31 Oct 2022, 09:17
އިންޑިއާގެ ގުޖުރާތު ސްޓޭޓުގެ ބްރިޖެއް ވެއްޓި، 132 މީހުން މަރުވެއްޖެއެވެ.
ގުޖުރާތުގެ މައްޗޫ ކޯރު ހުރަސްކުރުމަށް ހަދާފައިވާ މި ބްރިޖު ވެއްޓުނުއިރު ބްރިޖް މަތީގައާއި ބްރިޖު ކައިރީގައި 400 އަށްވުރެ ގިނަ މީހުން ތިބި ކަމަށް ކަމާ ބެހޭ އިދާރާތަކުން ބުންޏެވެ.
އެ ސްޓޭޓުގެ ހޯމް މިނިސްޓަރު ހާޝް ސަންގާވީ ވިދާޅުވި ގޮތުގައި އެ ހާދިސާ ހިނގި ވަގުތު ބުރިޖު މަތީގައި 150އަށް ވުރެ ގިނަ މީހުން ތިއްބެވެ.
ބްރިޖް ވެއްޓުމުގެ ސަބަބުން އެތައް ބަޔަކަށް އެކިވަރުގެ އަނިޔާތައް ލިބިފައިވާއިރު، ގިނައިން މަރުވެފައިވަނީ ގެނބުމުގެ ސަބަބުން ކުޑަކުދިންނެވެ.
އިންޑިއާގެ ބޮޑުވަޒީރު ނަރެންދަރު މޯދީ ވަނީ ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް އިންޑިއާގެ ނޭވީ އާއި، އެއާފޯސް އަދި ޑިޒާސްޓާ މެނޭޖްމަންޓް ޓީމުތަކަށް އަންގަވާފައެވެ.
ބްރިޖު ވެއްޓުނު އިރު އޭގެ މަތީގައި 150އަށް ވުރެ ގިނަ މީހުން ތިބި -- ފޮޓޯ/ ގެޓީ
މޯދީ ވަނީ މި ހާދިސާއާ ގުޅިގެން ހިތާމަ ފާޅުކުރައްވައި، މަރުވި މީހުންގެ އާއިލާތަކަށާއި، އަނިޔާވި މީހުންނަށް ބަދަލުދެއްވާނެކަމަށް ވިދާޅުވެފައެވެ.
ނަވާރަ ވަނަ ގަރުނުގެ ތެރޭގައި އިންޑިއާ އިނގިރޭސިންގެ ބާރުގައި އޮތްއިރު ހެދި މި ބްރިޖަކީ 230 މީޓަރު ދިގު ބްރިޖެކެވެ. ފާއިތުވި ހަ މަސް ދުވަހުގެ ތެރޭގައި ބްރިޖު މަރާމާތު ކުރުމަށް ފަހު ހުޅުވާފައި ވަނީ މިދިޔަ ހަފުތާގެ ތެރޭގައެވެ.
އިންޑިއާގެ ގުޖުރާތު ސްޓޭޓުގެ ގާނޫނު ހަދާ މަޖިލީހުގެ އިންތިޚާބު ކައިރިވެފައި އޮތް މި ދަނޑިވަޅުގައި އެ ހާދިސާ ހިނގާފައި ވަނީ، ބްރިޖަށް މީހުންނާއި ތަކެތި އެރުވޭނެ މިންވަރު ފަދަ ފަންނީ ކަންކަން ބެލުމަކާ ނުލައި ބްރިޖު ހުޅުވުމުގެ ސަބަބުން ކަމަށް އިދިކޮޅު ޕާޓީތަކުން ވަނީ ތުހުމަތުކޮށްފައެވެ.
މޯދީ ނިސްބަތްވެވަޑައިގަންނަވާ ގުޖުރާތުގެ ގާނޫނު ހަދާ މަޖިލީހުގެ އަޣުލަބިއްޔަތު މިހާރު އޮންނަނީ ގައުމުގެ ވެސް ވެރިކަން ކުރާ ބީޖޭޕީއަށެވެ.