އިތުރު ވަގުތުގެ ގޮތުގައި ދެއްކި ހަ މިނެޓުގެ ކުޅުން ހަމަވެއްޖެ. 0-1 އިން މެޗު ކާމިޔާބު ކުރީ ކޮސްޓަ ރިކާ.

މިއާއެކު މުބާރާތުގައި ކުރިއަށް ދިއުމުގެ ފުރުސަތު އެޓީމަށްވެސް މިވަނީ ހުޅުވިފަ. މި މެޗުން މޮޅުވި ނަމަ ޖަޕާނަށް މުބާރާތުގެ ރައުންޑް އޮފް 16 ގެ ޖާގައެއް ކަށަވަރުވީސް.

މެޗުގައި ގިނަ ހަމަލާތަކެއް އުފެއްދީވެސް ޖަޕާނުން. ކޮސްޓަ ރިކާ އިން ލަނޑު ޖެހީ މިފަހަރުގެ މުބާރާތުގައި އެޓީމުން ގޯލާއި އަމާޒުކޮށް ފޮނުވާލި ހަމައެކަނި ހަމަލާއިން.

88 ވަނަ މިނެޓު: ޖަޕާނުގެ ނުރައްކާތެރި ހަމަލާއެއް. ކޮސްޓަ ރިކާގެ އޭރިއާ ތެރެއަށް ދެ ޓީމުގެވެސް ގިނަ ކުޅުންތެރިންތަކެއް ވަދެތިބި ވަގުތެއްގައި ޖަޕާނުގެ ކައުރޯ މިޓޮމާ އޭރިއާ ތެރެއަށް ބޯޅަ އާއިއެކު ވަދެ ހުރަސް ކޮށްދިން ބޯޅަ، އަސާނޯ ގޯލާއި ދިމާލަށް ފޮނުވާލި ނަމަވެސް، ކޮސްޓަ ރިކާގެ ކީޕަރު ކޭލާ ނަވާޒް ވަނީ ބޯޅަ ދިފާއު ކޮށްފަ. ދެވަނަ ފަހަރަށްވެސް ޖަޕާނުގެ ކުޅުންތެރިންނަށް ބޯޅަ ފޮނުވާލަން ލިބުނު ނަމަވެސް، ދެންވެސް ލިބުނު ފުރުސަތުގެ ބޭނުން ހިފިފައެއް ނުވޭ.

80 ވަނަ މިނެޓު: ކޮސްޓަރިކާ އިން ގޯލާއި އަމާޒުކޮށް ފޮނުވާލި ފުރަތަމަ ހަމަލާއިން ލަނޑު ޖަހައި ލީޑު ނަގައިފި. މި ލަނޑު އެޓީމަށް ކާމިޔާބު ކޮށްދިނީ ކޭޝާ ފުލާ.

ޖަޕާނުގެ ހިލޭ ޖެހުން ފޮނުވާލީ ކަމާޑާ. ބޯޅަ އަމާޒުވީ ފާރަށް އެތުރި ތިބި ކުޅުންތެރިންގެ ގަޔަށް.

70 ވަނަ މިނެޓު: ޖަޕާނުގެ އީޑޯ އަށް ޑީ އޭރިއާ ތެރެއިން ކޮސްޓަ ރިކޯގެ ކާލްވޯ ކުރި ފައުލަކާއި ގުޅިގެން ރީނދޫ ކާޑެއް ދައްކައިފި. ކޮސްޓަ ރިކާ އިން ޖަރުމަނާއި ދެކޮޅަށް ކުޅޭ މެޗުގައި ކަލްވޯ އަށް ނުކުޅެވޭނެ. ސްޕެއިން މެޗުގައިވެސް ކަލްވޯ އަށް ރީނދޫ ކާޑެއް ދައްކާފައިވޭ.

ހިލޭ ޖެހުން ފޮނުވާލީ ޖަޕާނުގެ ސޮމާ. ބޯޅަ ދިޔައީ ހުރަސް ދަނޑި މަތިން ބޭރަށް.

ދެވަނަ ހާފުގެ 8 މިނެޓާއި ހަމައަށް ކުޅެވުނު އިރު މި ހާފު ޖަޕާނުން ފެށީ ވަރުގަދަކޮށް. މެޗުގައި މިހާތަނަށް ޖުމްލަ 8 ހަމަލާއެއް އެޓީމުން އުފައްދާފައިވާއިރު ދެ ހަމަލާއެއް އޮން ޓާގެޓަށް ވަނީ ފޮނުވާލާފަ.

ކޮސްޓަ ރިކާ އަށް އަދިވެސް ޓާގެޓަށް ހަމަލާއެއް ފޮނުވާލެވިފައެއް ނުވޭ.

ފުރަތަމަ ހާފުގެ 45 މިނެޓުގެ ކުޅުން ހަމަވެ އިތުރު ވަގުތުގެ ގޮތުގައި އެއް މިނެޓު ދައްކައިފި.

ފުރަތަމަ ހާގުގެ 45 ވަނަ މިނެޓާއި ހަމައަށް ކުޅެވުނު އިރު ދެ ޓީމުންކުރެ އެއްވެސް ޓީމަކަށް އޮން ޓާގެޓް ހަމަލާއެއް ފޮނުވާލެވިފައެއް ނުވޭ. އެހެންނަމަވެސް ކޮސްޓަ ރިކާ އިން އޮފް ޓާގެޓް ތިން ހަމަލާ އަދި ޖަޕާނުން ދެ ހަމަލާއެއް ފޮނުވާލާފައިވޭ.

ޖަޕާނުގެ ކުޅުންތެރިން މިހާތަނަށް 12 ފައުލެއް ކޮށްފައިވާއިރު ކޮސްޓަ ރިކާ އިން މެޗުގައި މިހާތަނަށް 4 ހަތަރު ފައުލު ކޮށްފައިވޭ. ދެ ޓީމުގެވެސް ކޮންމެ ޓީމަކުން އެއް ކުޅުންތެރިއަކަށް ރީނދޫ ކާޑު ދައްކާފައިވޭ.

13 ވަނަ މިނެޓު: ޖަޕާނުގެ ނުރައްކާތެރި ހަމަލާއެއް. އޭރިއާ ތެރެއަށް ވަދެ ޖަޕާނުގެ ރިޓްސޫ ޑުއާން ހުރަސްކޮށްދިން ބޯޅައަށް، އެ ޓީމުން ރަނގަޅު ޕޮޒިޝަނަށް އަރާނެ ކުޅުންތެރިއަކު ނުވެ، ބޯޅަ ދިޔައީ ގޯލު ކުރިމަތިން ހުރަސް ވެގެން.

ޖަޕާން އިން އެންމެފަހުން ކޮސްޓަ ރިކާ އާއި ދެކޮޅަށް ކުޅުނު ހަތަރު މެޗުގައިވެސް ބަލިވެފައެއް ނުވޭ. އޭގެތެރެއިން ތިން މެޗު ކާމިޔާބު ކުރިއިރު އަނެއް މެޗުވީ އެއްވަރު. މޮޅުވި ތިން މެޗުގައިވެސް ޖަޕާނުން ވަނީ ތިން ލަނޑު ކޯސްޓަ ރިކާ ކޮޅަށް ޖަހާފަ.