22 Nov 2022, 13:53
މިދިޔަ އާދިއްތަ ދުވަހުގެރޭ ފެށި ފީފާ ވޯލްޑް ކަޕް 2022 ގައި މިހާތަނަށް އައިއިރު، އެންމެ ގިނަ ބަޔަކު އެންމެ އިންތިޒާރު ކުރާ އެއް މެޗު މިއަދު މެންދުރުފަހު 3:00 ގައި ފަށާނެއެވެ.
ދުނިޔޭގައިވެސް އަދި ދިވެހިރާއްޖޭގައިވެސް އެންމެ ގިނަ ބަޔަކު ވަކި ކުޅުންތެރިއަކަށް އެންމެ ގިނައިން ސަޕޯޓުކުރާ ކުޅުންތެރިޔާ މިއަދުގެ ފުރަތަމަ މެޗުގައި ކުޅޭނެތީއެވެ.
ފުޓުބޯޅައިގެ ތާރީޚުގައިވެސް އުފެދުނު އެންމެ މޮޅު ދެ ކުޅުންތެރިންތެރެއިން އެއް ކުޅުންތެރިޔާ މިއަދުގެ މެޗުގައި ކުޅޭތީއެވެ.
ލިއޮނެލް މެސީ އެ ގައުމަކަށް ނިސްބަތްވާ، ސައުތު އެމެރިކާ ބައްރުގެ ޗެމްޕިއަން އާޖެންޓީނާ އާއި އޭޝިއާ ޕެސިފިކް ސަރަހައްދުގެ ސައުދީ އަރަބިއްޔާ މިއަދުގެ މެޗުގައި ކުރިމަތިލާނެއެވެ.
މެޗު ކުޅޭނެ ދަނޑު
ގަތަރުގެ ލުސެއިންގައި ހުންނަ ލުސެއިލް ސްޓޭޑިއަމް
ފެންވަރުގެ ގޮތުން ބޮޑު ތަފާތެއް އޮތް މި ދެޓީމު ބައްދަލުކުރާ މެޗު ކުޅޭނީ ގަތަރުގެ ލުސެއިލް ސްޓޭޑިއަމުގައެވެ.
މިއީ ގަތަރުގައި ހުރި އެންމެ ބޮޑު ސްޓޭޑިއަމެވެ. މިއީ 80،000 މީހުންގެ ޖާގައިގެ ސްޓޭޑިއަމެކެވެ.
މި ދަނޑަށް އެންމެ ގިނައިން މީހުން ވަދެފައިވާކަމަށް ރިކޯޑުތަކުން ދައްކަނީ ލުސެއިލް ސުޕާ ކަޕުގެ މެޗެއްގައެވެ. އެއީ 77،575 މީހުންނެވެ.
މި ރެކޯޑު މިއަދުގެ މެޗުގައި މުގުރާލުމުގެ ފުރުސަތު އެބައޮތެވެ. އެއީ ފީފާއިން ހާމަކޮށްފައިވާ ގޮތުގައި، މިއަދުގެ މެޗަށް ކަނޑައަޅާފައިވާ ހުރިހާ ޓިކެޓެއް ވިކިފައިވާތީއެވެ. އާޖެންޓީނާއިން މުބާރާތުގެ ގްރޫޕް ސްޓޭޖުގައި ކުޅޭ ތިން މެޗުގެވެސް ހުރިހާ ޓިކެޓެއް ވިކި ހުސްވެފައިވާކަން ފީފާއިން ހާމަކޮށްފައިވެއެވެ.
އާޖެންޓީނާ
އާޖެންޓީނާ އިން މި މުބާރާތާއި ކުރިމަތިލާއިރު އެޓީމުގެ އަމާޒަކީ ކޮބައިކަން ވަރަށް ސާފެވެ. އެތައް އިންޓަވިއުއެއްގައި ނުވަތަ މީސްމީޑިއާގެ މަންސަތައް ބޭނުންކޮށްގެން އެޓީމުގެ ކުޅުންތެރިން ވަނީ، މުބާރާތަށް އެޓީމު ނުކުންނަ ޓާގެޓު ހާމަކޮށްފައެވެ.
މުބާރާތާއި ކުރިމަތިލާ ކޮންމެ ޓީމެއްގެވެސް އަޒުމަކަށް ވާނީ މި ޝަރަފުވެރި ތަށި އުފުލާލުމެވެ. އާޖެންޓީނާގެވެސް މި އަޒުމު އޮތްނަމަވެސް، އެޓީމުގެ ކުޅުންތެރިން ބުނަނީ މިފަހަރުގެ ވޯލްޑް ކަޕާއި މި ކުރިމަތިލަނީ ޓީމުގެ ކެޕްޓަން ލިއޮނެލް މެސީ އަށް ވޯލްޑް ކަޕް ތަށި ހޯދައިދޭން ކަމަށެވެ.
