05 Nov 2022, 10:07
ބޮލީވުޑް ތަރި މީނާކްޝީ ސެޝަދްރީ އަކީ ފިލްމު 'ދާމިނީ' އާއި 'ގާޔަލް' އަދި 'ގަތަކު' ފަދަ ފިލްމުތަކުން މަގުބޫލުކަން ހޯދި ތަރިއެކެވެ.
މިއަހަރުގެ އިންޑިއަން އައިޑޮލް ފަށައިގެން ކުރިއަށްދާއިރު އެންމެ ފަހު ޝޯގެ ގެސްޓެއްގެ ގޮތުގައި މިނާކްޝީ ވަނީ މި ހަފުތާގައި ބައިވެރިވެފައެވެ. މި ޝޯގައި ވާހަކަދައްކަމުން މިނާކްޝީ ބުނީ 'ދާމިނީ' ފިލްމަށް އޭނާގެ އޮތީ އެންމެ ޝަކުވާއެއް ކަމަށެވެ. އެއީ ފިލްމުގެ ލިޔުންތެރިންނާއި ޑައިރެކްޓަރުންނަށް އޮތް ޝަކުވާއެއް ކަމަށާއި އެއީ އޭނާ އަކީ އެ ފިލްމުގެ 'ދާމިނީ' ކަމުގައި ވިޔަސް މީހުންގެ ތެރޭގައި މަގުބޫލުވީ ފިލްމުގައި ފެނުނު ސަނީ ޑިއޯލްގެ ޑައިލޮގުތައް ކަމަށް އޭނާ ބުންޏެވެ.
"އެ ޑައިލޮގުތައް އަހަންނަށް ދިން ނަމަ އަހަރެންވެސް ކިޔާނެއެއްނު،" ޝޯގައި ވާހަކަދައްކަމުން މިނާކްޝީ ބުންޏެވެ.
އެހެންނަމަވެސް، މި ފިލްމުގެ ތީމް ލަވަ 'ގަވާހޭ ޗާންދް ތާރޭ' ނުވަތަ އާއްމުވީ ނަމުން ނަމަ 'ދާމިނީ ދާމިނީ' ޝޯގެ ބައިވެރިޔަކު ކިޔުމުން ވަނީ އެ ލަވައަށް އަދި ކިޔުންތެރިޔާއަށް ތައުރީފުކޮށްފައެވެ. އަދި، އޭނާއާކު ފިލްމުގެ ލީޑް ފިރިހެން ތަރީގެ ގޮތުގައި ފެނުނު ރިޝީގެ ހަނދާންތައް ވަނީ އައުކޮށްފައެވެ.
1993ގައި ނެރުނު ދާމިނީ ފިލްމަކީ ރޭޕްގެ ޝިކާރައަކަށްވީ އަންހެނެއްގެ ވާހަކަ ކިޔައިދޭ ފިލްމެކެވެ. އެ ފިލްމުގައި ދާމިނީ އޭނާގެ އާއިލާއާއި ފިރިމީހާއާއެކު ފިރިމީހާގެ އާއިލާ އާ ދެކޮޅަށް އިންސާފުހޯދަން މަސައްކަތް ކުރެއެވެ. މި ފިލްމުން ސަނީ ޑިއޯލް ވަނީ ބެސްޓް ސަޕޯޓިންގ އެކްޓަރ ފިލްމް ފެއާ އެވޯޑްސްގައި ހޯދާފައެވެ. އަދި، ނެޝަނަލް ފިލްމް އެވޯޑްސްގައިވެސް ބެސްޓް ސަޕޯޓިންގ އެކްޓަރ އޭނާ ހޯދިއެވެ.