15 Dec 2022, 10:16
ރަންބީރް ކަޕޫރާއި ބަތަލާ ޝްރަދާ ކަޕޫރު މުހިއްމު ރޯލްއިން ފެނިގެންދާ ލަވް ރަންޖަންގެ ފިލްމުގެ ފުރަތަމަ ޓީޒާ ރިލީޒްކޮށްފިއެވެ.
މީގެ 2 ދުވަސް ކުރިން ލަވް ރަންޖަން ވަނީ ފިލްމުގެ ނަން ފެށޭ އަކުރުތައް ހިމެނޭގޮތަށް ޕޯސްޓަރެއް ވެސް ރިލީޒްކޮށްފައެވެ. "ތޫ ޖޫތާ މެއިން މައްކާރް" ނަމަކަށް ކިޔާ މި ފިލްމުގެ ޓީޒާ ރިލީޒް ކުރި ނަމަވެސް ދެ ތަރިން ވެސް ފިލްމުގައި ފެނިގެންދާ ރޯލާ ބެހޭ މާބޮޑު ތަފްސީލެއް ނުދައްކައެވެ.
މި ފިލްމަކީ، ޝްރަދާއާއި ރަންބީރުގެ ޖޯޑު ސްކްރީނުން ފެންނާނެ ފުރަތަމަ ފަހަރަށްވެފައި މި ފިލްމަށް ދެ ތަރިންގެ ފޭނުން ވެސް ވަރަށް ބޮޑަށް އިންތިޒާރުކުރެއެވެ.
ފިލްމުގެ ޓީޒާއިން ދައްކުވައިދޭގޮތުގައި މި ފިލްމަކީ، ރޮމޭންޓިކް ކޮމެޑީއެކެވެ. ޑައިރެކްޓަރު ލަވް ރަންޖަންގެ ފިލްމުތަކަކީ އަބަދު ވެސް ފިލްމުގައި ހިމެނޭ ތަރިންގެ ކެމިސްޓްރީ ވަރަށް ރީތި ދައްކުވައިދޭ ފިލްމުތަކެކެވެ.
ފިލްމު "ޕިޔާރްކޭ ޕަންޗްނާމާ"، "ސޯނޫ ކޭ ޓީޓޫކީ ސްވީޓީ" ފަދަ ފިލްމުތައް ގެނެސްދީފައިވާ ލަވް ރަންޖަންގެ މި ފަހަރުގެ ފިލްމާބެހޭ މާބޮޑު ތަފްސީލެއް އަދި ހާމަކޮށްފައެއް ނުވެއެވެ.
ބަތަލާ ޝްރަދާ ކަޕޫރު އާއި ބަތަލް ރަންބީރް ކަޕޫރްގެ އިތުރުން ފިލްމު "ތޫ ޖޫތާ މެއިން މައްކާރް"އިން ކުރީގެ ބަތަލާ ސްރީދޭވީގެ ފިރިމީހާ ބޮނީ ކަޕޫރު ވެސް ފެންނާނެއެވެ. މީގެ އިތުރުން ބަތަލާ ޑިމްޕަލް ކަޕާޑިއާ ވެސް ފިލްމުގައި ފެނިގެންދާނެއެވެ. މިއީ ބެލުންތެރިންނަށް މި ފިލްމު ޚާއްޞަވެފައި ފިލްމު ބެލުމަށް ކެތްމަދުވެފައިވާ މަދު ސަބަބުތަކެކެވެ.
ދާދިފަހުން ރަންބީރް ކަޕޫރު މީޑީއާއަށް މަޢުލޫމާތު ދެމުން ބުނެފައިވަނީ، މި ފިލްމަކީ، ޙަޔާތުގެ އެންމެ ފަހު ލޯބީގެ ފިލްމަށްވުމީ އެކަށީގެންވާ ކަމެއް ކަމަށެވެ. އެހެންކަމުން ރަންބީރް ކަޕޫރާއެކު ލޯބީގެ ރޯލެއްކުޅެން ފުރުޞަތު ލިބުމަކީ ޝްރަދާ ކަޕޫރުގެ ފިލްމީ ކެރިއަރަށް އިތުރުވި އާ ބޮޅެކެވެ.
ބަތަލާ ޝްރަދާ ކަޕޫރުގެ ފިލްމެއް ބެލުންތެރިންނާ ބައްދަލުކުރުމަށް ތައްޔާރުވެފައި މި ވަނީ ބަތަލާގެ ފިލްމެއް ރިލީޒް ނުވާތާ ދެ އަހަރު ދުވަސް ވެފައިވަނިކޮށެވެ. ޝްރަދާގެ އެންމެ ފަހުން ރިލީޒް ވެފައިވަނީ، 2020 ވަނަ އަހަރު ރިލީޒްވި ފިލްމު "ބާޣީ"އެވެ.