20 Nov 2022, 23:22
ބައިސްކޯފުން އިންތިޒާމުކޮށްގެން މިދިޔަ މަހު 29ވަނަ ދުވަހުގެ ރޭ ބޭއްވި "ޗަނާޗާ 2022" މިއުޒިކް ޝޯގެ ނަސީބުވެރިޔާ ހޮވާ، ރޭ އޭނާއަށް އިނާމު ދީފިއެވެ.
ޝޯގެ ޓިކެޓް ގަތް މީހުންގެ ތެރެއިން ނަސީބުވެރިއަކަށް ބެނެލީގެ ފަރާތުން ހަދިޔާ ކޮށްފައިވާ، ފަނަރެއާ ސައިކަލެއް ހަދިޔާކުރާނެކަން ބައިސްކޯފުން އޮތީ އިއުލާންކޮށްފައެވެ.
އެ ޝޯގެ ޓިކެޓު ގަތް 3036 މީހުންގެ ތެރެއިން ނަސީބުވެރިއަކަށް ހޮވުނީ ސްރީ ލަންކާއަށް ނިސްބަތްވާ، ކޮކު ހަނާޑިގެ ކަމީލާ ސަންޖީވަނީ އެވެ. ނަސީބުވެރިޔާ ހޮވާފައި ވަނީ މިދިޔަ ހަފުތާގައި ބޭއްވި ބައިސްކޯފު ލައިވްއެއްގެ ތެރެއިންނެވެ.
ޗަނާޗާ ޝޯ ކުރިއަށްގެންގޮސްފައިވަނީ، ހުޅުމާލޭ ސިންތަޓިކް ޓްރެކްގައެވެ. އެ ޝޯ ރޭގަނޑު ކުރިއަށްދިޔައިރު، ޝޯ ބެލުމުގެ އިންތިޒާމު ހަމަޖައްސާފައި އޮތީ ޓިކެޓް ވިއްކައިގެންނެވެ. ޓިކެޓް ވިއްކައިގެން ޝޯ ބޭއްވި ނަމަވެސް ލިބުނު ތަރުހީބުގެ ބޮޑުކަމުން ޝޯ ބެލުމަށް ޚާއްސަކުރި ސަރަހައްދު އޮތީ މުޅިން ފުރިފައެވެ.
ޗަނާޗާ ޝޯ ބައިސްކޯފު
އެ ޝޯއަށް ބޮޑު ތަރުހީބެއް ލިބުނުއިރު، ރައީސް އިބްރާހީމް މުޙައްމަދު ޞާލިޙްވެސް ވަނީ ސިންތަޓިކް ޓްރެކަށް ވަޑައިގެން ޝޯ ބައްލަވާލައްވާފައެވެ.
އެ ޝޯގައި ރާއްޖޭގެ އާޓިސްޓުންގެ އިތުރުން އަވައްޓެރި ސްރީލަންކާގެ މަޝްހޫރު ލަވަކިއުންތެރިޔާ ޔޮހާނީ ދިލޯކާ ޑިސިލްވާ ބައިވެރިވެ، އޭނާގެ އެންމެ މަގުބޫލު ލަވަ ކަމަށްވާ "މަނިކޭ މަގޭ ހިތޭ" އަޑު އިއްވާލިއެވެ.
ބައިސްކޯފުން ވަނީ މި ޝޯގެ ވީއައިޕީ ޓިކެޓް ނެގި މީހުންނަށް ޔޮހާނީއާ ބައްދަލުކޮށް، އެކުގައި ފޮޓޯ ނެގުމުގެ ފުރުސަތު ދީފައެވެ.
ޗަނާޗާ ޝޯގައި ރާއްޖޭގެ މަގުބޫލު ނުވަ ބޭންޑަކާއެކު 80އަށް ވުރެ ގިނަ އާޓިސްޓުން ބައިވެރިވިއެވެ. ޝޯގައި ފެނުނު މިއުޒިކް ބޭންޑްތަކުގެ ތެރޭގައި ސްކައި ރޮކް، ރެވިއޯ، އިކުއެޓިކް ވައިބް، ޓްރެފިކް ޖޭމް، އަޗޭސިއާ، ސިންބޮލިކް ރިކޯޑްސް، ޑިޓިއުން ބޭންޑް، ފަސީ ލައިވް އަދި ހަންބަލް ބަކަރި ހިމެނެއެވެ.