02 Nov 2022, 11:34
މަޝްހޫރު ބިރުވެރި ވީޑިއޯ ގޭމަށް ބިނާކޮށް އެޗްބީއޯއިން ތައްޔާރުކުރާ ޝޯ "ދަ ލާސްޓް އޮފް އަސް" އަންނަ އަހަރުގެ ޖެނުއަރީގައި ދައްކަން ފެށުމަށް ތައްޔާރުވެއްޖެއެވެ.
"ލާސްޓް އޮފް އަސް" ނަމަކަށް ކިޔާ ގޭމަށް ބިނާކޮށް އެ ނަމުގައި ލައިވް އެކްޝަން ޓީވީ ޝޯއެއް އުފެއްދުމަށް ނިންމައި އެޗްބީއޯ އިން އެކަން އިއުލާނު ކޮށްފައިވަނީ 2019 ވަނަ އަހަރުގައެވެ. އެއަށްފަހު ގޭމްގެ ފޭނުން އަންނަނީ އެ ޝޯއަށް ކެތްމަދުވެ އިންތިޒާރު ކުރަމުންނެވެ. އަދި ގޭމާ ހިލާފަށް ބަދަލުކުރާނެ ކަންތައްތައް ބެލުމަށް ފޭނުން ތިބީ ބޭނުންވެފައެވެ.
ޝޯއާ ގުޅޭ ގިނަ މައުލޫމާތެއް ހިއްސާ ނުކުރި ނަމަވެސް އެންމެފަހުން މިދިޔަ ސެޕްޓެމްބަރުގެ ފަހުކޮޅުގައި ވަނީ ޝޯގެ ޓްރެއިލާ އެންމެފަހުން ދައްކާލާފައެވެ. ނަމަވެސް އޭރުވެސް ފިލްމު ރިލީޒްކުރާނެ ދުވަހެއް ހާމަކޮށްފައެއް ނުވެއެވެ.
އެޗްބީއޯއިން ދާދިފަހުން ހާމަކޮށްފައިވާ ގޮތުގައި ޖެނުއަރީ މަހުގެ 15ގައި އެ ޝޯ ދައްކަން ފަށާނެއެވެ. އެއަށްފަހު ކޮންމެ ހަފުތާއެއްގައި އެޕިސޯޑެއް ދައްކާ އުސޫލުން ޝޯ ދެއްކުމަށް ހަމަޖެހިފައިވާއިރު އެ ޝޯގައި ހިމެނޭނީ 10 އެޕިސޯޑު ކަމަށް އެޗްބީއޯއިން ބުނެއެވެ.
ލާސްޓް އޮފް އަސް އަކީ ކުއްލި ގޮތަކަށް ދުނިޔެއަށް ފެތުރޭ ވައިރަހެއްގެ ސަބަބުން "ޒޯމްބީސް" ޒާތުގެ އެއްޗެހިތަކެއް އުފެދިގެން އައުމާއެކު ކަންތައް ވެގެންދާ ގޮތް ދައްކުވައިދޭ ގޭމެކެވެ. މި ގޭމުގައި އަލިއަޅުވާލާނީ ޖޯލް އާއި އެލީގެ ދިރިއުޅުމަށެވެ. ޖޯލްގެ އެންމެ ގާތް އެކުވެރިޔާގެ ދަރިފުޅު އެލީ ބަލަން ޖެހި އޭނާ ސަލާމަތްކޮށް ދެމީހުންގެ ދެމެދުގައި ބައްޕައާއި ދަރިއެއްގެ ދެމެދުގައި އޮންނަ ގުޅުން އުފެދޭ މަންޒަރު ގޭމުން ފެނިގެންދާނެއެވެ. ޖޯލްގެ ރޯލުން ޝޯގައި ފެނިގެންދާނީ ޕެޑްރޯ ޕާސްކަލްއެވެ. އަދި އެލީގެ ރޯލުން ފެނިގެންދާނީ ބެލާ ރާމްޒޭއެވެ.