05 Nov 2022, 14:48
ވަގުތު ނޫހުގެ ނޫސްވެރިއަކަށް މޯލްޑިވްސް މީޑިއާ ކައުންސިލް (އެމްއެމްސީ)ގެ މެމްބަރު، މުހައްމަދު ޝާފިއު ފުރައްސާރަ ކުރިކަމަށް ބުނާ މައްސަލައިގައި ޖިންސީ ފުރައްސާރަކުރިކަން ހާމަވާން ނެތްކަމަށް ފުލުހުން ނިންމުމުން މީޑިއާ ކައުންސިލުން އޭނާގެ ސަސްޕެންޝަން ނިމުމަކަށް ގެނެސްފިއެވެ.
މީޑިއާ ކައުންސިލުން މިއަދު ނެރުނު ބަޔާނެއްގައި ބުނީ ޝާފިއު އޭނާގެ މަސްއޫލިއްޔަތުތަކުން އެކަހެރި ކުރީ ފުލުހުން އެ މައްސަލަ ތަހުގީގުކުރަމުން އައުމުންކަމަށެވެ.
އެހެން ނަމަވެސް މުއާސަލާތީ ވަސީލަތެއް ބޭނުންކޮށްގެން ޖިންސީ ފުރައްސާރަކުރިކަން ހާމަވާ އެކަށީގެންވާ ހެއްކެއް ނެތްކަމަށް ބުނެ ފުލުހުން އެ މައްސަލަ ފައިލްކޮށްފައިވާކަމަށް މީޑިއާ ކައުންސިލުން ބުންޏެވެ.
އެއާއެކު މީޑިއާ ކައުންސިލުންވަނީ ވަގުތު ނޫހުގެ ނޫސްވެރިއަކަށް ޖިންސީ ފުރައްސާރަކުރިކަމަށް ބުނެ ވަގުތު ނޫހުން ނެރުނު ނޫސް ބަޔާނުގެ ސަަބަބުން ކައުންސިލްގެ މެމްބަރުންނާމެދު ނުރަނގަޅު ތަސައްވުރެއް އުފެދެން މަގުފަހިވެފައިވާކަަމަށް ބުނެފައެވެ. އަދި ހަރުކަށި އިބާރާތުން އެ ކަން ކުށްވެރިކުރާކަމަށް ވެސް ބުނެފައިވެއެވެ.
"މޯލްޑިވްސް މީޑިއާ ކައުންސިލްގެ މެމްބަރު މުހައްމަދު ޝާފިއު ވަގުތު ނޫހުގެ މުވައްޒަފަކަށް ޖިންސީ ގޯނާ ކުރިކަމަށް ބަޔާންކޮށް ވަގުތު އޮންލައިންއިން ނެރެފައިވާ ނޫސްބަޔާނާއި އެ ކަމާ ގުޅިގެން ޝާއިއުކޮށްފައިވާ ޚަބަރުތަކަކީ މީޑިއާގެ އަޚްލާގީ މިންގަނޑުގެ ދެވަނަ މާއްދާއާއި ހަތަރުވަނަ މާއްދާއާ ޚިލާފަށް ވަރަށް ޒިންމާދާރުކަން ކުޑަ ގޮތެއްގައި ޙަގީގަތެއް ބެލުމެއްނެތި މީޑިއާ ކައުންސިލާއި ކައުންސިލްގެ މެމްބަރުންނާ މެދު ރައްޔިތުންގެ ހިތުގައި ހަގީގަތާ ޚިލާފު ނުރަނގަޅު ތަސައްވުރެއް އުފެދޭ ގޮތަށް ޝާއިއުކޮށްފައިވާ ޚަބަރުތަކެއްކަމުގައި ފާހަގަކުރަމެވެ،" އެ ބަޔާނުގައިވެއެވެ.
މީޑިއާ ކައުންސިލުންވަނީ ދިވެހި މީޑިއާގެ ހަމަތަކާއި އަޚްލާގީ މިންގަނޑު ހިފެހެއްޓުމަށް އިލްތިމާސްކޮށްފައެވެ.
ވަގުތު ނޫހުން މިދިޔަ މަހުގެ 23ވަނަ ދުވަހު ނެރުނު ބަޔާނެއްގައިވަނީ އެމްއެމްސީގެ މެމްބަރަކު އެ ނޫހުގެ އަންހެން މުވައްޒަފަކަށް ފުރައްސާރަކޮށް، ތަކުރާރުކޮށް މެސެޖުކޮށް އޭނާގެ ޒާތީ މައުލޫމާތުތަކާ ގުޅޭގޮތުން ސުވާލުކުރިކަމުގެ ތުހުމަތުކޮށްފައެވެ.
ވަގުތު ނޫހުން ތުހުމަތުކުރި މީޑިއާ ކައުންސިލްގެ މެންބަރު ޝާފިއުއަށް "ސަން"އިން ސުވާލުކުރުމުން އޭނާ ވަނީ ތުހުމަތުތަކަށް އެއިރު ވެސް އިންކާރުކޮށްފައެވެ.