ބެލެވޭ ގޮތުގައި މިއީ މެސީ ވޯލްޑް ކަޕެއްގައި ކުޅޭނެ ފަހު ފަހަރެވެ. އުމުރުން 35 އަހަރުގެ މެސީގެ ފުޓުބޯޅަ ކެރިއަރުގައި އޭނާއަށް ނުހޯދި އޮތް ހަމައެކަނި ކާމިޔާބީ އަކީ ވޯލްޑް ކަޕްގެ ތަށި އުފުލާލުން އެކަންޏޭ ބުނުމަކުން ދޮގަކަށް ނުވާނެއެވެ.
ކުލަބު ލެވެލްގައި އާއި ވަކިވަކި ކުޅުންތެރިންނަށް ފުޓުބޯޅައިގައި ލިބޭނެ ހުރިހާ އެވޯޑަކާއި ޝަރަފެއް މެސީ ވަނީ ހޯދާފައެވެ.
އެހެންކަމުން ފަހު ފުރުސަތުގައި، ނުލިބި އޮތް މި ޝަރަފު މެސީއަށް ހޯދައިދިނުމަށް އެޓީމުން ގަދައަޅާ މަސައްކަތްތަކެއް ކުރާނެއެވެ.
ޝައްކެއްވެސް ނެތް ގޮތުގައި އާޖެންޓީނާ އަކީ މުބާރާތުގެ އެންމެ ކާމިޔާބު އެއް ޓީމެވެ. ދެ ފަހަރެއްގެ މަތިން އަހަރުތަކެއް ކުރިން މި މުބާރާތް އެގައުމުން ކާމިޔާބު ކޮށްފައިވާއިރު، ތިން ފަހަރެއްގެ މަތިން ރަނަރަޕް ކަން ވެސް ހޯދާފައިވެއެވެ.
އެންމެފަހުން ކުޅުނު ފަސް މެޗު:
އާޖެންޓީނާ 5-0 ޔުނައިޓެޑް އަރަބް އެމިރޭޓްސް ( 16 ނޮވެމްބަރު)
- އާޖެންޓީނާ 3-0 ޖަމައިކާ (28 ސެޕްޓެމްބަރު)
- އާޖެންޓީނާ 3-0 ހޮންޑިއުރަސް (24 ސެޕްޓެމްބަރު)
- އާޖެންޓީނާ 5-0 އެސްޓޯނިއާ (5 ޖޫން)
- އާޖެންޓީނާ 3-0 އިޓަލީ (ދެ ބައްރުގެ ޗެމްޕިއަނުންގެ މެޗު 1 ޖޫން)
ސައުދީ އަރަބިއްޔާ
"ދަ ގްރީން ފެލްކަން"ގެ ނަމުން މަޝްހޫރުވެފައިވާ ސައުދީ އަރަބިއްޔާގެ ގައުމީ ފުޓުބޯޅަ ޓީމުން ވަނީ ޖުމްލަ ފަސް ފަހަރެއްގެ މަތިން ފީފާ ވޯލްޑް ކަޕުގައި ކުޅެފައެވެ.
މި މުބާރާތުގައި އެ ގައުމަށް އެންމެ ރަނގަޅު ނަތީޖާއެއް ނެރެވިފައިވަނީ 1994 ވަނަ އަހަރުގެ ވޯލްޑް ކަޕުގައެވެ. އެއީ އެޓީމުން މި މުބާރާތަށް ކޮލިފައިވި ފުރަތަމަ ފަހަރުވެސް މެއެވެ. އެފަހަރު ސައުދީން ވަނީ މުބާރާތުގެ ރައުންޑް އޮފް 16 ގައި ކުޅެފައެވެ.
ބައިނަލްއަގްވާމީ ފުޓުބޯޅައިގައި މާބޮޑު ކާމިޔާބެއް ނުލިބުނު ކަމުގައިވީނަމަވެސް، ސައުދީ އަކީ އޭޝިއާ ސަރަހައްދުގެ ފުޓުބޯޅައިގައި ގަދަ ބާރެކެވެ. އެޓީމުން ވަނީ އޭއެފްސީ އޭޝިއަން ކަޕް ތިން ފަހަރު ކާމިޔާބުކޮށް މުބާރާތުގެ ރަނަރަޕް ކަންވެސް ތިން ފަހަރަށް ހޯދާފައެވެ.
