Last Updated: 3 year 2 day ago
ގަތަރުގައި ބާއްވާ ފީފާ ވޯލްޑް ކަޕް 2022 ގެ 18 ވަނަ މެޗުގައި، ގަތަރާއި ސެނެގާލްގެ ކުރިމަތިލުމުގެ ލައިވް ކަވަރޭޖް.
90 މިނެޓުގެ ކުޅުންވެސް ހަމަވެ އިތުރުވަގުތުގެ ގޮތުގައި ދެއްކި ހަ މިނެޓުގެ ކުޅުންވެސް ހަމަވެއްޖެ. 1-3 އިން ސެނެގާލް އަތުންވީ ބައްޔާއެކު ގަތަރަށް ވަނީ މުބާރާތުގައި ކުރިއަށް ދިއުމުގެ ފުރުސަތު ގެއްލިފަ.
78 ވަނަ މިނެޓު: ގަތަރުން ލަނޑެއް ޖަހައި ފަރަގު ކުޑަކޮށްފި. މި ލަނޑު އެޓީމަށް ކާމިޔާބު ކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި މުންތާރީ. މުންތާރީ ލަނޑު ޖަހާފައި ވަނީ ކުޅެން އެރިތާ ހަތަރު މިނެޓާއި އެއް ސިކުންތުގެ ތެރޭގައި. މިއީ އޭނާ ގައުމީ ޖާޒީގައި ޖެހި 13 ވަނަ ލަނޑު.
67 ވަނަ މިނެޓު: ގަތަރުގެ ވަރަށް ނުރައްކާތެރި ހަމަލާއެއް. އޭރިއާ ތެރެއަށް ހުރަސްވި ބޯޅަ ވަރަށް ރަނގަޅަށް ގޯލް ބުޑުގައި ހުރެފައި ގަތަރުގެ އިސްމާއިލް މުހައްމަދު ފޮނުވާލި ނަމަވެސް، މި ހަމަލާ ގޯލަށް ވަނުމަށް ހުރަސް އެޅީ ސެނެގާލްލގެ އިތުބާރު ކީޕަރު އެޑުއާޑް މެންޑީ.
މެޗުގައި މެންޑީ ވަނީ މުހިންމު ސޭވް ތަކެއް ކޮށްފަ.
ދެވަނަ ހާފު ފަށައިގެން ތިން މިނެޓުގެ ތެރޭގައި ސެނެގާލް އިން ދެވަނަ ލަނޑެއް ޖަހައި ލީޑު ފުޅާކޮށްފި. މި ލަނޑު އެޓީމަށް ކާމިޔާބު ކޮށްދިނީ ފަމާރާ ޑިއެޑިއޫ.
41 ވަނަ މިނެޓު: ސެނެގާލް އިން މެޗުގައި ލަނޑު ޖަހައި ލީޑު ނަގައިފި. މިލަނޑު އެޓީމަށް ކާމިޔާބު ކޮށްދިނީ ބުލާއޭ ޑިއާ.
25 ވަނަ މިނެޓު: މިހާތަނަށް އައި އިރު ސެނެގާލް ޓީމުން ވަނީ ޖުމްލަ ފަސް ހަމަލާއެއް ފޮނުވާލާފަ. އެހެންނަމަވެސް އޮން ޓާގެޓަށް ފޮނުވާ ލެވުނީ އެންމެ ހަމަލާއެއް. ގަތަރަށް މުޅި މެޗުގައިވެސް ފޮނުވާލެވުނީ އޮފް ޓާގެޓް ދެ ހަމަލާ.
20 ވަނަ މިނެޓު: މެޗުގެ ފުރަތަމަ ރީނދޫ ކާޑު ގަތަރުގެ އިސްމާއިލް މުހައްމަދު އަށް.
ފީފާ ވޯލްޑް ކަޕުގެ ގްރޫޕް ސްޓޭޖުގެ މެޗުތަކުގެ ތެރެއިން ސެނެގާލް އާއި ގަތަރު ބައްދަލުކުރާ މެޗުގައި ދެ ޓީމުން ބޭނުންކުރާ ފުރަތަމަ 11.
