ވީއޭއާޜް ބެލުމަށްފަހު ރެފްރީ ނިންމީ ޑެންމާކަށް ޕެނަލްޓީ ދޭން ނުޖެހޭ ކަމަށް.

އިތުރުވަގުތުގެ ތިންވަނަ މިނެޓު: އޭރިއާ ތެރެއިން ޓިއުނީޝީއާ ކުޅުންތެރިއެއްގެ އަތުގައި ޖެހުނީ ކަމަށް ބަލާ ވީއޭއާރް ބަލަނީ.

90 މިނެޓުގެ ކުޅުން ހަމަވެ އިތުރުވަގުތުގެ ގޮތުގައި ފަސް މިނެޓު ދައްކައިފި.

88 ވަނަ މިނެޓު: ޓިއުނީޝިއާ އިން އިތުރު ދެ ބަދަލެއް. މުހައްމަދު ޑްރެގާ އާއި ލައިޑޫނީގެ ބަދަލުގައި ވަޖްދީ އަދި ފެރްޖާނީ ކުޅެން އަރުވައިފި.

ބަދަލު ކުޅުންތެރިއެއްގެ ގޮތުގައި ކުޅެން އެރި ހަނިބާލް އަކީ ތާރީޚުގައިވެސް ޓީއުނީޝިއާގެ ގައުމީ ޓީމުގެ ޖާޒީގައި ވޯލްޑް ކަޕް ކުޅޭ ދެވަނަ ޓީނޭޖަރު.

80 ވަނަ މިނެޓު: ޓިއުނީޝިއާއިން ދެ ބަދަލެއް ގެނެސްފި. ޔޫސުފް ސަކްނީ އާއި އިއްސާމް ޖެބާލީގެ ބަދަލުގައި ހަނިބާލް އާއި ތާހާ ޔާސީން ވަނީ ކުޅެން އަރުވާފަ.

78 ވަނަ މިނެޓު: ނައީމް ސްލިޓީ އަށް ކުރި ފައުލަކާއި ގުޅިގެން ޑެންމާކުގެ ޔެންސަން އަށް ރީނދޫ ކާޑެއް.

65 ވަނަ މިނެޓު: ޑެންމާކުން ދެ ބަދަލެއް ގެނެސްފި. އަންދްރެއާޒް އޯލްސަން އާއި ކެސްޕާ ޑޮލްބާގުގެ ބަދަލުގައި ކުޅެން އެރީ ކޯނީލިއަސް އާއި ލިންޑްސްޓްރޮމް.

60 މިނެޓުގެ ކުޅުން ހަމަވިއިރު، ޓިއުނީޝިއާ އިން މެޗުގައި 13 ހަމަލާ ފޮނުވާލި. ގޯލާއި އަމާޒުވީ އެންމެ ހަމަލާއެއް.

ޑެންމާކުން ހަތަރު ހަމަލާ ފޮނުވާލިއިރު ދެ ހަމަލާއެއް ގޯލާއި އަމާޒުކޮށްލި.

މެޗުގެ ޕޮޒެޝަން އިންސަތަ، 62 އިންސައްތައިން ޑޮމިނޭޓު ކުރަނީ ޑެންމާކް.

މެޗުގައި މިހާތަނަށް ޑެންމާކުގެ ފަރާތުން ހަ ފައުލް އަދި ޓިއުނީޝިއާގެ ފަރާތުން ފަސް ފައުލު ފެނިގެން ގޮސްފައިވޭ.

ދެވަނަ ހާފުގެ ފަސް މިނެޓު ކުޅެވުނުއިރު އަދިވެސް މޮޅަށް ކުޅެނީ ޓިއުނީޝިއާ އިން. ޑެންމާކް ޕްރެޝަރަށް ވެއްޓިފައި.

ދެވަނަ ހާފުގެ ކުޅުން ފަށައިފި. ޓިއުނީޝިއާއިން ފެށީ ވަރުގަދަކޮށް. ރަނގަޅު ފުރުސަތެއްވެސް ތަނަވަސްކޮށްފި.

ފުރަތަމަ ހާފުގެ އިތުރުވަގުތުގެ ގޮތުގައި ދެއްކި ހަތަރު މިނެޓުވެސް ހަމަވެއްޖެ. ނަތީޖާއަކަށް ބަދަލެއް ނާދޭ.

