11 Dec 2022, 21:16
އެއް ތަނުން އަނެއް ތަނަށް ދަތުރުކުރާއިރު ބޭނުން ކުރެވޭ ނެވިގޭޝަން ސޮފްޓްވެއާއެއް ކަމަށްވާ ވާޒޭއާއި، ގޫގުލް މެޕްސް ފަދަ އުފެއްދުންތަކުގައި މަސައްކަތް ކުރާ ޓީމްތައް އެއްކުރަން އެ ކުންފުނިން ނިންމައިފިއެވެ.
ގޫގުލްގެ ބެލެނިވެރި ކުންފުނި ކަމަށްވާ އަލްފަބެޓް އިންކްއިން އެއް ބިލިއަން ޑޮލަރަށް ވާޒޭ ގަތީ 2013 ވަނަ އަހަރެވެ.
ގޫގުލްގެ ތަރުޖަމާނަކު ބުނީ އެ ކުންފުނިން ނިންމާފައި ވަނީ، ގޫގުލް މެޕްސް އާއި ގޫގުލް އާތު އާއި ސްޓްރީޓް ވިއު ހިމެނޭ ޕޯޓްފޯލިއޯ ކަމަށްވާ ގޫގުލް ޖިއޯއަށް ވާޒޭ އިތުރު ކުރުމަށެވެ.
ގޫގުލްއިން ބުނީ ވާޒޭ އަދިވެސް އޮންނާނީ ވަކި އެޕެއްގެ ގޮތުގައި ކަމަށެވެ. ނަމަވެސް ވާޒޭގެ ސީއީއޯ ނޭހާ ޕަރިކް ދުވަސްކޮޅަކަށް ފަހު އެ ކުންފުނިން ވަކިވާނެ ކަމަށް ތަރުޖަމާނު ބުންޏެވެ.
ގޫގުލްއިން އިތުރަށް ބުނީ، ޓީމުތައް އެއްކޮށްލުމުން ފަންނީ އެހީތެރިކަން އިތުރުވެ، އޭގެ ފައިދާ ޓީމުތަކުގެ މެމްބަރުންނަށް ކުރާނެ ކަމަށެވެ.
މިދިޔަ ޖުލައި މަހު އަލްފަބެޓްގެ ސީއީއޯ ސުންދަރު ޕިޗާއީ ވަނީ އެ ކުންފުނިން ތަފާތު ޓީމުތައް އެއްކުރުން ފަދަ ފިޔަވަޅުތައް އަޅާނެ ކަމަށް ވިދާޅުވެފައެވެ.
އަލްފަބެޓުން ވާޒޭ ގަތުމާ ގުޅިގެން ވާޒޭގެ ބައެއް މުވައްޒަފުން ވަނީ މީގެ ކުރިން ކަންބޮޑުވުން ފާޅުކޮށްފައެވެ. އެގޮތުން ވާޒޭގެ ކުރީގެ އިސް އެގްޒެކެޓިވްއެއް ކަމަށްވާ ނޯމް ބާޑިން މިދިޔަ ފެބްރުއަރީ މަހު ބުނި ގޮތުގައި ގޫގުލްގެ ތެރޭގައި ވާޒޭގެ ކުރިއެރުމަށް ވަނީ ދަތިތަކެއް ކުރިމަތިވެފައެވެ.
ބާޑިން ބުނި ގޮތުގައި ވާޒޭ މިނިވަންކޮށް އޮތް ނަމަ އެ ކުންފުނި މާ ހަލުވިކޮށް އަދި މާ ހަރުދަނާ ގޮތެއްގައި ކުރިއަރައިގެން ދާނެއެވެ.