް ޕްލޭނިން މިނިސްޓްރީއިން މިއަދު އެމްޓީސީސީއާ ހަވާލުކޮށްފިއެވެ.
ޕްލޭނިން މިނިސްޓްރީގައި އޮތް ރަސްމިއްޔާތެއްގައި އެ ދެ މަޝްރޫއުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ޑިރެކްޓާ ޖެނެރަލް ފާތިމަތު ޝާނާ ފާރޫގެވެ. އެ އެއްބަސްވުންތަކުގައި އެމްޓީސީސީގެ ފަރާތުން ސޮއިކުރެއްވީ ކުންފުނީގެ ސީއޯއޯ ޝާހިދު ޙުސައިން މޫސާއެވެ.
އެ ދެ މަޝްރޫއުގެ ތެރެއިން، ނިލަންދޫގެ ރަށްގިރުމުގެ މައްސަލަ ހައްލުކުރުމަށް ގޮނޑުދޮށް ހިމާޔަތް ކުރުމުގެ މަސައްކަތް ހަވާލުކުރީ 30 މިލިއަން ރުފިޔާއަށެވެ.
ނިލަންދޫ ގޮނޑުދޮށް ހިމާޔަތް ކުރުމާއި އިނގުރައިދޫ ބަނދަރުގެ މަސައްކަތް އެމްޓީސީސީއާ ހަވާލުކުރުމަށް ބޭއްވި ރަސްމިއްޔާތުގެ ތެރެއިން -- ފޮޓޯ/ ޕްލޭނިން މިނިސްޓްރީ
އެ މަޝްރޫއުގެ ދަށުން އެ ރަށުގެ ހުޅަނގު ފަރާތުގައި 503 މީޓަރުގެ ބޮޑު ހިލައިގެ ރިވެޓްމެންޓް ޖަހައި، 20 މީޓަރުގެ ބޮޑު ހިލައިގެ ގްރޮއިން ޖަހައި، ރަށުގެ އިރުއުތުރު ފަރާތުގައި 429 މީޓަރުގެ ޖިއޯބޭގް ރިވެޓްމެންޓް ޖަހާނެއެވެ.
އެ މަސައްކަތް ހަވާލުކުރީ 240 ދުވަސްތެރޭ ނިންމާ ގޮތަށެވެ.
އިނގުރައިދޭ ބަނދަރު މަޝްރޫއުގެ ތެރެއިން، 370 ކިއުބިކް މީޓަރަށް ބަނދަރު ފުންކުރުމާއި 6،394.50 މީޓަރަށް ނެރު ފުން ކުރުމުގެ މަސައްކަތް ކުރާނެއެވެ. އަދި ނެރުގައި 86 މީޓަރުގެ ބްރޭކްވޯޓާ ޖެހުމާއި ބަނދަރުގައި 59 މީޓަރުގެ ބްރޭކްވޯޓާ ޖެހުމާއި ބަނދަރުގެ އިރުމައްޗަށް 150 މީޓަރަށް ބްރޭކްވޯޓާ ޖެހުމާއި ދެ ނެވިގޭޝަން ލައިޓް ހަރުކުރުމުގެ މަސައްކަތް ކުރާނެއެވެ.
އެ މަޝްރޫއު ހަވާލުކުރީ 17 މިލިއަން ރުފިޔާއަށް، 180 ދުވަހުގެ ތެރޭގައި ނިންމާ ގޮތަށެވެ.