26 Oct 2022, 09:20
މަޝްހޫރު ސްޕޯޓްސް އަދި ފެޝަން ކުންފުނި, އެޑިޑާސްއިން ވެސް މަޝްހޫރު ރެޕް ލަވަކިޔުންތެރިޔާ ކާންޔޭ ވެސްޓް އާއެކު އޮތް ގުޅުން ކަނޑާލައިފިއެވެ.
ފާއިތުވި ހަފުތާތަކުގެ ތެރޭގައި ކާންޔޭ ދައްކާފައިވާ ވާހަކަތައް، ހާއްސަކޮށް އެންޓި-ސެމިޓިކް ނުވަތަ ޔަހޫދީންނާ ގުޅޭގޮތުން ދެއްކި ވާހަކަތަކާ ގުޅިގެން ބޮޑެތި ކުންފުނިތަކުން އަންނަނީ އޭނާއާއެކު އޮތް ގުޅުން ކަނޑާލަމުންނެވެ.
ނަމަވެސް މި ހުރިހާ ގުޅުންތަކަކަށް ބަލާއިރު ވެސް ކާންޔޭއާއެކު އެންމެ ބޮޑު އެއްބަސްވުމެއްގައި ސޮއިކޮށްފައިވަނީ އެޑިޑާސް އާއެކުގައެވެ. އެއީ އެ ކުންފުންޏާ ގުޅިގެން ކާންޔޭ އުފައްދާ "ޔީޒީ" ލައިންގެ ޕްރޮޑަކްޓުތަކުންނެވެ. ޔީޒީ ލައިނަކީ އެޑިޑާސް ބްރޭންޑުގެ ދަށުން ނެރޭ އެންމެ ލަގްޒަރީ ޕްރޮޑަކްޓުތައް ހިމެނޭ ލައިނެވެ. އޭގެތެރޭގައި އަގުބޮޑު ބޫޓުތަކާއި ޓެނިސްތަކަކީ އެންމެ މަގުބޫލު ޕްރޮޑަކްޓުތައް ހިމެނެއެވެ.
އެޑިޑާސް އިން ނެރުނު ބަޔާނެއްގައި ބުނެފައިވަނީ ކާންޔޭ އާއެކު އޮތް ގުޅުން ކަނޑާލުމާއެކު އެކުންފުނިން ޔީޒީތައް އުފެއްދުން ހުއްޓާލާނެ ކަމަށެވެ. އަދި ހަމަ ވަގުތުން ވަގުތަށް ހުރިހާ ގުޅުމެއް ކަނޑާލާފައިވާއިރު ކުރިއަށް އޮތް ތަނުގައި އެއްވެސް ފައިސާއެއް ކާންޔޭއަށް އެ ކުންފުނީގެ ފަރާތުން ނުދާނެ ކަމަށް އެޑިޑާސް އިން ބުންޏެވެ.
އެކުންފުނީގެ ނިންމުމާއެކު އެޑިޑާސްގެ މިއަހަރުގެ އާމްދަނީއިން 246 މިލިއަން ޑޮލަރު މަދުވާނެ ކަމަށް އެކުންފުނިން ބުނެއެވެ.
ފޯބްސް އިން ހާމަކޮށްފައިވާގޮތުގައި އެޑިޑާސް އާއެކު އޮތް ގުޅުން ކަނޑާލުމާއެކު ކާންޔޭގެ އާމްދަނީއަށް ބޮޑު ގެއްލުމެއް ލިބޭނެއެވެ. އަދި އެއާއެކު ފޯބްސްގެ ބިލިއަނަރުގެ ލިސްޓުން ކާންޔޭ ބޭރުވުމަކީ ވެސް އެކަށީގެންވާ ކަމެއް ކަމަށް ފޯބްސް އިން ބުނެއެވެ.
އެޑިޑާސްގެ އިތުރުން މިހާރު ވަނީ ވޯގް އާއި ބަލެންސިއާގާ ވެސް އޭނާ އާ އެކު އޮތް ގުޅުން ކަނޑާލާފައެވެ. އަދި ބައެއް ސޯޝަލް މީޑިއާތަކުން އޭނާ ސަސްޕެންޑުކޮށްފައިވާއިރު އޭނާގެ ޓެލެންޓް އޭޖެންސީ، ސީއޭއޭ އިން ވެސް ވަނީ އޭނާގެ ނަން މިހާރު ނަގާފައެވެ.