02 Nov 2022, 18:04
ތައުދީބީ މައްސަލައެއްގައި ފަނޑިޔާރުންގެ ވަޒީފާއިން ވަކިކުރުމަށް ނިންމާ ފަނޑިޔާރުންނާއި، ފަނޑިޔާރުންގެ މަގާމުގައި ހުރެ ކުރި ކަމެއްގެ ސަބަބުން އެޅިދާނެ ތައުދީބީ ފިޔަވަޅަކުން ބަރީއަވުމަށްޓަކައި މަގާމުން އިސްތިއުފާދޭ ފަނޑިޔާރުންނަށް ޝަރަފުވެރިކަމާއެކު ވަޒީފާއިން ވަކިނުވެވޭ ގޮތަށް ޖުޑީޝަލް ސާވިސް ކޮމިޝަން (ޖޭއެސްސީ)އިން ފަނޑިޔާރުންގެ ރިޓަޔާމަންޓް ގަވާއިދަށް އެއްވަނަ އިސްލާހު ގެނެސްފިއެވެ.
މިގަވާއިދުގެ ދަށުން ޝަރަފްވެރިކަމާއެކު މަގާމުން ވަކިވުމަށް އެދެވޭނީ ފަނޑިޔާރުކަމުގައި 10 އަހަރު ދުވަހު ޚިދުމަތްކޮށްފައިވާ ފަނޑިޔާރުންނާއި، ސުލޫކީ މައްސަލައެއް ސާބިތުވެ ވޭތުވެ ދިޔަ އެއް އަހަރު ތެރޭގައި ފިޔަވަޅު އަޅާފައިނުވާ ފަނޑިޔާރުންނާއި، ސުލޫކީ މައްސަލައެއް ސާބިތުވެ ވޭތުވެ ދިޔަ ތިން އަހަރު ދުވަހުގެ ތެރޭގައި ފިޔަވަޅު އަޅާފައިނުވާ ފަނޑިޔާރުންނަށެވެ.
މީގެ ކުރިން އަމަލުކުރަމުން އައި ގަވާއިދުގައި އަމިއްލައަށް އެދިގެން މަގާމުން ވަކިވެވެނީ އުމުރުން 70 އަހަރުވުމުން އުސޫލުގެ ދަށުންނާއި، 55 އަހަރުވުމުން އަމިއްލަ އެދިގެންނާއި ސިއްހީ ސަބަބަކަށްޓަކައި އެދިގެންނެވެ.
މިގަވާއިދަށް ގެނައި ބަދަލުގައިވާ ގޮތުން 55 އަހަރު ނުވިނަމަވެސް އެހެން ޝަރުތުތައް ހަމަވާނަމަ އިނާޔަތް ލިބޭގޮތަށް ޝަރަފުވެރިކަމާއެކު މަގާމުން ވަކިވެވިދާނެއެވެ.
މަގާމުން ވަކިވާން އެދޭ ފަނޑިޔާރަކު ޝަރަފުވެރިކަމާއެކު މުސްކުޅިކުރާއިރު، ސުލޫކީ މައްސަލައެއް ސާބިތުވެ ވޭތުވެދިޔަ އެއް އަހަރު ތެރޭގައި ނަސޭހަތްދީ، ތަމްރީން ޕްރޮގްރާމެއް ފުރިހަމަ ކުރަން އަންގާފައިވާ ނަމަ އިނާޔަތް ލިބޭނެ ގޮތަށް މަގާމުން ވަތްކެއް ނުވެވޭނެއެވެ.
ހަމައެއާއެކު، ވޭތުވެދިޔަ ތިން އަހަރުތެރޭގައި މަގާމުގެ ދަރަޖަ ދަށްކޮށްފައިވާނަމަ، ނުވަތަ ވަޒީފާއަށް ނުކުތުން ތިން މަސް ދުވަހަށް މަނާކޮށްފައިވާ ފަނޑިޔާރަކަށް ވެސް މަގާމުން ވަކި ނުވެވޭނެ ކަމަށް ގަވާއިދުގައި ވެއެވެ.
އަމިއްލައަށް އެދިގެން މަގާމުން ރިޓަޔާވާ ފަނޑިޔާރުންނަށް ގަނޑުކޮށްދޭ ފައިސާގެ އިނާޔަތާއި މެޑިކަލް އިންޝުއަރެންސް ހިމެނެއެވެ.