02 Nov 2022, 16:19
ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރު ޝިމާޒް އަލީއަށް ތުހުމަތުކޮށްފައިވާ ކޮރަޕްޝަންގެ މައްސަލަތަކާ ގުޅިގެން ފިޔަވަޅެއް އަޅަން ޖެހޭނަމަ، އެކަން ކުރާނެ ކަމަށް ސަރުކާރުން ބުނެފިއެވެ.
ކޮރަޕްޝަންގެ އަމަލުތަކެއް ހިންގި ކަމުގެ ތުހުމަތުގައި ޝިމާޒް އޭނާ މިހާރު ހުންނެވި މަގާމުން ވަކިކޮށްދިނުމަށް އެދި ޓްރާންސްޕޯޓް މިނިސްޓަރު އައިޝަތު ނަހުލާ ވަނީ ރައީސް އިބްރާހީމް މުހައްމަދު ޞާލިޙަށް ސިޓީއެއް ފޮނުވާފައެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި އެ އޮފީހުގެ ތަރުޖަމާނު މިއުވާން މުހައްމަދު ވިދާޅުވީ އެފަދަ ސިޓީއެއް ލިބިފައިވާ ކަމަށެވެ.
"އެ މައްސަލަ ޖެހޭނީ ފުރަތަމަ ބަލަން. އެކަމާ ގުޅިގެން ބަލަން ޖެހޭ ކަންތައްތައް ދާނީ ބަލަމުން،" އޭނާ ވިދާޅުވިއެވެ.
މިއުވާން ވިދާޅުވީ އެ މައްސަލަ ބެލުމަށްފަހު އޮންނަ އުސޫލުގެ ތެރެއިން އަޅަން ޖެހޭ ކޮންމެ ފިޔަވަޅެއް ވެސް އަޅާނެ ކަމަށެވެ.
ޝިމާޒް ހިމެނޭހެން ޓްރާންސްޕޯޓް މިނިސްޓްރީގެ އިސްވެރިންތަކަކާއި އެ މިނިސްޓްރީގެ ބިޑް ކޮމިޓީގައި ހިމެނޭ މެމްބަރުންތަކެއް މަގާމުގެ ނުފޫޒު ބޭނުންކޮށްގެން ރާއްޖޭގައި ދުއްވާ ވެހިކަލްތަކުގެ ނަމްބަރު ޕްލޭޓް ބަދަލުކުރުމަށް ވަސާޖިއޯ ނަމަކަށް ކިޔާ ކުންފުންޏާ ހަވާލުކުރި މައްސަލައެއް ވެސް ދާދި ފަހުން ވަނީ ބަލާފައެވެ.
އެ މައްސަލާގައި ޓްރާންސްޕޯޓް މިނިސްޓްރީގެ ބިޑު ކޮމިޓީގެ މެންބަރުން ކަމުގައިވާ ޝިމާޒުގެ އިތުރުން ފަސް މީހެއްގެ މައްޗަށް ދައުވާ ކޮށްދިނުމަށް އެންޓި ކޮރަޕްޝަން ކޮމިޝަން (އޭސީސީ)އިން ވަނީ ޕްރޮސިކިއުޓާ ޖެނެރަލްގެ އޮފީހުގައި އެދިފައެވެ. ނަމަވެސް ހެކި ނެތުމާއެކު އެ މައްސަލައިގައި ހިމެނޭ މެމްބަރުންނަށް ދައުވާ ނުކުރުމަށް ޕްރޮސިކިއުޓާ ޖެނެރަލް ހުސައިން ޝަމީމް ވަނީ ނިންމަވާފައެވެ.