11 Dec 2022, 09:23
ޒުވާނުންގެ މެދުގައި ބޮޑު މަގުބޫލުކަމެއް ހޯދާފައިވާ އޯލްޓަނޭޓިވް ލަވަކިޔުންތެރިޔާ ލާނާ ޑެލް ރޭގެ އާ އަލްބަމް އަންނަ އަހަރު ރިލީޒްކުރުމަށް ތައްޔާރުވެއްޖެއެވެ.
"ސޭޑް ކޯ" މިއުޒިކް ނަމުގައި ހާއްސަ ޖޯންރާއެއް އާންމުންގެ ތެރޭގައި މަގުބޫލު ކޮށްފައި ވަނީ ލާނާއެވެ. އޭނާގެ އާ އަލްބަމްއަށް ކިޔާނީ "ޑިޑް ޔޫ ނޯ ދެއާ އިޒް އަ ޓަނެލް އަންޑަ އޯޝަން ބޫލުވާޑް"އެވެ. މި އަލްބަމް ރިލީޒްކުރުމަށް ހަމަޖެހިފައިވަނީ އަންނަ އަހަރުގެ މާޗު 10ގައެވެ.
އަލްބަމް އިއުލާން ކުރުމަން ލާނާ ވަނީ އޭނާގެ އަލްބަމްގެ ފުރަތަމަ ސިންގަލް ރިލީޒްކޮށްފައެވެ. މި ލަވައަކީ އަލްބަމްގެ ޓައިޓަލް ލަވައެވެ.
ލާނާގެ އާ އަލްބަމްގައި ގިނަ އާޓިސްޓުންނެއް ފީޗާ ކުރުމަށް ވަނީ ހަމަޖެހިފައެވެ. އެގޮތުން މަޝްހޫރު ލަވަ ލިޔުންތެރިޔާ ޖެކް އެންޓަނޯފްގެ ބޭންޑް "ބްލީޗާސް" އާއި ޖޫޑާ ސްމިތުގެ އިތުރުން ޓޮމީ ޖެނެސިސް ވެސް ވަނީ އަލްބަމްގައި ފީޗާ ކުރުމަށް ހަމަޖެހިފައެވެ.
އަލަށް އަލްބަމް އިއުލާނު ކުރަމުން ލާނާ ވަނީ އޭނާގެ ފޭނުންނަށް ވަރަށް ބޮޑަށް ޝުކުރު އަދާކޮށްފައެވެ. މިއީ ލާނާ ނެރޭ ނުވަ ވަނަ ސްޓޫޑިއޯ އަލްބަމެވެ. އޭނާ އެންމެ ފަހުން އަލްބަމެއް ނެރެފައިވަނީ މިދިޔަ އަހަރުގައެވެ. އެ އަލްބަމް އަށް ކިޔަނީ "ބްލޫ ބެނިސްޓާސް"އެވެ.
ލާނާ އެންމެ ފުރަތަމަ އަލްބަމް އެއް ނެރެފައިވަނީ 2010 ވަނަ އަހަރުގައެވެ. ނަމަވެސް މިއުޒިކްގެ ތެރެއަށް އޭނާ ވަދެ މިއުޒިކް އުފައްދަން ފަށާފައިވަނީ 2007 ވަނަ އަހަރުގައެވެ. އެކަމު އާންމުންގެ ތެރޭގައި އޭނާ މަގުބޫލުކަން ހޯދާފައިވަނީ 2011 ވަނަ އަހަރު އޭނާ ނެރުނު ލަވައެއް ކަމަށްވާ "ވީޑިއޯ ގޭމްސް" އިންނެވެ.