30 Oct 2022, 16:31
ނަފްސާނީ ބަލިތަކަށް ފަރުވާ ދެއްވާ، ކްލިނިކަލް ސައިކޮލޮޖިސްޓް ޑރ. އައިޝަތު އަލީ ނާޒް ފަރުވާ ދިނުމުގައި އިހުމާލުވާ ކަމަށް ކުރެވުނު ތުހުމަތުތަކާއެކު ހެލްތް މިނިސްޓްރީން އެ މައްސަލަ ބަލަން ފަށައިފިއެވެ.
މިފަހުން ގިނަ ބަޔަކު އަންނަނީ ޑރ. ނާޒަށް ބޮޑެތި ތުހުމަތުތަކެއްކޮށް، ސޯޝަލް މީޑިއާގައި ޝުއޫރުފާޅު ކުރަމުންނެވެ. އެގޮތުން ބޮޑު އަގު ނެގުމަށް ފަހު ޓެސްޓްތަކުގެ ނަތީޖާ ނުދޭކަމަށް ބައެއް މީހުން ބުނެފައިވެއެވެ. އަދި ރަނގަޅަށް ނުބަލައި ނަފްސާނީ ބަލިތައް ހުންނަ ކަމަށް ނާޒް ނިންމާ ކަމަށް ވެސް ބައެއް މީހުން ތުހުމަތު ކުރެއެވެ.
ހެލްތު މިނިސްޓްރީގެ ސީނިއާ އެގްޒެކެޓިވް ޑިރެކްޓަރު އައިމިނަތު ޝަތުފާ މިއަދު "ސަން" އަށް ވިދާޅުވީ ޑރ. ނާޒްގެ މައްސަލަ އެއްވެސް ފަރާތަކުން އެ މިނިސްޓްރީއަށް ހުށަހަޅާފައި ނުވާ ކަމަށެވެ.
ނަމަވެސް އެކަން ސޯޝަލް މީޑިއާ މެދުވެރިކޮށް އެ މިނިސްޓްރީގެ ސަމާލު ކަމަށް އައުމުން އިސްވެ ބަލާ މައްސަލައެއްގެ ގޮތަށް ބަލަން ފަށާފައިވާ ޝަތުފާ ވިދާޅުވިއެވެ.
"މިނިސްޓްރީގެ ކޮލެޓީ އެޝުއަރެންސްއިން އަންނަނީ އެކަން ބަލަމުން. ސުވާލު ކުރަންޖެހޭ ފަރާތްތަކާ ސުވާލުކޮށް އެ މައްސަލަ ބަލާނެ،" ޝަތުފާ ވިދާޅުވިއެވެ.
މިކަމާ ގުޅޭގޮތުން ޑރ. ނާޒްއާ "ސަން" އިން ސުވާލު ކުރުމުން ވިދާޅުވީ ސޯޝަލް މީޑިއާގައި އޭނާގެ މައްޗަށް ކޮށްފައިވާ ތުހުމަތުތައް ދޮގު ކުރާ ކަމަށެވެ. މި މައްސަލާގައި އިތުރަށް ވާހަކަ ދައްކާނީ ގާނޫނީ ވަކީލުން ކަމަށް ވެސް ނާޒް ވިދާޅުވިއެވެ.
ނަފްސާނީ ބަލިތަކަށް ފަރުވާ ދިނުމަށް، "މިޕްސްޓާ"ގެ ނަމުގައި އަމިއްލަ ކްލިނިކެއް ނާޒް ހިންގަވާތާ ވެސް އަހަރުތަކެއް ވެއްޖެއެވެ. އޭގެ އިތުރުން އޭނާ މިފަހުން ގެންދަވަނީ އަތޮޅުތެރެއަށް ދަތުރުތައް ކޮށް، ރަށްރަށުގައި ފަރުވާގެ ކަންކަން ކުރިއަށް ގެންދަމުންނެވެ.