އެހެންނަމަވެސް 2011 ވަނަ އަހަރުން ފެށިގެން މި މުބާރާތުގައިވެސް ސައުދީ އަށް މާ އެދެވޭ ނަތީޖާއެއް ނެރެވިފައެއް ނުވެއެވެ.
އެންމެފަހުން ކުޅުނު ފަސް މެޗު:
ސައުދީ 0-1 ކްރޮއޭޝިއާ (16 ނޮވެމްބަރު)
- ސައުދީ 1-1 ޕެނަމާ (10 ނޮވެމްބަރު)
- ސައުދީ 1-0 އައިސްލޭންޑް (1 ނޮވެމްބަރު)
- ސައުދީ 1-0 ނޯތު މެސަޑޯނިއާ (22 އޮކްޓޯބަރު)
- ސައުދީ 0-0 ޔޫއެސްއޭ (27 ސެޕްޓެމްބަރު)
ޓީމުތަކުން ބޭނުންކުރާނެ ކަމަށް ބެލެވޭ ފުރަތަމަ 11:
އާޖެންޓީނާ: (1-3-2-4)
- ކީޕަރު: އެމީ މާޓިނޭޒް
- ޑިފެންޑަރުން: ނަހުއެލް މޮލީނާ، ނިކޮލަސް އޮޓަމެންޑީ، ލިސާންޑްރޯ މާޓިނޭޒް، ނިކޮލަސް ޓެގްލިއަފިކޯ.
- މިޑްފީލްޑަރުން: ލިއާންޑްރޯ ޕަރޭޑޭސް، ރޮޑްރިގޯ ޑި ޕައުލް، ގެއިޑޯ ރޮޑްރިގޭޒް.
- ފޯވާޑުން: އެންހެލް ޑިމަރިއާ، ލިއޮނެލް މެސީ، ލައުޓާރޯ މާޓިނޭޒް
ސައުދީ އަރަބިއްޔާ: (1-3-2-4)
- ކީޕަރު: މުހައްމަދު އަލް އުވެއިސް
- ޑިފެންޑަރުން: އަލީ އަލް ބުލައިހީ، ސުލްތާން އަލް ޣަނަމް، އަލް އަމްރީ، އަލް ޝަޙްރާނީ.
- މިޑްފީލްޑަރުން: އަލް ފަރާޖް، އަބްދުﷲ އޮތައިފް، އަލް މުވައްލަދް، ހައްތާން ބަހެބްރީ، ނާސިރް އަލް ދައުސަރީ.
- ފޯވާޑުން: ފިރާސް އަލް ބުރައިކާން.
ދެޓީމުގެ ތަރިން:
އާޖެންޓީނާ: ލިއޮނެލް މެސީ
ފުޓުބޯޅައިގެ ކުޑަވެސް އިލްމެއް ހުރި އެއްވެސް މީހަކަށް، މެސީ އަކީ ކާކުކަން ބުނެދޭކަށް ނުޖެހޭނެއެވެ.
ފުޓުބޯޅައިގަ ވަކިވަކި ކުޅުންތެރިންނަށްދޭ އެވޯޑުތައް ގާތްގަނޑަކަށް 17 އަހަރު ވަންދެން ޑޮމިނޭޓު ކުރީ މެސީ އާއި، ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އެވެ.
ބާސެލޯނާ އިން ކެރިއަރު ފަށައި، އެޓީމާއެކު އެތައް ކާމިޔާބީތަކެއް ހޯދުމަށްފަހު 2021 ވަނަ އަހަރުގެ ތެރޭގައި ފްރާންސްގެ ޕީއެސްޖީއަށް ބަދަލުވި މެސީ އަކީ، ޝައްކެއްވެސް ނެތް ގޮތުގައި އިދިކޮޅަށް ނުކުންނަ ކޮންމެ ޓީމެއްގެ ޑިފެންސް ލައިނުވެސް އެންމެ ޖެހިލުންވާނެ ކުޅުންތެރިޔާއެވެ. އިދިކޮޅު ޓީމުތަކުގެ ކޯޗުންގެ ހަމަނިދި ނަގާލާ ކުޅުންތެރިޔަކީވެސް ހަމަ މެސީ އެވެ.
މެސީ ނުވަތަ ރޮނާލްޑޯގެ ކާމިޔާބީތަކުގެ ވާހަކަދައްކާނަމަ އެކަމަށް ހާއްސަ ރިޕޯޓެއް ގެނެސްދިނުމުން ނޫނީ ނުފުދޭނެއެވެ. އެހާވެސް އެ ދެ ކުޅުންތެރިންގެ ހައިބަތު ބޮޑެވެ.
