17 Nov 2022, 11:14
އާރަށު މައްސަލައިގައި މަނީ ލޯންޑާ ކުރިކަމަށް ކުރީގެ ރައީސް އަބްދުﷲ ޔާމީންގެ މައްޗަށް އުފުލާފައިވާ ދައުވާގެ މިއަދުގެ ޝަރީއަތުގެ މަޖިލިސް މެދުކަނޑާލައިފިއެވެ.
ކްރިމިނަލް ކޯޓުން މިއަދުގެ ޝަރީއަތް މެދުކަނޑާލާފައިވަނީ މި މައްސަލައިގައި ދެން ދައުވާ އުފުލާފައިވާ ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެމްބަރު ޔޫސުފް ނައީމްގެ މައްސަލައާ ވަކިން ކުރިއަށް ގެންދިއުމަށް ދައުލަތުން އިއުތިރާޒް ކުރުމާ ގުޅިގެންނެވެ.
އެމައްސަލާގައި ދައުލަތުން ރައީސް ޔާމީންގެ މައްޗަށް އުފުލާފައިވަނީ ޓުއަރިޒަމް މިނިސްޓްރީ އާއި މޯލްޑިވްސް މާރކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ) މެދުވެރިކޮށް ޓުއަރިސްޓް ރިސޯޓް ތަރައްގީކުރުމަށް ވ. އާރަށް ކުއްޔަށް ދޫކުރުމުގެ މުއާމަލާތުގެ ތެރެއިން މަގާމުގެ ނުފޫޒު ބޭނުންކޮށްގެން ރިޝްވަތުގެ ގޮތުގައި އެއްމިލިއަން ޔޫއެސް ޑޮލަރު ނަގައި ލޯންޑަރ ކޮށްފައިވާކަމަށް ތުހުމަތު ކުރެވޭ މައްސަލާގައެވެ.
ހެނދުނު 9:30 އަށް ތާވަލްކޮށްފައިވާ އަޑުއެހުން ފަށާފައިވަނީ އޭގެ ގަޑިއެއްހާއިރު ފަހުންނެވެ. އަޑުއެހުން ފައްޓަވަމުން އިސްގާޒީ އަހްމަދު ޝަކީލް ވިދާޅުވީ, މި މައްސަލައިގައި ދައުވާ ލިބޭ ޔޫސުފް ނައީމް މިއަދުގެ ޝަރީއަތަށް ހާޒިރުވެފައިނުވާ ކަމަށެވެ.
ބަލި ހާލަތު ހުރި ގޮތުން ކަމަށް ބުނެ ޔޫސުފް ނައީމް ހާޒިރުވެފައި ނުވި ނަމަވެސް އޭނަގެ މައްޗަށް އުފުލާފައިވާ ދައުވާގެ އަޑުއެހުން މިއަދު އެހެން ގަޑިއެއްގައި ބާއްވާނެ ކަމަށެވެ. އަދި ރައީސް ޔާމީންގެ ބައި ވަކިން ކުރިއަށް ގެންދިއުމުގައި އިއުތުރާޒެއް އޮތްތޯ އެއްސެވިއެވެ.
ދައުލަތާއި ދިފާއުން ވެސް ވަނީ އެކަމަށް އިއުތިރާޒްކޮށް ދެ މީހުން ބައި އެކުގައި ކުރިއަށް ގެންދިއުމަށް އެދިފައެވެ.
އެހެންކަމުން މައްސަލަ ބައްލަވާ އިސް ގާޒީ އަހްމަދު ޝަކީލް ވަނީ ދެ ބޭފުޅުންގެ ބައި އެކުގައި ކުރިއަށް ގެންދިއުމަށް އަޑުއެހުން މެދުކަނޑާލާފައެވެ. އެ އަޑުއެހުން އޮންނާނީ މެންދުރު 1:00 ގައި ކަމަށް ވެސް ގާޒީ ވިދާޅުވިއެވެ.
މިމައްސަލައިގެ އަޑުއެހުމެއް އެންމެ ފަހުން ބާއްވާފައިވަނީ މިދިޔަ އޮކްޓޯބަރު މަހުގެ ފަސް ވަނަ ދުވަހުއެވެ.