މިއީ ތާރީޚުގައި ވެސް ސްޕެއިން އިން ވޯލްޑް ކަޕެއްގެ މެޗެއްގައި 7 ލަނޑު ކާމިޔާބު ކުރި ފުރަތަމަ ފަހަރު. މިއީ މި މުބާރާތުގައި އެޓީމުން މެޗެއްގެ ތެރެއިން ހޯދި އެންމެ ބޮޑު މޮޅު.

އިތުރުވަގުތުގެ ދެވަނަ މިނެޓު: މޮރާޓާގެ ބާރު ހަމަލާ ގޯލުގެ ތެރެއަށް ވައްދާލައިގެން ސްޕެއިން އިން 7 ވަނަ ލަނޑެއް ޖަހައިފި.

90 ވަނަ މިނެޓު: ސްޕެއިން އިން ހަ ވަނަ ލަނޑެއް ޖަހައިފި. މި ލަނޑު އެޓީމަށް ކާމިޔާބު ކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ކާލޮސް ސޮލާ.

75 ވަނަ މިނެޓު: ސްޕެއިން އިން ފަސް ވަނަ ލަނޑެއް ޖަހައިފި. މޮރާޓާ މަތި މަތިން ހުރަސް ކޮށްލި ބޯޅަ ފެނު ޖެހުނު ވަގުތު ވޮލީ އަކުން ގޯލާއި ދިމާލަށް ބޯޅަ ފޮނުވާލާ ދަނޑީގައި ޖައްސާލުމަށްފަހު ގޯލުުގެ ތެރެއަށް ވައްދާލައިގެން މި ލަނޑު އެޓީމަށް ކާމިޔާބު ކޮށްދިނީ ގަވީ.

72 ވަނަ މިނެޓު: ކޮސްޓަ ރިކާ އިން ބަދަލެއް. ސެލްސޯ ބޯޚޭސް ގެ ބަދަލުގައި ބްރެންޑަން ކުޅެން އަރުވައިފި.

69 ވަނަ މިނެޓު: އެސެންސިއޯގެ ބަދަލުގައި ނީކޯ ވިލިއަމްސް ކުޅެން އަރުވައިފި.

މެޗުގެ ފުރަތަމަ ރީނދޫ ކާޑު 68 ވަނަ މިނެޓުގައި: ކޮސްޓަ ރިކާގެ ފްރެންސިސްކޯ ކަލްވޯ އަށް.

64 ވަނަ މިނެޓު: ޖޯޑީ އަލްބާ އާއި ސާޖިއޯ ބުސްކެޓްސް ބާލައިފި. ބަދަލުގައި ސްޕެއިން އިން ކުޅެން އެރީ ބަލްޑޭ އާއި ކޮކޭ.

57 ވަނަ މިނެޓު: މެޗުގައި ސްޕެއިންގެ ހަތަރު ލަނޑުގެ ތެރެއިން ދެ ލަނޑު ޖަހައިދިން ފެރާން ޓޮރޭޒް އާއި މެދު ތެރޭގައި މޮޅު ކުޅުމެއް ދެއްކި ޕެޑްރީގެ ބަދަލުގައި އެންމެފަހުން ސްޕެއިން އަށް ކުޅެދިން އަށް މެޗުގެ ތެރޭގައި ފަސް ލަނޑު ޖަހައިދިން އަލްވާރޯ މޮރާޓާ އަދި އިތުބާރު މިޑްފީލްޑަރު ކާލޮސް ސޮލާ ކުޅެން އަރުވައިފި.

54 ވަނަ މިނެޓު: އިންޑިވިޖުއަލް މޮޅު ކުޅުމަކާއެކު ކޮސްޓަ ރިކާގެ ޑިފެންސްލައިން ފޫ އަޅުވާލުމަށްފަހު ފެރާން ޓޮރޭޒް ސްޕެއިންގެ ހަތަރު ވަނަ ލަނޑު ޖަހައިދީފި.

ކޮސްޓަ ރިކާ އިން ފުރަަތަމަ ހާފު ނިންމާލިއިރު އެންމެ ޝޮޓެއްވެސް ފޮނުވާލާފައެއް ނުވޭ. މިއީ 1990 ވަނަ އަހަރު ސްވިޑަން އާއި ބައްދަލުކުރި މެޗަށްފަހު ވޯލްޑް ކަޕެއްގެ މެޗެއްގައި ހަމަލާއެއް ފޮނުވާ ނުލެވި ކޮސްޓަ ރިކާ އިން ފުރަތަމަ ހާފު ނިންމާލި ފުރަތަމަ ފަހަރު.

ކޮސްޓަ ރިކާ އިން ދެވަނަ ހާފު ފެށީ ބަދަލަކާއި އެކު. އެގޮތުން ކާލޯސް މާޓިނޭޒްގެ ބަދަލުގައި ކެންޑަލް ވެސްޓަން ވަނީ ކުޅެން އަރުވާފަ.

