26 Oct 2022, 11:26
ޑީސީ އެކްސްޓެންޑެޑް ޔުނިވާސް (ޑީސީއީޔޫ)ގެ އެންމެ މަގުބޫލު ސުޕަހީރޯ "ސުޕަމޭން"ގެ ރޯލާއެކު ހެންރީ ކެވިލް އަލުން އައުމަށް ތައްޔާރުވެއްޖެއެވެ.
ވޯނާބްރޮސްއިން ސުޕަމޭން އަލުން ފަށައި "މޭން އޮފް ސްޓީލް" އާއެކު އާ ސުޕަމޭން ފްރެންޗައިޒް އެއް ތައްޔާރުކުރީ މަގުބޫލު އެކްޓަރު ހެންރީ ކެވިލް އާއެކުގައެވެ. އެއަށްފަހު އޭނާ އެ ރޯލުން އެންމެ ފަހުން ފެނިފައިވަނީ ޒެކް ސްނައިޑާގެ "ޖަސްޓިސް ލީގް" ކަޓާގައި 2017 އަހަރުގައެވެ.
ނަމަވެސް މިދިޔަ ހަފުތާގައި އެޅުވި އާ ކޮމިކް ކެރެކްޓާ "ބްލެކް އެޑަމް" އިން ވަނީ ސުޕަމޭންގެ ކެރެކްޓާ އަލުން ފެނިގެން ގޮސްފައެވެ. އެގޮތުން ފިލްމުގެ އެންމެ ފަހުގެ ކްރެޑިޓުން ފެނިގެން ދިޔައީ ސުޕަމޭން ކެރެކްޓަރެވެ. މިއީ ހެންރީ ކެވިލް އެ ރޯލުން އާ ފިލްމަކާއެކު ފެނުނު ފުރަތަމަ ފަހަރެވެ.
އެންމެފަހުން ކެވިލް ވެސް ވަނީ ރަސްމީކޮށް އެ ވާހަކަ ކަށަވަރު ކޮށްދީފައެވެ. ސޯޝަލް މީޑިއާއަށް ޕޯސްޓުކުރި ވީޑިއޯއެއްގައި ބުނެފައިވަނީ އޭނާ އަލުން އެނބުރި އަންނަ ވާހަކަ ފުރަތަމަ ނުބުނެ މަޑުކުރީ ފޭނުންނަށް ބްލެކް އެޑަމް ބަލާލުމަށް ފުރުސަތު ދިނުމަށް ކަމަށެވެ.
"މިހާރު ގިނަ ބަޔަކަށް ވާނީ ބްލެކް އެޑަމް ފެނިފައި. އެހެންވެ ބޭނުންވަނީ މި ވާހަކަ ރަސްމީ ކޮށްލަން. އަހަރެން ސުޕަމޭންގެ ރޯލަށް އަލަށް އަނބުރާ މިއައީ،" ކެވިލް ބުންޏެވެ.
ކުޑަ ކެމިއޯ މަންޒަރެއް ބްލެކް އެޑަމް އިން ފެނުމަކީ ހަމައެކަނި ފެށުން ކަމަށް ބުނެ ކުރިއަށް ތަފާތު ބޮޑެތި ކަންތައް ރާވާފައި ހުރި ކަމަށް ކެވިލް ފާހަގަކުރިއެވެ.