11 Dec 2022, 21:23
ރާއްޖޭގެ 42 ވަނަ މަސްވެރިންގެ ދުވަހުގެ ހަރަކާތްތަކުގެ ތެރޭގައި ހިމަނައިގެން ގދ. ފަރެސްމާތޮޑާގައި ކުރިއަށް ގެންދިޔަ "މަސްވެރިކަމުގެ އެކްސްޕޯ 2022"އަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު ޒިޔާރަތްކުރައްވައިފިއެވެ.
މި އެކްސްޕޯ ބާއްވާފައިވަނީ މިދިޔަ ހުކުރު ދުވަހުން ފެށިގެން މިއަދުގެ 18:00ގެ ނިޔަލަށް ފަރެސްމާތޮޑާ ބަނދަރު ސަރަހައްދުގައެވެ.
ރައީސް އޮފީހުން ބުނީ މިއަދު މެންދުރު ފަހު ރައީސް، އެ މައުރަޒަށް ކުރެއްވި ޒިޔާރަތުގައި އެތަނުގައި ހުރި ސްޓޯލްތައް ބައްލަވައިލައްވައި، މަސްވެރިކަމުގެ ދާއިރާގެ އައު އުފެއްދުންތަކާ ގުޅޭ މައުލޫމާތު ހޯއްދަވާފައިވާ ކަމަށެވެ.
ފިޝަރީޒް އެކްސްޕޯއަށް ރައީސް ޒިޔާރަތްކުރެއްވުމަށްފަހު މަސްވެރިކަމާބެހޭ އައު އުފެއްދުންތަކާބެހޭ މައުލޫމާތު އޮޅުންފިލުއްވަނީ -- ފޮޓޯ/ ރައީސް އޮފީސް
މަސްވެރިންގެ ދުވަހާ ގުޅިގެން ކުރިއަށް ގެންދާ މި އެކްސްޕޯގައި، މިފްކޯ އާއި ހޮރައިޒަން ފިޝަރީޒުން ވަނީ އައު އުފެއްދުންތަކެއް ބާޒާރަށް ނެރެފައެވެ.
ފިޝަރީޒް މިނިސްޓްރީން އިންތިޒާމްކޮށްގެން ބޭއްވި މި އެކްސްޕޯގައި އަށް ސްޓޯލް ހުރިއިރު އެކްސްޕޯގައި ޖުމުލަ 10 ފަރާތަކުން ބައިވެރިވި ކަމަށް ރައީސް އޮފީހުން ބުންޏެވެ.
އެ ފަރާތްތަކުގެ ތެރޭގައި، ހިމެނެނީ އެމްޓީސީސީ، މިފްކޯ، ހޮރައިޒަން ފިޝަރީޒް، އެންސިސް، ސީގަލް ގުރޫޕް، ޕްރެޝާޓެކް މޯލްޑިވްސް، ބިގްފިޝް މޯލްޑިވްސް، އުރީދޫ މޯލްޑިވްސް، ނޫރާއްޖެ އަދި ފަރެސްމާތޮޑާ ކައުންސިލެވެ.
ފަރެސްމާތޮޑާގައި ބޭއްވި ފިޝަރީޒް އެކްސްޕޯއަށް ރައީސް ޒިޔާރަތްކުރެއްވުން -- ފޮޓޯ/ ރައީސް އޮފީސް
މި އެކްސްޕޯއަށް ޒިޔާރަތްކުރެއްވުމަށްފަހު، ރައީސް ވަނީ މަސްވެރިންގެ ދުވަހާ ގުޅިގެން ފަރެސްމާތޮޑާގައި ދެޖިންސުގެ މީހުންނަށް ހުޅުވާލައިގެން ބޭއްވި، މަސްކެނޑުމުގެ މުބާރާތް ޝަރަފުވެރިކޮށްދެއްވާފައެވެ.
މަސްކެނޑުމުގެ މުބާރާތުގައި ބައިވެރިވެފައިވަނީ 12 މީހުންނެވެ. އެއީ އަށް އަންހެނުންނާއި ހަތަރު ފިރިހެނުންނެވެ.
މި އަހަރުގެ މަސްވެރިންގެ ދުވަސް ގައުމީ ފެންވަރުގައި ފާހަގަކުރުމަށް ގދ. ފަރެސްމާތޮޑާގައި ދަނީ ގިނަ ހަރަކާތްތަކެއް ހިންގަމުންނެވެ.
ރައީސް އޮފީހުން ބުނީ މަސްވެރިންގެ ދުވަހާ ގުޅިގެން ބާއްވާ ރަސްމީ ޖަލްސާ އޮންނާނީ މިރޭ، ގދ. ފަރެސްމާތޮޑާގެ ބަނދަރު ސަރަހައްދުގައި ކަމަށެވެ.