މި ހާފުގައި ޓިއުނީޝިއާ އިން ވަނީ ޖުމްލަ 8 ހަމަލާއެއް ފޮނުވާލާފަ. އޭގެތެރެއިން ގޯލާއި އަމާޒުވީ އެންމެ ހަމަލާއެއް. ޑެންމާކުން ތިން ހަމަލާއެއް ފޮނުވާލިއިރު ދެ ހަމަލާއެއް ވަނީ އަމާޒުކޮށްލާފަ.

އިތުރުވަގުތުގެ ފުރަތަމަ މިނެޓު: ކަކުލަށް ލިބިފައިވާ އަނިޔާ އަކާއި ގުޅިގެން ޑެންމާކުގެ ތޯމަސް ޑިލެއިނީގެ ބަދަލުގައި ޑެމްސްގާޑް ކުޅެން އަރުވައިފި.

45 މިނެޓުގެ ކުޅުން ހަމަވެ އިތުރުވަގުތުގެ ގޮތުގައި ހަތަރު މިނެޓު ވަނީ ދައްކާފަ.

40 މިނެޓު ކުޅެވުނުއިރު މެޗުގައި ގިނަވަގުތު ބޯޅަ ހިފަހައްޓައިން ކުޅުނީ ޑެންމާކުން. ޓިއުނީޝިއާ އިން ބޮޑަށް ބަލަނީ ކައުންޓަރ އެޓޭކުތަކުން ތަނަވަސްވާ ފުރުސަތުތަކުގެ ބޭނުން ހިފަން. މިހާތަނަށް އައިއިރު މިގޮތަށް ކައުންޓަރ އެޓޭކުތަކުގެ ބޭނުންހިފާ ޓިއުނީޝިއާ އިން ހަ ހަމަލާއެއް ފޮނުވާލާފައިވޭ. އެހެންނަމަވެސް މީގެއިން އެއްވެސް ހަމަލާއެއް ގޯލާއި އަމާޒުވެފައެއް ނުވޭ.

އެއާ ހިލާފަށް ޑެންމާކުން ފޮނުވާލި ތިން ހަމަލާގެ ތެރެއިން ދެ ހަމަލާއެއް ވަނީ ގޯލާއި އަމާޒުވާހެން ފޮނުވާލާފަ.

37 ވަނަ މިނެޓު: ޓިއުނީޝިއާގެ ނުރައްކާތެރި ހަމަލާއެއް. ހަނި އޭންގަލް އަކުން ލައިޑޫނީ ފޮނުވާލި ހަމަލާ އަމާޒުވީ ގޯލުގެ އަރިމަތީ ބޭރު ދާގަނޑަށް.

މެޗުގެ 24 ވަނަ މިނެޓު: ފުރަތަމަ ރީނދޫ ކާޑު ޑެންމާކުގެ ކްރިސްޓެންސަން އަށް.

22 ވަނަ މިނެޓު: ޓިއުނީޝިއާއިން ގޯލުގެ ތެރެއަށް ބޯޅަ ވައްދާލައިފި. މުޅިން ހުސްކޮށް ހުރެ ޖެބާލީ އޭރިއާ ތެރެއަށް ވަދެފައި ފޮނުވާލި ބޯޅަ ގޯލުގެ ތެރެއަށް ވަން ނަމަވެސް، ރެފްރީ ނިންމީ އޭނާއަށް ބޯޅަ ލިބުނުއިރު ހުރީ އޮފްސައިޑުގައި ކަމަށް. މިއީ ލަނޑެއް ކަމަށް ބަލައި ނުގަތް.

15 ވަނަ މިނެޓު: މެޗު ފަށައިގެން މިހާތަނަށް އައިއިރު ގިނަވަގުތު ބޯޅަ ހިފަހައްޓައިގެން މޮޅަށް ކުޅުނީ ޓިއުނީޝިއާ އިން. އެޓީމުން ވަނީ މިހާތަނަށް ހަތަރު ހަމަލާއެއް ފޮނުވާލާފަ. އެހެންނަމަވެސް މި ހަމަލާތަކުގައި ބޯޅަ ގޯލާއި އަމާޒުވެފައެއް ނުވޭ.

މިހާތަނަށް ކުޅުނު 15 މިނެޓުގެ ތެރޭގައި ބޯލް ޕޮޒެޝަންގެ 53 އިންސައްތަ ހިފަހައްޓާފައި ވަނީ ޓިއުނީޝިއާ އިން.

މިއީ ގްރޫޕް ޑީގެ ފުރަތަމަ މެޗު. ރެފްރީގެ ކަށިގަނޑާއެކު މެޗު ފަށައިފި.