16 Dec 2022, 18:51
މީގެ 22 އަހަރު ކުރިން، ދިމާވި މައްސަލަތަކެއްގެ ސަބަބުން ވިޔަފާރިވެރިޔާ ޖަމްބޯ އިސްމާއިލް މޫސާ (ޖަމްބޯ އިއްސެ) އޭނާގެ ދިރިއުޅުން ތައިލެންޑުގެ ބެންކޮކަށް ބަދަލު ކުރިއެވެ. ރާއްޖެ ނައިސް އެހާ ދުވަހު ހުރުމަށްފަހު ފާއިތުވި ނޮވެމްބަރު މަހު އޭނާ ރާއްޖެއައި ދަތުރު ވެގެން ދިޔައީ އޭނާގެ ހަޔާތުގެ ފަހު ދަތުރަށެވެ.
ފައިވާން އުފައްދާ ފެކްޓަރީއެއް ތައިލެންޑުގައި ހިންގާ އިއްސެ އަކީ ރާއްޖޭގައި ފައިވާން ވިއްކާ ފަރާތްތަކަށް ފައިވާން އުފައްދާ، ސަޕްލައި ކޮށްދިނުމުގެ މަސައްކަތް ކުރާ މީހެކެވެެ. އޭނާ މަަސައްކަތް ކުރަމުންދިޔައީ އޭނާގެ ޖަމްބޯ ފޯވާޑިން ކުންފުނީގެ މެނޭޖިން ޑިރެކްޓަރުގެ ގޮތުގައި، ބެންކޮކުގައި ހުންނަ އެ ކުންފުނީގެ މައި އޮފީހުގައެވެ.
"ބީޗް" ބްރޭންޑްގެ ދަށުން ރާއްޖޭގައި ލިބެން ހުންނަ ފައިވާނަކީ އިއްސެގެ އައިއެމްއޭ ފުޓްވެއާ ކުންފުނިން އުފައްދާ ފައިވާނެވެ. މި ނޫންވެސް ނަންނަމުގައި ރާއްޖެއަށް ވަރަށް ގިނަ އަދަދެއްގެ ފައިވާން އިއްސެގެ ކުންފުނިން ސަޕްލައި ކޮށްދެއެވެ.
މީގެ އިތުރުން ފްރައިޓް ފޯވަޑިންގެ މަސައްކަތް ރާއްޖެއަށާއި އެހެން ބައެއް ގައުމުތަކަށް ވެސް އިއްސެގެ ކުންފުނިން ކުރެއެވެ.
އިއްސެ މިފަހަރު ރާއްޖެ އައީ އޭނާގެ ކުންފުނީގެ އޮފީހެއް މާލޭގައި ހުޅުވުމަށެވެ. އޯކިޑު މަގުގައި އެ އޮފީސް ހުޅުވުމުގެ މަސައްކަތްކޮށް ނިމިފައިވާއިރު ދުނިޔޭގެ އެހެން ބައެއް ގައުމުތަކުގައި ވެސް އެ ކުންފުނީގެ އޮފީސްތައް ހުޅުވުމަށް ދިޔައީ ތައްޔާރުވަމުންނެވެ.
އިއްސެ ވަނީ ރާއްޖެ އާދެވުމާއެކު އޭނާގެ އިހުސާސްތައް ފޭސްބުކް މެދުވެރިކޮށް ބަންޑުން ކޮށްލާފައެވެ.
ރާއްޖެއަށް އައި ބަދަލުތަކުން ހައިރާންވާ ކަމަށާއި މި ހުރިހާ ދުވަހު އާއިލާއާއި ގާތް ރަހުމަތްތެރިން މަތިން ހަނދާންވި ކަމަށް އޭނާ ބުންޏެވެ.
ރާއްޖެ އައުމަށްފަހު އެންމެ ފުރަތަމަ ވެސް އޭނާ ވަނީ އޭނާގެ އުފަން ރަށް ފުވައްމުލަކަށް ގޮސްފައެވެ. ރަށުގައި ޢާއިލާއާއި ރައްޓެހީންނާއެކު ތިން ދުވަހު މަޑުކުރުމަށްފަހު އޭނާ މާލެ އައިސްފައިވަނީ މިދިޔަ ނޮވެމްބަރު މަހުގެ 13 ވަނަ ދުވަހުއެވެ.
ފޭސްބުކްގައި އިއްސެ ކޮށްފައިވާ ޕޯސްޓްތަކުން ފެންނަ ގޮތުގައި ރާއްޖޭގެ ވިޔަފާރިވެރިންނާ ގާތް ގުޅުމެއް އޭނާ އޮވެއެވެ. ވިޔަފާރިވެރީންނާއި ރައްޓެހީންނާއެކު މާލޭގައި ބައްދަލުވުންތައް ބާއްވާފައިވާ ފޮޓޯތައް މި ފަހަކުން ވަރަށް ގިނައިން އިއްސެގެ ފޭސްބުކްގައި ޕޯސްޓްކޮށްފައި ވެއެވެ.
"ސަން"އަށް އެނގިފައިވާ ގޮތުގައި ދިވެހި އަންހެނަކާ އިނދެ ކުދީން ވެސް ލިބިފައިވާ އިއްސެ މިހާރު އިނދެގެން އުޅެނީ ތައިލެންޑްގެ އަންހެނަކާއެވެ. އޭނާއަށް ކުޑަ ކުއްޖަކު ވެސް ލިބިފައި ވެއެވެ.
މިއަދު މެންދުރު 2:30 ކަންހާއިރު ބްރިޖުގެ ޓްރެފިކް ލައިޓް ކައިރީގައި ސައިކަލަކާއި ކާރެއް ޖެހިގެން ހިނގި ހާދިސާގައި އިއްސެ މަރުވީ ޓްރީޓޮޕް ހޮސްޕިޓަލަށް ގެންގޮސް ފަރުވާ ދެމުން ދަނިކޮށެވެ. މަރުވިއިރު އޭނާގެ އުމުރަކީ 54 އަހަރެވެ.
ފުލުހުން ބުނީ އެ މައްސަލަ ތަހުގީގު ކުރަމުން އަންނަ ކަމަށެވެ.