10 Dec 2022, 14:42
އަގު ހުރި އިނާމުތަކާއެކު އުރީދޫ މޯލްޑިވްސްއިން، އުރީދޫ ނޭޝަން ފީފާ ޓޯނަމަންޓުގައި ބައިވެރިވުމުގެ ފުރުސަތު ހުޅުވާލައިފިއެވެ.
މި މުބާރާތަކީ، ރާއްޖޭގެ އެކި ހިސާބުތަކުގައި، ގޭމް ކުޅޭ މީހުންނަށް، ހާއްސަކޮށްގެން ބާއްވާ ޓޯނަމެންޓެކެވެ.
މި މުބާރާތުގައި އޮންލައިންކޮށް ރަޖިސްޓްރީވުމުގެ ފުރުސަތު މިހާރު ވަނީ ހުޅުވާލައިފައެވެ.
ޝައުގުވެރިވާ ފަރާތްތަކަށް، އަންނަ ބުރާސްފަތި ދުވަހުގެ ކުރިންhttp://ore.do/fifa23މެދުވެރިކޮށް ރަޖިސްޓަރު ކުރެވޭނެއެވެ.
މި މުބާރާތް ފަށާނީ މި މަހު 16ވަނަ ދުވަހެވެ.
މުބާރާތް އޮންނާނީ، މާލެއާއި، ފުވައްމުލަކާއި، އައްޑޫ އަދި ކުޅުދުއްފުށީގައެވެ.
މުބާރާތުގެ ބައިވެރިން، ގްރޫޕް ސްޓޭޖާއި ނޮކް އައުޓް ސްޓޭޖާއި ސެމީ ފައިނަލް އަދި ފައިނަލް ހިމެނޭ ގޮތަށް ހަތަރު މަރުހަލާއެއްގައި ވާދަކުރާނެއެވެ.
މުބާރާތް ކުރިއަށްދާނީ، އީއޭ ފީފާ އޮންލައިން މުބާރާތްތަކުގެ ރަސްމީ ގައިޑްލައިންތަކާ އެއްގޮތަށެވެ.
މި ޓޯނަމަންޓުން އެއްވަނައަށް ދާ ބައިވެރިއަކަށް، ނިކާއީ 65" ސްމާޓް ވެބް އޯއެސް 4ކޭ ޔޫއެޗްޑީ ޓީވީއެއް ހަދިޔާއެއްގެ ގޮތުގައި ލިބޭނެއެވެ.
ދެވަނަ އަށްް ކީބޯޑަކާއި، މައުސްއެއްގެ އިތުރުން މައުސް ޕެޑަކާއި ހެޑްފޯނެއް ލިބޭނެއެވެ.
ތިންވަނައަށްް ދާ ފަރާތަށް ހައިސެންސް ބާ އެޗްއެސް ޗެނަލް ސައުންޑް ބާއެކެވެ.
އުރީދޫއިން ބުނީ މި މުބާރާތަކީ މިހާރު ކުރިއަށްދާ ގަތަރު ވޯލްޑްކަޕްގެ ފޯރި އިތުރަށް ގަދަކޮށް، ވާދަވެރި ރޫހެއް އުފެއްދުމަށް ކުރިއަށް ގެންދާ މުބާރާތެއްކަމަށެވެ.
އެގޮތުން އުރީދޫގެ މީޑިއާ އޮފިޝަލް ނާއިފާ ޖިހާދު "ސަން"އަށް ވިދާޅުވީ މިއީ ރާއްޖޭގައި ބާއްވާ މިފަދަ އެންމެ ބޮޑު މުބާރާތްކަމަށެވެ.
"މިއީ ރާއްޖޭގެ ގޭމާޒް ވެސް މި ފޯރީގައި އެންގޭޖުކުރަން ކުރިއަށް ގެންދާ ޓޯނަމެންޓެއް. އަޅުގަނޑުމެން އުރީދޫ ނޭޝަން ޕްލެޓު ފޯމްވާނެ މި އަހަރު ކުރީކޮޅު ތައާރަފްކޮށްފައި. މީގެ ބޭނުމަކީ ވެސް ހަމަ ގޭމާޒްއަށް ފުރުސަތުތަކެއް ފަހިކޮށްދިނުން،" ނާއިފާ ވިދާޅުވިއެވެ.
އުރީދޫ ނޭޝަން ފީފާ މުބާރާތް ބާއްވަނީ، އީޓުއެސް ގޭމިންއާއި ފުވައްމުލައް އަތޮޅު ކައުންސިލާއި މަންނަމް ކެފޭ އަދި ކްލަބް ކޮރަލްސް ގުޅިގެންނެވެ.