މި ރިޕޯޓުގައި ބަލައިލާނީ ގައުމީ ޓީމާއެކު މެސީގެ ކާމިޔާބީތަކަށެވެ.
އާޖެންޓީނާގެ ސީނިއަރ ގައުމީ ޓީމަށް މެސީ ކުޅެން ފެށީ 2005 ވަނަ އަހަރުއެވެ. މިހާތަނަށް ގައުމީ ޓީމަށް 165 މެޗު ކުޅެދީފައިވާ މެސީ ވަނީ ގައުމީ ޖާޒީގައި 95 ލަނޑު ކާމިޔާބު ކޮށްދީފައެވެ.
އާޖެންޓީނާގެ ފުޓުބޯޅައިގެ ތާރީޚުގައިވެސް އެގައުމުގެ ގައުމީ ޓީމަށް އެންމެ ގިނަ މެޗު ކުޅެދިން ކުޅުންތެރިއަކީ މެސީ އެވެ. ޓީމަށް އެންމެ ގިނަ ލަނޑު ޖަހައިދީފައިވާ ކުޅުންތެރިއަކީވެސް އެއީއެވެ.
ވޯލްޑް ކަޕް މެޗެއްގައި އާޖެންޓީނާއަށް ލަނޑު ޖަހައިދިން އެންމެ ހަގު ކުޅުންތެރިޔާގެ ޝަރަފުވެސް އޮތީ މެސީގެ އަތުގައެވެ. އެއީ އުމުރުން 18 އަހަރާއި 357 ދުވަހުން ލަނޑު ޖަހައިގެންނެވެ. މި ތާރީޚީ ލަނޑު މެސީ ޖަހާފައިވަނީ 2006 ވަނަ އަހަރު ސާބިއާ އެންޑް މޮންޓެނޭގްރޯ ކޮޅަށެވެ.
7 ފަހަރަށް ބެލަންޑޯ އެވޯޑު ހޯދާފައިވާ މެސީ ވަނީ ގައުމީ ޓީމާއެކުވެސް ކާމިޔާބީތަކެއް ހޯދާފައެވެ. އެގޮތުން 2021 ވަނަ އަހަރުގެ ކޮޕާ އެމެރިކާ ކާމިޔާބު ކުރުމާއި، 2014 ވަނަ އަހަރުގެ ވޯލްޑް ކަޕުގެ ރަނަރަޕް ކަން ހޯދުމުގެ އިތުރުން 2022 ވަނަ އަހަރު ކުޅުނު ފިނަލިސިމާ ނުވަތަ ދެ ބައްރުގެ ޗެމްޕިއަނުންގެ މެޗުގެ ޓްރޮފީ އާޖެންޓީނާއިން އުފުލާލީ މެސީގެ ކެޕްޓަން ކަޕުގެ ދަށުންނެވެ.
މެސީ މި ފަހަރުގެ ވޯލްޑް ކަޕަށް ނުކުންނާނީ އޭނާގެ ލަގަސީގައި މަދުވާ ހަމައެކަނި ކާމިޔާބީ ހޯދުމުގެ ވަރުގަދަ އަޒުމުގައެވެ.
ސައުދީ އަރަބިއްޔާ: ސަލްމާން އަލް ފަރާޖް
ސައުދީ ޓީމުގެ ކެޕްޓަން ސަލްމާން އަލް ފަރާޖަކީ މިވަގުތު އެޓީމުގައި ހުރި އެންމެ މުހިންމު އެއް ކުޅުންތެރިޔާއެވެ.
33 އަހަރުގެ ފަރާޖް ކްލަބް ފެންވަރުގައި ކުޅެނީ ސައުދީގެ އަލް ހިލާލް ޓީމަށެވެ. އެޓީމަށް 2008 ވަނަ އަހަރުން ފެށިގެން 211 މެޗު ކުޅެދީފައިވާއިރު 17 ލަނޑު ޖަހާފައިވެއެވެ.
2012 ވަނަ އަހަރު ސައުދީގެ ގައުމީ ޓީމަށް ކުޅެންފެށި ފަރާޖް ވަނީ މިހާތަނަށް ގައުމީ ޖާޒީގައި 70 މެޗު ކުޅެ، މިޑްފީލްޑަރެއްގެ ގޮތުގައި އަށް ލަނޑު ކާމިޔާބު ކޮށްފައެވެ.
ގައުމީ ޓީމާއެކު ފަރާޖަށް އަދި އެއްވެސް ކާމިޔާބީއެއް ހޯދިފައެއް ނުވެއެވެ.