11 Dec 2022, 00:36
ފީފާ ވޯލްޑް ކަޕުގެ ކުއާޓާ ފައިނަލުގައި ޕޯޗުގަލްގެ މައްޗަށް މޮރޮކޯއިން ހޯދި މޮޅާއެކު، ފަލަސްޠީނުގެ ޣައްޒާގެ މަގުތަކުގައި އުފާ ފާޅުކުރަން ފަށައިފިއެވެ.
ޕޯޗުގަލްގެ މައްޗަށް މޮރޮކޯއިން ކުރިހޯދީ 0-1 ގެ ނަތީޖާއަކުންނެވެ. މި މޮޅާއެކު މޮރޮކޯއިން މުބާރާތުގެ ސެމީ ފައިނަލަށް ދަތުރުކުރިއިރު، މިއީ އިސްލާމީ ގައުމަކުން އަދި އެފްރިކާ ބައްރުގެ ގައުމަކުން މި މުބާރާތުގެ ސެމީ ފައިނަލުގައި ކުޅޭނެ ފުރަތަމަ ފަހަރެވެ.
އިސްލާމީ ގައުމެއްގެ ގޮތުގައި އޮންނަ މޮރޮކޯއިން ހޯދި މި ކާމިޔާބީގައި، މުޅި އިސްލާމީ އުންމަތް ބައިވެރިވަމުން އަންނައިރު ދިވެހިންނަށްވެސް މިއީ ހާއްސަ މޮޅަކަށް ވަނީ ވެފައެވެ. އެހެންނަމަވެސް މި މޮޅު އެންމެ ހާއްސަވަނީ، ފަލަސްޠީނުގެ ރައްޔިތުންނަށެވެ.
އެއީ މުބާރާތުގެ ގްރޫޕް ސްޓޭޖާއި، ރައުންޑް އޮފް 16 އަދި ކުއާޓާ ފައިނަލުގައި މޮރޮކޯއިން ހޯދި މޮޅު ހާއްސަ ކޮށްފައި ވަނީ ފަލަސްޠީނަށެވެ. ކޮންމެ މެޗަކުން ހޯދި ކާމިޔާބީއަށްފަހު މޮރޮކޯ ޓީމުގެ ކުޅުންތެރިން ވަނީ ދަނޑުމަތީގައި، އެތައް ހާސް ސަޕޯޓަރުންނެއް އަދި ޓީވީތަކުން މެޗު ބެލި އެތައް މިލިއަން ބައެއްގެ ކުރިމަތީގައި ފަލަސްޠީނުގެ ދިދަ ވިހުރުވާލައި، އިސްރާއީލުން ފަލަސްޠީނަށް ވެރިވެގަނެ ހިންގަމުންދާ ލާއިންސާނީ އަމަލުތަކާއި ދެކޮޅުކަން ހާމަކޮށްފައެވެ.
ޕޯޗުގަލް ބަލިކުރުމަށްފަހު މޮރޮކޯގެ ކުޅުންތެރިން ފަލަސްޠީނުގެ ދިދައާއެކު --
މޮރޮކޯ ކުޅުންތެރިންގެ މި ކަންތައްތަކުގެ ސަބަބުން މުޅި އިސްލާމީ އުންމަތުގެ ތައުރީފާއި، ދުޢާއާއި ސަނާގެ ބަސްތައް އެޓީމަށް ލިބެމުން އަންނައިރު، ފަލަސްޠީން މިނިވަންކުރުމަށް ގޮވާލާ އަޑު މިހާރު އަންނަނީ ގަދަވަމުންނެވެ. އެގޮތުން ޔޫރަޕުގެ ބައެއް ގައުމުތަކުގެ ސަޕޯޓަރުންވެސް، ދަނޑަށް ވަދެ ފަލަސްޠީން މިނިވަންކުރުމަށް ގޮވާލައި، އެފަދަ ޝިއާރުތައް ލިޔެފައިވާ ލިޔުންތަކާއި ބެނާތައް އަންނަނީ ބޭނުންކުރަމުންނެވެ.
މޮރޮކޯއިން މުބާރާތުގެ ސެމީ ފައިނަލަށް ދަތުރުކުރުމާއެކު ޣައްޒާގެ މަގުތަކަށް ނުކުމެ، ފަލަސްޠީނުގެ އެތައް ހާސް ރައްޔިތުންތަކެއް އަންނަނީ އުފާ ފާޅުކުރަމުންނެވެ. މަގުތަކުން އިވެމުންދަނީ ތަކުބީރު އަޑެވެ.
ޣުދުސް ނިއުސް ނެޓްވޯކުން ރިޕޯޓުކޮށްފައިވާ ގޮތުގައި، ޣައްޒާގެ އެންމެ ބޮޑު ކުޅިވަރު ހޯލަށް، މޮރޮކޯއަށް ސަޕޯޓުކުރަން އެތައް ހާސް ސަޕޯޓަރުންތަކެއް އެއްވިއިރު، މެޗުން އެޓީމު ހޯދި ކާމިޔާބީއާއެކު އެމީހުން ވަނީ ތާރީހީ ކާމިޔާބީ ފާހަގަކޮށް މޮރޮކޯއަށް އޮތް ތާއީދު ދެއްކުމަށް މަގުތަކަށް ނުކުމެ އުފާ ފާޅުކޮށްފައެވެ.
މޮރޮކޯގެ ކާމިޔާބީ ފާހަގަކުރުމަށް ޣައްޒާގެ މަގުތަކަށް ފަލަސްޠީނުގެ ރައްޔިތުން ނުކުތުން ---ފޮޓޯ/ޣުދުސް ނިއުސް ނެޓްވޯކް
ހަ ފަހަރެއްގެ މަތިން ވޯލްޑް ކަޕުގައި ކުޅެފައިވާ މޮރޮކޯއިން މުބާރާތުގެ ސެމީ ފައިނަލުގައި ވާދަކުރާނީ މިރޭ ފްރާންސާއި އިންގްލެންޑް ކުޅޭ މެޗުން މޮޅުވާ ޓީމަކާއި ދެކޮޅަށެވެ. އެ މެޗުގައިވެސް މޮރޮކޯގެ ފަހަތުގައި މުޅި އިސްލާމީ އުންމަތް އޮންނާނެއެވެ.
37 މިލިއަން މީހުންގެ އާބާދީއެއް އޮންނަ މޮރޮކޯގެ ރައްޔިތުންގެ ތެރެއިން 99 އިންސައްތައަކީ މުސްލިމުންނެވެ.