ސްޕެއިން އާއި ކޮސްޓަ ރިކާ ބައްދަލުކުރާ މެޗުގެ ދެވަނަ ހާފު ފަށައިފި. ފުރަތަމަ ހާފު ކޮސްޓަ ރިކާ އިން ނިންމާލިއިރު 100 ޕާސް ވެސް ހަމަ ނުވޭ.

އިތުރުވަގުތުގެ ފަހު މިނެޓު: ހަތަރު ވަނަ ލަނޑެއް ޖަހަން ރަނގަޅު ފުރުސަތެއް. އޭރިއާ ތެރޭގައި ހުރެފައި މާކޯ އެސެންސިއޯ ފޮނުވާލި ހަމަލާ ދިޔައީ ގޯލާއި މާ ދުރުން ބޭރަށް.

45 މިނެޓުގެ ކުޅުން ހަމަވެ އިތުރު ވަގުތުގެ ގޮތުގައި ފަސް މިނެޓު ވަނީ ދައްކާފަ

މެޗުގެ ސްޕީޑު ދަށް ވެއްޖެ. ގިނަވަގުތު ބޯޅަ ހިފަހައްޓައިގެން މެދު ތެރޭގައި ގިނަ ޕާސްތަކެއް ކޮށްގެން ކުޅެނީ ސްޕެއިން. މިވަގުތާއި ހަމައަށް 463 ޕާސް ސްޕެއިންގެ ކުޅުންތެރިން ކޮށްފައިވޭ.

31 ވަނަ މިނެޓު: ޕެނަލްޓީ ކާމިޔާބު ކޮށް ފެރާން ޓޮރޭޒް ސްޕެއިންގެ ތިންވަނަ ލަނޑު ޖަހައިދީފި.

އޭރިއާ ތެރެއިން ޖޯޑީ އަލްބާއަށް ކޮސްޓަ ރިކާގެ ކުޅުންތެރިއަކު ކުރި ފައުލަކާއި ގުޅިގެން ޕެނަލްޓީއެއް.

ފުރަތަމަ ހާފުގެ 30 މިނެޓު ހަމަވެގެން ދިޔައިރު އަދިވެސް ކޮސްޓަ ރިކާ އަކަށް މެޗުގައި ސްޕެއިން އަށް ޕްރެޝާ ކޮށް ހަމަލާއެއް، އޮން ޓާގެޓަށްވެސް އަދި އޮފް ޓާގެޓަށްވެސް އުފެއްދިފައެއް ނުވޭ. މެޗުގެ ބޯލް ޕޮޒެޝަންގެ 85 އިންސައްތަ ޑޮމިނޭޓު ކުރަނީ ސްޕެއިން އިން.

20 ވަނަ މިނެޓާއި ހަމައަށް އައި އިރު ސްޕެއިން އިން ވަނީ މިމެޗުގައި މިހާތަނަށް ތިން ހަމަލާއެއް ފޮނުވާލައި، އެއް ހަމަލާ ގޯލާއި އަމާޒު ކޮށްލާފަ.

ކޮސްޓަ ރިކާ އަކަށް އަދި މެޗުގައި ހަމަލާއެއް އުފެއްދިފައެއް ނުވޭ.

ސްޕެއިިންގެ ގަވީ އަދި ޕެޑްރީގެ އިތުރުން ކޮސްޓަ ރިކާގެ ޖެވިސަން މި މެޗުން ފެނިގެންދާއިރު މިއީ، 1994 ވަނަ އަހަރަށްފަހު ވޯލްޑް ކަޕުގައި އެއް މެޗެއްގެ ތެރެއިން ތިން ޓީނޭޖަރުން ނުވަތަ 19 އަހަރުން ދަށުގެ ތިން ކުޅުންތެރިން ފެނިގެންދާ ފުރަތަމަ މެޗު. 1994 ވަނަ އަހަރު ބްރެޒިލް އާއި ކެމަރޫން ބައްދަލުކުރި މެޗުގައިވެސް ތިން ޓީނޭޖާސް ފެނިގެންދިޔަ.

މެޗުގައި ސްޕެއިން ޓީމުން ފެނިގެންދާ ގަވީ (18 އަހަރާއި 110 ދުވަސް) ކޮސްޓަ ރިކާގެ ޖެވިސަން ބެނެޓް (18 އަހަރާއި 161 ދުވަސް) އަކީ ވޯލްޑް ކަޕުގެ ތާރީޚުގައިވެސް މި ދެ ޓީމުންވެސް މެޗެއްގައި ބޭނުންކުރާ އެންމެ އުމުރުން ހަގު ދެ ކުޅުންތެރިން.

ފުރަތަމަ ފަސް މިނެޓުގެ ތެރޭގައި ސްޕެއިންގެ ނުރައްކާތެރި ހަމަލާއެއް. އޭރިއާ ތެރޭގައި ހުރެފައި އެޓީމުގެ ފޯވާޑް ޑެނީ އޮލްމޯ ފޮނުވާލި ބޯޅަ ދިޔައީ ގޯލާއި އަމާޒު ނުވެ.