22 Nov 2022, 18:33
ރީތި ތާރީޚުގައި ގިނަ މީހުން ކައިވެނިކުރުން ރާއްޖޭގައި ވެސް ސަގާފަތަކަށް ވެފައިވާއިރު، މިއަދުގެ ރީތި ތާރީޚުގައި މާލޭގެ ފެމިލީ ކޯޓުގައި 29 ކައިވެނި ރަޖިސްޓްރީކޮށްދީފިއެވެ.
ފެމިލީ ކޯޓުން ބުނީ މި ދުވަސްވަރަކީ ކައިވެނި މަދު ދުވަސްވަރެއްކަމަށެވެ. އެގޮތުން މިހާރު އާންމުކޮށް، ދުވާލެއްގެ މައްޗަށް ފެމިލީ ކޯޓުން ކޮށްދެނީ ގިނަ ވެގެން 10 ކައިވެނި ކަމަށް އެ ކޯޓުން ބުންޏެވެ.
މި މަހުގެ 11ވަނަ ދުވަހަކީ ވެސް ރީތި ތާރީޚަކަށްވާ އިރު އެ ދުވަހު ފެމިލީ ކޯޓުގައި ރަޖިސްޓްރީ ކޮށްގެން ކުރީ 16 ކައިވެންޏެވެ.
މި އަހަރު އެންމެ ގިނަ ކައިވެނި ކުރީ، މިއަހަރުގެ އެންމެ ރީތި ތާރީޚު ކަމަށްވާ 22.02.22ގައެވެ. އެ ދުވަހު ފެމިލީ ކޯޓުގައި ރަޖިސްްޓްރީކޮށްގެން 85 ކައިވެނި ވަނީ ކޮށްފައެވެ.
22.2.22ގައި މާލޭގެ ފެމިލީ ކޯޓުގައި 85 ކައިވެނި ރަޖިސްޓްރީކުރި -- ސަން ފޮޓޯ/ މުހައްމަދު ހައްޔާން
މިއަހަރު ދެން އައި އެންމެ ރީތި ތާރީޚަކީ 02.02.22 އެވެ. އެ ދުވަހު މާލޭގައި ވަނީ 39 ކައިވެނި ކޮށްފައެވެ.
މިދިޔަ ޑިސެމްބަރު މަހު އައި ރީތި ތާރީޚެއް ކަމަށްވާ 21.12.21ގައި ފެމިލީ ކޯޓުން ވަނީ 57 ކައިވެނި ކޮށްދީފައެވެ. އެއީ މިދިޔަ އަހަރު އެންމެ ގިނަ ކައިވެނި ކުރި ދުވަހެވެ.